Apple II

駁咗綠色MON同兩架磁碟機嘅 Apple II

開咗蓋嘅 Apple II，可以見到呢架插咗3張擴充卡，左上角6號槽嗰張係磁碟機卡

Apple IIep1 pou1 tu1 係蘋果公司早期推出嘅一款畀屋企用嘅八位元個人電腦，1977年推出，用嘅中央處理器係速度大約 1 MHz 嘅 6502 處理器；喺佢流行之後，可能同電路圖正式公開咗有關，市面上好快就出現功能完全一樣嘅山寨貨，呢類山寨貨粵語統稱 AP IIei1 pi1 tu1。

佢跟機淨係用得 BASIC 同透過監督程式直接用機器語言；最初用嘅係一隻蘋果自己設計嘅 BASIC，淨係用得整數，後來換咗隻叫 Applesoft，用得浮點數，但係其實係微軟產品，兩隻 BASIC 一啲關係都冇。用浮點數嘅型號叫 Apple II 。

最初佢淨係用得磁帶，而且淨係錄得資料，唔係用嚟錄音，後來有得用五吋碟，五吋碟嘅操作系統叫 DOS。同當時其他牌子嘅個人電腦唔同，佢淨係可以顯示大楷嘅 ASCII。佢嘅畫圖功能亦都特別怪，喺高解像度模式入面，像素並冇特定嘅顏色，而係根據顯像管嘅操作原理，由像素嘅位置同隔籬有冇嘢嚟決定像素嘅顏色。

蘋果公司後來出咗出得細楷嘅 Apple IIe 同 Apple IIc，再之後出咗用十六位元嘅 65816 處理器嘅 Apple IIgs，但係因為嗰陣 IBM PC 已經推出咗，gs 已經唔夠打，結果取代 Apple II 嘅並唔係 Apple IIgs 而係 Macintosh。

常見擴充

Apple II 嘅視訊輸出係 NTSC 制式嘅電視訊號，喺香港如果唔駁MON，就一定要加 PALpeu1 卡先駁到電視機。

臺灣嘅一間公司後來幫 Apple II 設計咗張中文卡，因為部機原本英文淨係用得大楷，中文內碼揀咗用細楷倉頡碼加空格，中文字用 16 乘 16 嘅點陣，所以淨係顯示得10行，每行17個中文字，收字聲稱跟當時臺灣嘅官方標準，但係其實可以打到第啲字出嚟，包括一啲根本唔存在嘅字。中文卡用嚟顯示嘅係部機本身嘅高解像度模式，所以用中文卡一定要駁綠色MON或者橙色MON，如果駁彩色MON或者駁電視，啲中文字形就會變成顏色，會睇唔清楚啲字。

另外，因為部機本身嘅文字幕淨係可以顯示 24 行，每行 40 個 ASCII 字符，喺商業應用會唔係好夠，於是有啲廠商出咗一啲叫 80-columnbaat3 sap6 ko1 lam4 卡嘅嘢，等部機可以出到每行 80 個字符；呢啲卡因為要輸出雙倍嘅視訊，所以唔係用部機本身嘅嘅繪圖模式，而係真係有電路輸出自己嘅視訊，所以用呢啲卡一定要駁MON，當然亦都唔可以出中文。