芭蕾舞音樂
.jpg)
芭蕾舞音樂（粵拼：baa1 leoi4 mou5 jam1 ngok6 | 英文：ballet music）係一種舞曲，泛指芭蕾舞所使用嘅樂曲[1]：芭蕾舞同第啲舞蹈一樣，講求舞蹈員喺跳舞嗰陣同音樂配合－簡單嘅例子有每當音樂變快嗰時，開始做一啲快速同動作大嘅舞步－達致身體動作同音樂互相配合嘅美學效果；理論上，芭蕾舞可以跟任何音樂跳，而初時嘅芭蕾舞主要係跟歐洲古典樂跳嘅，不過自從 19 世紀開始，芭蕾舞界開始有重要嘅作曲家特登為芭蕾舞劇作曲，出咗一套芭蕾舞獨有嘅音樂[2][3]。
芭蕾舞音樂喺芭蕾舞呢種藝術誕生嘅幾個世紀後先成形：芭蕾舞源自 15 世紀嘅意大利，喺 17 世紀嘅法國發展成熟；但喺呢段期間，芭蕾舞嘅音樂一路都係舞蹈嘅陪襯；去到 19 世紀，芭蕾舞界出咗俄羅斯嘅柴可夫斯基（Pyotr Ilyich Tchaikovsky；俄文：Пётр Ильи́ч Чайко́вский）同法國嘅亞道夫亞當（Adolphe Adam）等嘅名作曲家；柴可夫斯基幫《天鵝湖》、《合桃鉗》同《睡公主》等三齣芭蕾舞劇作曲，而亞道夫亞當就作咗《芝莎》呢齣浪漫芭蕾舞代表劇目嘅曲，呢幾齣芭蕾舞劇後嚟都大受歡迎，而且當中嘅樂曲質素高到令好多人都覺得佢哋算係獨立於芭蕾舞劇嘅藝術作品[4][5]。
簡史
[編輯]
19 世紀前
[編輯]直至 19 世紀後半為止，芭蕾舞音樂一般都唔俾音樂家當係一回事。喺芭蕾舞史早期，經已有人為芭蕾舞作曲，呢啲曲同當時音樂比起上嚟嘅特色主要係會配合芭蕾舞劇嘅故仔：作曲者會思考齣芭蕾舞表演想表達嘅故仔，再編寫出一首首能夠講故仔嘅音樂，每首都會帶出嗰幕嘅氣氛（悲哀嘅劇情配合幽怨嘅音樂等等）；不過呢啲音樂並冇太受重視。就算到咗 19 世紀，都仲係有唔少音樂家會睇唔起芭蕾舞音樂，認為呢種音樂只係啱做舞蹈嘅陪襯，而作呢種音樂嘅作曲家只係「工匠」，作能夠獨立存在嘅音樂先係「藝術家」嘅工作。例如就連柴可夫斯基為（打後大受歡迎，變到家傳互曉嘅）芭蕾舞劇作曲嗰陣，都有音樂家同事笑佢，話佢噉做係一種自貶[4][5]。
19 世紀後
[編輯]19 世紀中後期係芭蕾舞音樂起飛嘅時代。一般認為，亞道夫亞當喺 1841 年為《芝莎》（Giselle）呢齣芭蕾舞劇作曲係現代芭蕾舞音樂嘅起始，而及後柴可夫斯基又有喺 19 世紀尾為《天鵝湖》（Swan Lake）、《合桃鉗》（The Nutcracker）同《睡公主》（Sleeping Beauty）呢三齣芭蕾舞劇作曲。呢幾齣芭蕾舞劇打後大受歡迎，俾世界各地嘅芭蕾舞團演出，令音樂界關注呢啲芭蕾舞劇當中嘅配樂，而且呢啲樂曲廣受好評，有唔少人願意當呢啲音樂係一般嘅音樂噉聽（即係攞嚟喺冇舞蹈配合嘅情況下演奏），芭蕾舞音樂成為咗一種能夠獨立存在嘅藝術品－令原本睇唔起芭蕾舞音樂嘅音樂家改觀[6]。
特色
[編輯]一般認為，芭蕾舞音樂有以下嘅特色[7]：
- 強嘅節奏；
- 會流露明顯嘅情緒，便於用嚟表達芭蕾舞劇嘅情節；
- 會包含角色嘅音樂，用音樂表達角色嘅個性，例如《天鵝湖》嘅天鵝公主（俾魔法師落咒變成天鵝嘅悲劇公主）會配有幽怨嘅音樂俾佢做變奏舞（variation）用；
- 會用交響樂團做配樂，尤其係古典同浪漫芭蕾舞（睇埋器樂）；
- 樂團嘅指揮職責重大，如果舞蹈員跟唔上音樂嘅節奏，指揮要幫手將音樂減慢；
