周星馳
| 周星馳 | |||||||||||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
_-_THE_NEW_KING_OF_COMEDY_SHOWCASE_1.png) 周星馳（2019年） | |||||||||||||||||||||||||||||||||||
| 男藝人 | |||||||||||||||||||||||||||||||||||
| 羅馬拼音 | Stephen Chow Sing-chi | ||||||||||||||||||||||||||||||||||
| 英文名 | Stephen Chow | ||||||||||||||||||||||||||||||||||
| 別名 |
| ||||||||||||||||||||||||||||||||||
| 國籍 |  中國（香港） | ||||||||||||||||||||||||||||||||||
| 籍貫 | 浙江寧波[1] | ||||||||||||||||||||||||||||||||||
| 出世 | 1962年6月22號.svg){kind=small} 英屬香港九龍 | ||||||||||||||||||||||||||||||||||
| 職業 | 導演、監製、編劇、演員、主持人、商人、企業家、政協委員 | ||||||||||||||||||||||||||||||||||
| 語言 | 粵語、普通話、英語 | ||||||||||||||||||||||||||||||||||
| 母校 | 聖瑪利奧英文中學 | ||||||||||||||||||||||||||||||||||
| 父母 | 周驛尚（父） 1928年（95–96歲） 凌寶兒（母） 1940年（83–84歲） | ||||||||||||||||||||||||||||||||||
| 屋企人 | 周文姬（姊） 1960年（63–64歲） 周星霞（妹） 1964年（59–60歲） | ||||||||||||||||||||||||||||||||||
| 出道日期 | 1980年 | ||||||||||||||||||||||||||||||||||
| 出道作品 | 《I.Q.成熟時》 | ||||||||||||||||||||||||||||||||||
| 代表作品 |
| ||||||||||||||||||||||||||||||||||
| 活躍年代 | 1980年開始 | ||||||||||||||||||||||||||||||||||
| 經紀公司 | 麗的電視（1980年 - 1982年） 無綫電視（1982年 - 1990年） 永盛電影公司 （1990年 - 1996年） 星輝海外有限公司 （1996年開始） | ||||||||||||||||||||||||||||||||||
| 網路電影資料庫（IMDb）資訊 | |||||||||||||||||||||||||||||||||||
| |||||||||||||||||||||||||||||||||||
周星馳（粵拼：zau1 sing1 ci4；Stephen Chow，1962年6月22號—），花名星爺（sing1 je4），係香港一個電影演員同導演。佢曾經屢破票房紀錄，因而又稱做「星爺」。
佢唔少戲嘅劇情都有一個共通點：開始時主角都好輕浮，一係就不學無術，一係就係小無賴（唔會大奸大惡，但係就賤到死）。跟住佢會俾人整到好慘，之後就會去修行，修行返嚟武功就會大增，個人亦踏實好多，打贏啲敵人之後就會退出江湖，過返啲平凡嘅生活，有種「大隱隱於市」嘅味道。
演藝生涯
[編輯]周星馳細細個就好崇拜李小龍，由嗰時開始已經嚮往成為一個專業嘅演員，所以中學畢業之後就參加咗TVB藝員訓練班嘅考試，但俾人淘汰。落選後嘅周星馳四圍咁搵窿路，終於畀佢成功入讀TVB藝員訓練班第11期嘅夜訓班。喺1982年畢業後，跟著吳孟達及星仔俾人擺咗去做兒童節目《430穿梭機》，同埋最多只係喺幾部電視連續劇做下臨記。不過睇返喺《430穿梭機》入面有個環節叫做《黑白殭屍》，其實嗰時星仔扮演嘅黑殭屍已經開始俾人認識佢嘅喜劇嘅天份。直到1986年周星馳先至有機會參演一套單元劇《哥哥的女友》，跟住慢慢再有機會喺其它劇集做吓配角，好似《生命之旅》、《鬥氣一族》、《阿德也瘋狂》、《大都會》等等。
