日本社會黨

日本社會黨係以前日本嘅一個政黨，簡稱「社會」或者「社黨」。主要行社會主義，由於社會黨長期喺日本政壇處於下風，所以又被叫做「萬年在野黨」。到1996年，當時嘅黨委員長村山富市將社會黨改組做社民黨。

黨史

日本社會黨喺1945年11月2號成立，前身可以追溯到戰前偏向左翼嘅社會大眾黨（社大黨）。創立之初，社會黨嘅派系相當複雜，包括戰前日本社會主義嘅三種路線：右派嘅社民系、中間派嘅日勞系同左派嘅日無系，為後來不斷糾纏社會黨嘅黨爭埋咗伏筆。

1947年，社會黨喺呢年嘅眾議院選舉贏到最多議席，同民主黨、國民協同黨籌組聯合政府，社會黨嘅委員長片山哲成為首相，不過內閣入面各政黨有唔少對政策理念上嘅衝突，黨內又出現路線之爭，結果片山內閣一年都未夠就倒台，之後由民主黨嘅蘆田均接任首相，社會黨繼續留喺內閣，並且有一啲屬於社會黨左派嘅人入閣，不過冇幾耐，蘆田內閣就因為昭和電工事件落台，政權又落入吉田茂手上，社會黨就一直到1993年先至再重新上台。

1949年眾議院選舉，社會黨慘敗，連前首相片山哲都輸咗，社會黨喺1949年4月開大會，就喺呢次會議入面，左右兩派就為咗路線問題炒大鑊，右派認為社會黨應該要行「大眾政黨」路線，而左派就覺得要行「階級政黨」路線，最後兩派人喺1950年分裂，到1955年兩派人為咗應對保守派嘅民主黨同自由黨合併，先至重新合併。

1959年，當時嘅日本首相岸信介推動《美日安保條約》續約，引起民眾反對，結果展開咗連續兩年嘅安保鬥爭，不過《美日安保條約》最後都係續到約。而社會黨黨內嘅路線紛爭喺嗰時都冇停到，以片山哲、西尾末廣等人為首嘅右派因為支持《美日安保條約》，喺1960年安保條約成功續約之後就退出社會黨，另立民主社會黨（民社黨），到1960年10月12號，上任社會黨委員長僅僅半年嘅淺沼稻次郎喺東京做選舉演講嗰時畀極右翼青年山口二矢刺殺而死。

1960年代，社會黨嘅得票率大概維持喺30%左右，但到1969年嘅眾議院選舉，社會黨突然少咗三分之一嘅議席，得票率跌到得返20%左右。原因可能係社會黨冇對中國嘅文化大革命、蘇聯入侵捷克斯洛伐克（布拉格之春）呢啲重要問題表態（當時社會黨暗啞底接受緊蘇聯資助），而內部原因就係社會黨開始出現原教旨主義傾向，令佢哋嘅論說得唔到喺戰後快速成長嘅中產階級支持，加上社會黨嘅基層組織薄弱，長期依賴工會組織日本勞動組合總評議會（總評），令到原本會因為勞工階級增加同都市化受惠嘅社會黨，支持度竟然停滯不前，甚至倒退。

1970年代初期，社會黨靠住同共產黨合作（革新統一），黨勢開始有返啲起色，又贏到唔少地方上嘅選舉，不過後來兩黨開始不和，社會黨轉而希望同民社黨、公明黨合作嘅「社公民路線」，亦代表社會黨開始向右轉。

1986年，委員長石橋政嗣因為選舉大敗落台，選出土井多賀子做委員長，係日本主要政黨當中第一個女黨魁。憑著土井犀利嘅問政風格，以及因為執政黨設立消費稅同瑞可利分餅仔醜聞嘅因素，1989年嘅參議院選舉，社會黨大勝，喺改選嘅議席當中贏到45席，第一次多過自民黨嘅36席，自民黨亦都冇咗參議院嘅控制權，時稱「土井旋風」。呢次選舉畀咗在野陣營好大鼓舞，認為日本政壇嘅風向開始會有啲轉變。1990年眾議院選舉，社會黨贏到136席，亦都有可觀嘅增幅，不過呢次自民黨都仍然保住過半數，政權交替失敗，而社會黨議席嘅增幅主要來自其他在野黨。1990年，波斯灣戰爭爆發，日本政府當時打算派自衛隊去參戰，但係社會黨話呢個行動係違反憲法第9條為由反對，但咁樣就令到公明、民社兩黨開始同社會黨疏離。到1991年嘅地方選舉，社會黨失利，土井多賀子落台，由田邊誠接任。

