太古城

太古城地圖

太古城（Taikoo Shing）係一個位於香港島鰂魚涌嘅大型屋苑，原地係太古船廠，後尾由太古地產重建而來。佢行政上係歸東區，後來成為港島東嘅其中一部分。

歷史

太古船塢落成嗰陣嘅碑石，而家喺太古城入面

太古城前身係太古船塢，佢嘅紀念碑仍然喺太古城中心前面展示。1970年代，太古船塢搬咗之後，原址嘅大片土地俾太古地產分階段重新發展，到1980年代末全部搞掂。之後，太古繼續喺度填海，重喺上面起「海天花園」。太古城中心第二期完成之後，區內都再冇起新住宅。而喺太古城中心三座同四座兩幢商廈入伙之後，太古集團都將太古城中心一座翻新改建做商廈。而家區內發展重已完成，拆咗嘅太古城「好運街市」同栢嘉商業中心舊址，起咗一座四星級酒店叫做東隅。

概況

太古城佔地53畝，有61棟住宅大廈，提供咗12,698個單位，單位面積由585到1,237平方呎，實用呎價由$13722到$26601，人口超過4萬，好似一個小城市咁。由於太古城規模大，物業質素又好，所以幾受香港啲中產階級人士歡迎，啲住宅單位嘅樓價對香港樓市有指標性作用。

此外，佢都係在港日本人同韓國人嘅聚居地之一。

太古城係香港第一個設有園藝花園同綠化平台設計嘅私人屋苑。除咗平台花園之外，部分樓宇底層亦設有商舖同停車場，商舖包括超級市場、便利店、銀行同食肆等，方便居民。

太古城向海邊嘅北面係鰂魚涌公園，南面向山一面就鄰接另一個大型屋苑康怡花園同康山花園。太古城西面起咗行人天橋連接太古坊。

屋苑同埋大廈名

期數 屋苑個名 座數 大廈個名 I(?) 翠湖台 T-1 洞庭閣 T-2 鄱陽閣 T-3 太湖閣	期數 屋苑個名 座數 大廈個名 II(?) 高山台 T-6 東山閣 T-7 天山閣 T-8 泰山閣 T-9 廬山閣 II T-10 南山閣 II/III(?) T-11 寶山閣 T-12 恒山閣 T-13 華山閣 T-14 龍山閣 T-15 鳳山閣 T-16 怡山閣 T-17 金山閣 III T-18 富山閣
期數 屋苑個名 座數 大廈個名 IV 金殿台 T-19 唐宮閣 T-20 燕宮閣 T-21 元宮閣 T-22 明宮閣 T-23 夏宮閣 T-24 漢宮閣 T-25 齊宮閣 T-26 隋宮閣	期數 屋苑個名 座數 大廈個名 V 安盛台 T-27 寧安閣 T-28 寶安閣 T-29 順安閣 T-30 興安閣 T-31 建安閣 T-32 高安閣
期數 屋苑個名 座數 大廈個名 VI 海景花園 T-33 青松閣 T-34 翠榕閣 T-35 綠楊閣 VII T-36 紫樺閣 T-37 金楓閣 T-38 銀栢閣 VIII(?) T-39 美菊閣 T-40 海棠閣 T-41 雅蓮閣 T-42 碧藤閣 T-43 春櫻閣	期數 屋苑個名 座數 大廈個名 IX(?) 觀海台 T-44 北海閣 T-45 東海閣 X 星輝台 T-46 恒星閣 T-47 天星閣 T-48 海星閣 T-49 衛星閣 T-50 耀星閣 T-51 智星閣 T-52 金星閣 T-53 銀星閣 IXB 觀海台 T-54 南海閣
期數 屋苑個名 座數 大廈個名 XI 海天花園 T-55 啓天閣 T-56 海天閣 T-57 富天閣 T-58 彩天閣 T-59 恒天閣 T-60 冠天閣 T-61 逸天閣 T-62 南天閣 T-63 景天閣

社區設施

• 康樂
  • 泳池（觀海台、海景花園、海天花園）
  • 兒童遊樂場（有平台花園嘅屋苑）
  • 羽毛球場

• 其他
  • 郵政局

太古城中心

内文：太古城中心

位於太古城中部嘅太古城中心，係港島東區其中一個最大型嘅購物中心，商場內設有好多間百貨公司、各式店舖、酒樓食肆、美食廣場、戲院等，亦設有真雪溜冰場。並設有3座辦公大廈。而家太古城中心嘅辦公大樓同鄰近嘅太古坊已經成為港島區另一個商業中心。

交通

太古城交通方便，喺太古城中心地下（太古城道路面）同五樓（英皇道路面）設有巴士站，同埋有好多條行人通道連接港鐵太古站。太古城都設有道路出入口連接東區走廊，以及東區海底隧道（經西灣河同埋東區走廊）。

• 巴士：
  • 太古城中心地下：110、720、720A、720P
  • 太古城中心五樓：2、18X、77、77X、81A、82、85、85A、99、99X、102、102P、307P、606、606A、678、682、682A、682B、682P、722、A12、N122
• （港島）專線小巴：
  • 太古城中心五樓：32、32A、65A、68

政治同埋行政

由於太古城人口眾多密集，佢喺東區區議會嘅選區分界被劃成東（C02）、西（C01）兩區，各佔一個議席。位於太古城道以南、船塢里以東嘅部份，嚴格嚟講並唔係太古城嘅一部份，因為呢部份其實喺原太古船塢以外嘅地方。不過由於呢一部份並無常住人口，而且喺區議會分界亦劃入太古城西，所以而家唔少人亦都認同嗰度嘅工業大廈都係太古城嘅一部份。

代表東、西兩區嘅前任區議員，分別係王振星先生同埋趙家賢先生，兩人已响2021年7月離任。

睇埋

• 港島東
• 太古城碼頭

出面網頁

• 太古城中心
• 太古城地產