- 排舞師會同作曲家通力合作，排舞師會講明自己想舞蹈員跳點樣嘅舞，而作曲家往往會按呢個要求作出方便舞蹈員跳噉嘅舞嘅樂曲。
影響
[編輯]- Sarabande
莎拉班德（Sarabande；西班牙文：Zarabanda）係源自 16 世紀西班牙嘅一種舞曲同舞蹈，喺古典樂當中相當受歡迎，例如韓德爾（Handel）嘅《D 小調鍵盤組曲 HMV 437》（Keyboard suite in D minor HWV 437）嘅第四樂章就係一首好出名嘅莎拉班德[9]。
現代嘅莎拉班德樂曲會跟 3/2 拍號跳，氣氛傾向生動活潑。啲人喺跟莎拉班德跳舞嗰時，通常數拍子會跟兩段節拍嘅方式數，即係數「1 2 3 4 5 6... 1 2 3 4 5 6...」[10]。下圖係莎拉班德嘅典型節奏：
- Allemande
阿里曼德（Allemande；法文「德國式」噉解）係源自 16 世紀德國嘅一種舞曲，不過係由法國發揚光大嘅，好似巴哈（Bach）同韓德爾等嘅著名作曲家都作過阿里曼德；喺音樂特性上，阿里曼德 4/4 拍，有好似下圖噉嘅節奏，速度傾向喺 100 bpm 上下（算係微快），形式上傾向用二段體，十六分音符零舍多[11]；有啲學者覺得，阿里曼德係一種好「嚴肅同儀式化」嘅舞，忌切分音（指啲特登唔跟拍子嘅音），傾向表達滿意等正面得嚟輕微嘅情緒，成日俾人攞嚟做一套組曲嘅第一樂章[12]。
- Waltz
華爾茲（Waltz；德文：Walzer）係源於 16 世紀嘅奧地利一帶嘅一種舞曲同舞蹈。華爾茲音樂會用三拍子，多數都係 3/4，每段節拍第一吓拍子強另外嗰兩吓拍子弱，速度上偏中至快，啲人喺跳華爾茲或者彈奏華爾茲音樂嗰陣，通常會「1 2 3、1 2 3...」噉打拍子。華爾茲音樂對芭蕾舞有過一定嘅影響，例如係《花之華爾茲》（Waltz of the Flowers）呢首好出名嘅《合桃鉗》樂曲就係一首華爾茲[13]。
據講因為華爾茲音樂成日俾人有種「飄浮」嘅感覺，所以用華爾滋節奏嚟跳嘅芭蕾舞舞段通常都會零舍多跳躍[10]。
- Mazurka
瑪祖卡（Mazurka；英文讀音：[-ɜː(r)kə]）係源自 16 世紀波蘭嘅一種舞曲同舞蹈，喺芭蕾舞當中成日俾人攞嚟做舞段嘅一部。芭蕾舞嘅瑪祖卡通常跟 3/4 拍跳，三吓拍子都強或者第二吓拍子強，會涉及一男一女嘅一對重要嘅配角同埋若干位伴舞隊隊員，舞步上多以女舞蹈員以輕快嘅舞步圍住男舞蹈員移動，男舞蹈員多數會中途有一隻膝頭跪地，而且傾向用長裙（女舞蹈員）同埋靴（男舞蹈員）等有東歐風味嘅服裝[14]。
「瑪祖卡」呢個詞亦都可以係指俾人攞嚟跳瑪祖卡嘅舞曲。
- Jig
積舞曲（Jig）係喺 16 至 17 世紀經已存在喺蘇格蘭同英格蘭北部嘅民間舞曲，到咗廿一世紀初最盛行於愛爾蘭。愛爾蘭式嘅積舞曲嘅典型拍號係 6/8 或者 9/8，會用到複合拍號（每吓拍子可以細分做若干個八分音符），啲樂曲好興一大柞八分音符，每三個八分音符做一組噉嘅樣（好似下圖噉）－當中所謂嘅雙重積舞曲（double jig）係拍號 6/8，每段小節兩組音符，每組三個八分音符，啲人打起拍子上嚟好似雙拍子噉（每一組音符起始嗰點打一吓）；喺舞步上，積舞曲會涉及跳嘅人腳板一路好快噉離地又踏返落地，著住鞋嚟跳嗰陣就會出現踢踢躂躂噉嘅聲[15]。可以睇埋踢躂舞。
