𠊎族

𠊎族 người Ngái
總人口
4841（1999年） 1035（2009年）
分佈地區
越南：分散分佈喺好多省
語言
𠊎話（客家話）、廣東話（包括台山話）、越南話
宗教信仰
大乘佛教
相關種族
客家、蜑家、畬族

𠊎族（字形係「亻厓」，粵拼：ngaai5 zuk6；越南文：người Ngái；客家白話字：Ngâi-chhu̍k），又有名𠊎人（ngaai5 jan4；Ngái Nhằn）、𠊎流民（ngaai5 lau4 man4；Ngái Lầu Mần）、蜑（daan6；Đàn）、黎（lai4；Lê），係生活喺越南嘅54個民族之一。佢哋自稱做山𠊎（saan1 ngaai5；Sán Ngái；意爲山區人）。𠊎族嘅語言係𠊎話，又叫山𠊎話，係屬漢藏系嘅語言，係山客人（畬族／客家）嘅方言分支，呢個族羣分佈喺中國廣東東北，以鳳凰山（而家屬廣東省潮州嘅饒平縣）爲祖地。𠊎族以客家爲主體，有少部分人來源自蜑家、黎話人群。因爲𠊎話嘅第一人稱單數係「𠊎」（客家白話字：ngài），作爲常用詞畀越南人聽到，就用呢個音作爲族名稱呼佢哋。

語言

𠊎族人嘅母語係客家話中嘅𠊎話，呢種客家話因爲同粵語、黎話（閩南話方言）有接觸，而同臺灣、粵東嘅客家話幾唔同。講客家話嘅人佔𠊎族主體，但有啲𠊎族人來源自蜑家、黎話人，所以有啲人講嘅係粵語或者黎話。因爲𠊎族約喺三百年前就由廣東移民越南，住喺越南咁耐，佢哋識講通用嘅越南話。

人口同居地

𠊎族分散居住喺越南多個省。據1999年時嘅人口調查資料，當時喺越南有𠊎族4841人。最集中嘅省有：太原、平順、同奈、北𣴓、宣光、多樂、高平。

據2009年人口及家庭總調查，𠊎族喺越南只淨番1035人，分佈喺27個省市（省市總數63個）。𠊎族集中居住喺呢啲省：太原（495人，喺越南𠊎族總數中佔47.8%）、平順（157人，喺越南𠊎族總數中佔15.2%）、同奈（53人）、北𣴓（48人）、宣光（43人）、多樂（37人）、高平（30人）。

經濟特點

𠊎族生活主要靠耕田種禾。喺海島地方，生計靠喺海邊捉魚。佢哋傳統上會挖河渠、修堤、造湖、整海堤，佢哋亦有手工藝如編蓆、整竹簾、冶煉、木工、燒石灰、整磚瓦。

佢哋喺一年中嘅耕種事務會根據啲自然現象來安排，如雀叫聲、樹葉枯榮、花開等。佢哋會整幾十公里長嘅渠壩來灌溉用。喺胡志明市嘅𠊎族會做啲小手工業，如鞋業，集中喺11區、新平區、新富區。亦有啲人喺堤岸做小商，部分喺製鞋、橡膠等行業成爲營業到幾大下嘅商家。

婚姻家庭

家庭之中，丈夫決定每件大事，佢哋睇重嘅係仔，而女喺父母死後冇得分家產，啲女外嫁後歸夫家。

舊時，𠊎族男女嘅婚事由父母話事，嫁女畀仔要過兩次婚禮：成婚禮同入房禮。爲咗幫仔搵新婦（sam1 pou5／心抱），男家會主動搵對象去傾。個胎有咗時，𠊎族婦女會謹慎戒口戒手：唔食蝸牛、牛肉、羊肉，唔縫布或者買衫。喺生頭胎60日後、次胎40日後，產婦先得返佢自己生母嘅外家。

喺外家，舅父係代理人，所以喺𠊎族家庭中舅父係緊要角色。𠊎話叫舅父做「舅」，睇成做家庭當中各個姊妹嘅老豆。當啲外甥女生仔時，由舅公幫啲甥外孫起名。

喪俗

據𠊎族風俗，人死後會組織起周到嘅喪禮。佢哋嘅喪禮分喪段，落葬後第21日、35日、42日、49日、63日、70日、3年時會專門上供奉。

文化

𠊎族有對唱山歌嘅男女交往方式，𠊎話就叫做「唱歌」，係種好豐富嘅文化。佢哋可以對唱5到7晚而內容無到重複。佢哋亦有充滿意義嘅俗話，教畀人搵食、做人嘅經驗。佢哋有幾多鍾意嘅遊戲，如舞獅、舞棍、舞龍。

屋

𠊎族嘅村通常建立喺山上、山坑或者海邊、島上。啲屋普遍係三室兩房。

服裝

𠊎族服裝似齊族、儂族。衫褲之外，佢哋亦戴帽，各類帽自製自啲葉、竹，同時亦帶巾、遮。

參攷資料

越南文

• 《Các dân tộc ít người ở Việt Nam（漢喃：各民族𠃣𠊛𣄒越南；譯：喺越南嘅各少數民族）》。河內：社會科學出版社（Nhà xuất bản Khoa học Xã hội；家出版科學社會）。1978年。各民族𠃣𠊛𣄒越南Category:有越南文嘅文章；譯：喺越南嘅各少數民族）&rft.pub=河內：社會科學出版社（Nhà xuất bản Khoa học Xã hội；'"`UNIQ--templatestyles-00000011-QINU`"'家出版科學社會Category:有越南文嘅文章）&rft.date=1978&rfr_id=info:sid/zh-yue.wikipedia.org:𠊎族" class="Z3988"> {{cite book}}: templatestyles stripmarker in |publisher= at position 41 (help); templatestyles stripmarker in |title= at position 40 (help) 《華族》（Dân tộc Hoa；民族華）：第388～395頁

英文

• Grant Evans（格蘭·艾文斯） (2000年)。《Where China meets Southeast Asia: Social & Cultural Change in the Border Region（中國同東南亞嘅相遇之地：喺邊境地區嘅社會、文化變化）》。Palgrave Macmillan。ISBN 9780312236342。 第13章：Cross-Border Categories: Ethnic Chinese and the Sino-Vietnamese Border at Mong Cai（跨境類別：喺芒街嘅華裔同中越邊境）