燒乳豬

燒乳豬唔會太大隻，否則就係「中豬」，不過體形世界各地可能有差異。

原隻燒乳豬

燒乳豬係一種燒烤嘢食，將兩至六個星期大、重未斷奶嘅乳豬劏咗之後，以爐火燒烤而成。全世界好多地方嘅飲食文化都有燒乳豬呢款菜式，歷史悠久。中國喺西周時相信就已經有食用燒豬。當時八珍之一嘅「炮豚」相信就係指燒豬。喺西方，古羅馬嘅傳統菜譜中亦有燒乳豬一項。現今嘅中國菜中以粵菜嘅燒乳豬最廣為流傳；而喺西方國家中，葡萄牙同西班牙都以燒乳豬做特色菜。

廣東燒乳豬

粵式明爐即燒乳猪

燒乳豬喺廣東有超過兩千年嘅歷史。喺廣州南越王墓起出大細兩隻唔一樣嘅烤爐，配咗烤炙用嘅鐵釺、鐵鉤、長叉、掛爐嘅鐵鍊等等。烤爐四角朝天，以防嘢食跌咗。細嗰隻爐近爐腳嗰處鑄咗兩隻豬仔，豬嘴向天、中空，畀人插燒烤工具。大嗰隻爐個底有四個有軸嘅轆，推得郁嘅，設計巧妙。

清朝嗰陣粵菜嘅燒乳豬獲選做滿漢全席嘅菜式之一。而家燒乳豬係廣東燒味其中一種。一般嘅造法用約五公斤重嘅乳豬，劏咗之後喺肚度切開，攞出肋骨，放入特製燒烤叉撐開，放入烤爐燒成。如果燒烤時用慢火，燒出嘅乳豬皮滑捋捋waat6 lyut6 lyut6，稱之為「光皮」。亦可以用猛火燒烤，其間喺豬皮搽上油，令豬皮成充滿氣泡嘅金黃色，即為「麻皮乳豬」。乳豬嘅皮薄脆扑扑ceoi3 bok3 bok3、肉又淋又嫩、骨香而入味。食嗰時將乳豬斬成細件，因肉少皮薄，叫做「片皮乳豬」；有時放少少乳豬醬令到更加惹味。

辦公室開張，切燒豬。

喺廣東傳統習俗之中，燒豬係各喜慶場合嘅常用祭品。無論係新舖開張定係清明拜山祭祖，成日見成隻燒豬或燒乳豬擺出來做祭品。切燒豬有時重會係儀式嘅一部份，儀式完成後，燒豬就會分畀參加者。燒乳豬由於份量較少，而且乳豬攤凍後味道冇噉好，所以喺戶外進行儀式時，一般多用普通燒豬而少用乳豬。

但係喺廣東或香港嘅婚宴擺酒，燒乳豬重係必備菜色。按照舊時廣東習俗，新娘會「三朝回門saam1 ziu1 wui4 mun4」，亦即係出嫁之後第三朝返自己屋企（外家）。如果新娘出嫁時重係處女，回門時男家會以乳豬或燒豬做回禮。今日嘅婚禮已唔會再傳遞呢種意思；但乳豬仍然留喺婚宴度，並且有人視之為各項菜色中嘅主角。香港某啲酒家曾流行喺乳豬嘅眼上裝上會閃嘅燈膽仔；婚宴上乳豬前，將燈光校暗先，然後先由伙記排隊隆重咁捧上乳豬。

琉球燒乳豬

琉球嘅燒乳豬叫做「豚の丸焼き」，以三十五日大嘅豬仔加上味噌汁烤成，多用喺婚宴同其他喜慶場合。

菲律賓燒乳豬

菲律賓嘅燒乳豬源於西班牙，叫 litsón，會喺乳豬搽上一種由雞肝、蒜頭、胡椒同醋做成嘅醬料。

西班牙語系國家嘅燒乳豬

燒乳豬係西班牙系語國家西班牙、古巴、波多黎各、哥倫比亞、多明尼加共和國等國家嘅節日嘢食叫做 lechón；將乳豬去內臟，喺炭火上燒熟，成隻豬上枱。喺古巴，都可以將燒乳豬肉切成片，同切片嘅番茄、黃瓜一齊夾麪包，落鹽同辣椒汁食。

德國燒乳豬

德國燒乳豬

德國嘅燒乳豬（Spanferkel）係慕尼黑啤酒節等節日時嘅傳統嘢食。通常喺火爐中或燒烤架上燒烤而成。

睇埋

• 燒豬