- Chaconne
夏康舞曲（Chaconne / Ciaconne）係喺 1600 年代左右經已存在喺西班牙嗰度嘅一種舞曲同舞蹈，出名嘅作品有巴哈嘅《小提琴第二變奏曲》（Partita for Violin No. 2）嘅最終樂章；喺音樂特性上，夏康舞曲係三拍子，音階上通常係大調，速度冇乜點定，俾人話會令聽嘅人有一種「輕盈」嘅感覺[10]。喺舞步上，傳統嘅夏康舞曲一般會由一男一女一齊跳或者一個女人單獨噉跳，好多時都會帶有些少挑逗性（因而喺初頭嗰陣受到保守啲人士批評）[16]。
- Polonaise
波蘭舞曲（Polonaise）係最遲源自 17 世紀波蘭嘅一種舞曲。喺音樂上，波蘭舞曲拍號係 3/4，速度中等，樂句偏短，成日會出現「1 個八分音符，2 個十六分音符，4 個八分音符」噉嘅規律（下圖當中嘅第一段同第二段節拍）[17]。
可以睇埋個名取自波蘭舞曲嗰個芭蕾舞舞步。
- Minuet
小步舞曲（Minuet）係源自 17 世紀中嘅法國貴族圈子嘅一種舞曲，例如舉世聞名嘅巴哈小步舞曲就係一首小步舞曲；喺音樂特性上，小步舞曲通常用 3/4 拍號，有好似下圖噉嘅節奏，有陣時亦會用 3/8，數起拍子上嚟通常會係每週期兩段節拍（總共 6 吓拍子）；首音樂多數分兩段，而且兩段都各自成二段體；喺舞步上，小步舞曲通常會係一男一女成雙成對噉嚟跳，雙方會拖住手噉跳，但身體唔會掂得太埋（唔似得例如華爾滋噉會用封閉位），喺巴洛克時期係貴族圈子當中常見嘅社交舞[18]。
- Gigue
積古（Gigue；意大利文：Giga）係一種受到英格蘭民俗舞曲積舞曲（睇上面）影響嘅法國舞曲；喺音樂特性上，積古嘅拍號傾向係 3/8 或者係 3/8 嘅複合節拍（6/8、9/8 或者 12/8 呀噉），音樂速度上通常偏快（尤其係意大利嘅積古零舍快），好多時會超過 200 bpm 咁快，而另一個特徵係成日都會有好多三個做一組嘅八分音符（好似下圖嗰個例子噉；呢點同積舞曲好相似）；喺組曲當中，基格通常都係做最後嘅樂章[19]。
- Bourrée
布尼舞曲（Bourrée；睇埋布尼舞步）係源自 17 世紀中之後嘅法國舞曲，呢種舞曲出嗮名成日俾人攞嚟做芭蕾舞嘅配樂；布尼舞曲音樂特性係興用 4/4 拍同埋喺一條小節最後嗰吓拍子嘅後半橛做起始，會有好似下圖噉嘅樣嘅節奏，速度上比較快通常起碼會有 130 至 140 bpm 左右；啲人喺跟布尼舞曲跳舞嗰陣，通常會做好多細嘅跳躍彈上彈落噉[20]。
- Oberek
波蘭轉舞（Oberek，源自「obracać się」，即係波蘭文「旋轉」噉解）係一種源自 18 世紀波蘭嘅舞曲同舞蹈，喺節奏上會用好似瑪祖卡噉嘅節拍，不過速度上會相當快，閒閒地會去到 160 bpm 咁快，再快啲嘅甚至仲可以去到成 240 bpm [21]。芭蕾舞舞段有陣時會用到波蘭轉舞式嘅節奏。
- Csárdás
查達斯（Csárdás；英文讀音：[ˈtʃɑːdæʃ]）係源自 18 世紀匈牙利嘅一種民俗舞，喺 1870 年嘅《歌碧麗亞》（Coppélia）當中第一次出現喺芭蕾舞台上。呢種民俗舞最大特徵係開頭速度好慢，跟住速度會突然間變快。喺芭蕾舞入面，查達斯係一啲初頭速度慢，跟住速度突然間變快嘅舞段，除此之外，芭蕾舞查達斯仲有第啲特徵，例如係好多時會加入少量東歐民俗舞嘅舞步喺裏面，而且喺服裝上，排舞師編查達斯嗰陣好興要男舞蹈員著住靴嚟跳同要女舞蹈員著長裙嚟跳[22]。