1993年，在野黨趁自民黨內鬥嚴重之際，以對當時首相宮澤喜一提出不信任動議，最後喺小澤一郎派系特登唔出現嘅情況下，議案通過咗。跟住自民黨內要求政治改革嘅人紛紛另組新黨，結果喺眾議院選舉入面，在野黨終於成為多數，55年體制瓦解。不過社會黨喺呢次選舉並唔完全係贏家，社會黨喺選前有136席，但係呢次就得返70席，席次大跌一半，相反自民黨重比選舉前多咗1席。選舉後，社會黨為首嘅聯盟為咗招攬日本新黨同新黨先驅兩個右派細黨，將首相大位讓出畀細川護熙，組成八黨聯合政府，實現自1955年以嚟第一次政黨輪替，土井多賀子就出任眾議院議長。

細川內閣因為政治改革、將消費稅改為國民福祉稅、以及細川個人牽涉佐川急便事件等事件，喺唔夠一年就倒台。社會黨內部對選區制度改革有唔同意見，做成分裂。之後羽田孜接掌政權，初時社會黨都支持羽田組閣，但係八黨聯盟中嘅六黨——排除社會黨同新黨先驅，組成一個新嘅議會黨團「改新」，社會黨深感自己被孤立，決定退出聯合政權。之後自民黨嘅總裁河野洋平向社會黨同新黨先驅招手，表示願意將首相職位畀社會黨做，1994年6月，社會黨宣佈同幾十年嘅老對手——自民黨合組聯合政府，委員長村山富市成為首相。佢上台之後，一改社會黨多年嘅立場，承認美日安保、維持核能發電、繼續保持自衛隊，同以往社會黨嘅政見南轅北轍，已經得失好多社會黨嘅擁躉，後來阪神大地震救災反應太遲，東京地鐵沙林毒氣事件都令政府民望大跌。1996年1月，村山富市辭相，但社會黨繼續留喺政府。同月，社會黨改組成為社民黨，結束社會黨51年歷史。

選舉成績

眾議院

選舉	委員長	票數	得票率	議席	結果
1946	片山哲	9,924,930	17.90%	93 / 468	反對黨
1947	片山哲	7,176,882	26.23%	143 / 466	執政聯盟
1949	片山哲	4,129,794	13.50%	48 / 466	反對黨
1952	左右兩派分裂
1953	左右兩派分裂
1955	左右兩派分裂
1958	鈴木茂三郎	13,093,993	32.94%	166 / 467	反對黨
1960	淺沼稻次郎	10,887,134	27.56%	145 / 467	反對黨
1963	河上丈太郎	11,906,766	29.03%	144 / 467	反對黨
1967	佐佐木更三	12,826,104	27.88%	140 / 486	反對黨
1969	成田知巳	10,074,101	21.44%	90 / 486	反對黨
1972	成田知巳	11,478,742	21.90%	118 / 491	反對黨
1976	成田知巳	11,713,009	20.69%	123 / 511	反對黨
1979	飛鳥田一雄	10,643,450	19.71%	107 / 511	反對黨
1980	飛鳥田一雄	11,400,748	19.31%	107 / 511	反對黨
1983	石橋政嗣	11,065,083	19.49%	112 / 511	反對黨
1986	石橋政嗣	10,412,584	17.23%	85 / 512	反對黨
1990	土井多賀子	16,025,472	24.39%	136 / 512	反對黨
1993	山花貞夫	9,687,588	15.43%	70 / 511	執政聯盟

睇埋

• 社會民主黨
• 立憲民主黨