- Kujawiak
尋夢舞（Kujawiak）係源自 19 世紀上半橛波蘭中部嘅一種舞曲同舞蹈。喺舞步上，尋夢舞會涉及一對對嘅男女一齊成雙成對噉跳，一路跳一路旋轉（有少少似波蘭轉舞）。喺音樂特性上，尋夢舞嘅節奏係三拍子，速度中等偏快，傾向係 120 至 150 bpm 左右，多彈性速度[23]。芭蕾舞舞段又係有陣時會用到尋夢舞式嘅節奏。
- Galop
加羅普（Galop）係一套社交舞曲，最遲起源喺 19 世紀上半橛，喺 19 世紀曾經盛行於英格蘭同法國嘅舞會。加羅普喺節奏上係雙拍子，多數 2/4；喺舞步上，呢種舞會涉及一對男女相擁噉跳（呢點似華爾滋），舞步上多兩個人一齊做橫向嘅跳躍（會用到芭蕾舞上嘅 glissade），而大班人一齊喺舞會跳加羅普嗰陣好興圍圈噉嚟跳，出現成班人一齊圍住舞廳中央打圈跳嘅情境。有啲芭蕾舞劇會參考加羅普嘅節奏同跳法，例如《芝莎》嘅第一幕就有首曲係用加羅普式節奏嘅[10]。順帶一提，加羅普俾人指係普卡嘅前身[24]。
- Polka
普卡（Polka）係源於 19 世紀中嘅波希米亞嘅一種舞曲同舞蹈。普卡音樂一般會跟 2/4 拍，好興唔跟「每段節拍第一吓拍子重音」嘅規律；愛爾蘭嘅普卡會有 32 橛小節，而呢啲小節細分 4 部份，每部份 8 小節，而且愛爾蘭嘅普卡速度通常都比較快，好多時都接近或者超過 130 bpm，成日用 oom-pah（伴奏一種，交替噉出「一吓係一條和弦嘅低音部份－一吓係條和弦淨低嗰啲音符」噉嘅規律，可以用嚟幫啲雙拍子或者四拍子嘅音樂做伴奏）[25]。芭蕾舞舞段又係有陣時會用到普卡式嘅節奏，會「1 呀、2... 1 呀、2...」噉跳[10]。
名家
[編輯]- 柴可夫斯基（Pyotr Ilyich Tchaikovsky；俄文：Пётр Ильич Чайковский）
- 亞道夫亞當（Adolphe Adam；發音：[adɔlf adɑ̃]）
- 史特拉汶斯基（Igor Stravinsky；俄文：Игорь Фёдорович Стравинский）
- 亞倫柯普蘭（Aaron Copland）
睇埋
[編輯]文獻
[編輯]- Goodwin, Noel. "Ballet." Grove Music Online. 13 Dec. 2009. www.oxfordmusiconline.com
- Holloway, Robin. "Sugar and Spice: Robin Holloway Celebrates the Tchaikovsky Centenary." The Musical Times 134 (Nov., 1993), 620-623
- Mihailovic, Alexandar, and Jeanne Fuchs. "Tchaikovsky's ballets: Interpretation and performance." Tchaikovsky and his contemporaries: A centennial symposium. Westport, CT: Greenwood, 1999. 295-312.
- Warrack, John Hamilton. Tchaikovsky Ballet Music. London, England: British Broadcasting Corporation, 1979.
- Wiley, Roland John. "Three Historians of The Imperial Russian Ballet." Dance Research Journal, 13, (Autumn, 1980), 3-16
- Wiley, Roland John. Tchaikovsky (Master Musicians Series). New York: Oxford University Press, USA, 2009.
攷
[編輯]- ↑ North, A. C., & Hargreaves, D. J. (1999). Music and adolescent identity. Music education research, 1(1), 75-92. p. 8.
- ↑ How dancers learn their steps: music, muscle memory and mystery. The Guardian.
- ↑ Naveda, L., & Leman, M. (2010). The spatiotemporal representation of dance and music gestures using topological gesture analysis (TGA). Music Perception: An Interdisciplinary Journal, 28(1), 93-111.
- ↑ 4.0 4.1 Goodwin, 2009.
- ↑ 5.0 5.1 Ballet Music: Where To Start 互聯網檔案館嘅歸檔，歸檔日期2018年6月4號，..
- ↑ Scholl, T. (2003). From Petipa to Balanchine: Classical Revival and the Modernisation of Ballet. Routledge.
- ↑ Knight, J. (1973). Ballet and its music. Schott Music Corp New York.
- ↑ Dance Rhythms for Ballet Pianists. Royal Academy of Dance.
- ↑ Hicks, Anthony (2001). "Handel, George Frideric". In Sadie, Stanley; Tyrrell, John (eds.). The New Grove Dictionary of Music and Musicians. x (2nd ed.). London: Macmillan. p. 804.
- ↑ 10.0 10.1 10.2 10.3 10.4 Dance Rhythms for Ballet Pianists. RAD.
- ↑ A Baroque Glossary.
- ↑ Blatter, Alfred (2007). Revisiting music theory: a guide to the practice, p.28.
- ↑ Poznansky, Alexander. (1999). Tchaikovsky Through the Eyes of Others. Indiana University Press. p. 218.
- ↑ Mazurka 互聯網檔案館嘅歸檔，歸檔日期2019年7月4號，.. Ballethub.
- ↑ Baskervill, Charles Read (1929). The Elizabethan jig and related song drama. Chicago: The University of Chicago Press.
- ↑ Alexander Silbiger, "Chaconne," The New Grove Dictionary of Music and Musicians, ed. Stanley Sadie and J. Tyrrell (London: Macmillan, 2001).
- ↑ Polonaise (Polonez). Polish Music Center.
- ↑ Little, Meredith Ellis. 2001. "Minuet". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
- ↑ Gigue. Encyclopedia Britannica.
- ↑ Scholes, Percy, The Oxford Companion to Music, OUP, 1970, article; Bourrée.
- ↑ Pawlak, Aleksander. Folklor Muzyczny Kujaw [Musical folklore of Kujawy]. Kraków: PWM, 1980.
- ↑ Lafex, A. E. (2013). Reviving Ballet in the Nineteenth Century: Music, Narrative, and Dance in Delibes's Coppélia (Doctoral dissertation, University of Kansas).
- ↑ Dziewanowska, Ada. Polish Folk Dances & Songs - a Step by Step Guide. New York: Hippocrene Books, 1999.
- ↑ Galop. Encyclopedia Britannica.
- ↑ Vallely, F. (1999). The Companion to Traditional Irish Music. New York University Press: New York, p. 301.
拎
[編輯]
- Dance Rhythms for Ballet Pianists. Royal Academy of Dance.
- Ballet and dance music (In Russian).