1989年，周星馳終於有機會主演《蓋世豪俠》，喺劇入面初顯無厘頭風格；佢喺劇中經常講嘅「坐低飲杯茶，食個包」成為咗當時嘅流行口頭禪。同年喺另一套電視劇《他來自江湖》入面，星仔更大展功力，演譯喜劇角色「何鑫淼」（讀「何音秒」；劇入面啲人叫佢做「金水」），成為香港連續劇嘅一個經典人物。呢一刻周星馳嘅無厘頭演技開始受人注意。呢套劇入面，星仔同吳孟達（人稱「達哥」或「達叔」）嘅父子組合極之搞笑，兩人嘅合作亦因為呢套劇而開始大受觀眾歡迎，奠定咗日後合作無間嘅拍檔關係；甚至到後來星仔拍電影紅咗之後，呢對熒幕父子更加喺鏡頭外上演一場別開生面嘅上契，就係做後輩嘅星仔反過嚟做契爺，而做前輩嘅達叔反而係契仔，成為當時娛樂圈嘅一時佳話。
1988年周星馳喺李修賢他嘅提攜下演出電影《霹靂先鋒》，重因為呢套片而勇奪第25屆金馬獎嘅最佳男配角。1990年導演劉鎮偉趁住賭片風潮，請咗星仔同達叔搭檔演出《賭聖》一片，套戲只係食返賭片嗰條水加埋喜劇路線，開頭以為觀眾反應只會一般，但係估唔到最後個票房竟然高達41,326,156港元，大破當時嘅香港票房紀錄。1991年《逃學威龍》再次大破香港票房紀錄，周星馳同埋周潤發、成龍三個當時得令嘅電影演員俾人合稱做「雙周一成」。之後由星仔主演《家有囍事》、《審死官》重屢破票房紀錄。喺1992年，周星馳主演嘅幾部電影囊括香港票房排行榜嘅前5名，夠嗮風光。
九十年代中期，由於港產片嘅產量慢慢減少，周星馳電影嘅產量亦都受到影響，不過亦都標誌住星爺參與編導工作嘅開始。早喺1994年嘅《國產凌凌漆》，周星馳就初次有份以導演嘅名義出師；其後嘅《大內密探零零發》、《食神》、《喜劇之王》幾套戲，周星馳都有參與幕後編導嘅工作。1993年到1995年係星爺嘅全盛時期，不過到咗95年嘅《百變星君》、《回魂夜》就開始有走下坡嘅趨勢。直到2001年，周星馳首次全權執導嘅《少林足球》一出，喺香港嘅票房就已經高達60,739,847港元，又再次打破香港華語片紀錄。星爺重憑呢部片獲得第21屆香港電影金像獎最佳男主角、最佳導演、最佳影片等幾個大獎。
到咗2004年，周星馳身兼監製、導演、編劇同埋主演嘅《功夫》，再爆香港票房紀錄61,278,697港元，打破埋《少林足球》所創下嘅香港華語片票房紀錄。而周星馳因為呢部片而奪得第42屆金馬獎最佳導演、最佳劇情片等殊榮，重入圍第63屆電影金球獎嘅最佳外語片，真係可以講得上叫好又叫座。
影響
[編輯]周星馳響華人影壇係一個極具代表性嘅人物，原因係不少華人已經視「周星馳」等於係「喜劇」。佢嘅笑片好多人睇，係噉破票房紀錄，唔少香港人平時同人傾計嗰時，都不自覺用周星馳嘅對白，例如「你講嘢呀？」就出自周星馳嘅電影，意思係「你係咪喺度吹水？」
同時，周星馳嘅電影亦都令到喜劇成為繼動作片後香港嘅電影主流，後期片商開嘅戲，亦都多咗笑片。外地電影人一諗起港產片就諗到動作片同搞笑片，原因係港產片只有呢兩種戲先至真正影響全球。尤其係周星馳非常尊敬李小龍，所以佢嘅戲有唔少嘅鏡頭都係特別向李小龍致敬，例如安排某啲角色着李小龍式嘅衫，或者扮佢嘅武打動作。喺日本，除咗李小龍之類好受歡迎之外，自少林足球之後，周星馳嘅戲亦有好大嘅影響。喺嗰度甚至有位名作家將自己嘅筆名改做「馳星周」，以表示自己係周星馳嘅忠實Fan屎。
佢拍嘅戲除咗好多人買飛入場睇之外，重有學界專門研究佢嘅電影，重將周星馳定性為藝術家。由於佢喺咁多部戲入面都係以小人物由低做起，再加上佢自己低微嘅出身，所以唔少人都會當周星馳喺香港草根階層由低做起嘅表表者，亦有人將周星馳睇成香港精神嘅象徵。
演出作品
[編輯]- 1982年：天龍八部
- 1982年：430穿梭機
- 1983年：射鵰英雄傳
- 1988年：鬥氣一族
- 1989年：蓋世豪俠
- 1989年：他來自江湖
- 1990年：孖仔孖心肝
電影
[編輯]周星馳主演或者參與過嘅電影大概有50部。
- TBA年 : 功夫 2
- 2019年：新喜劇之王
- 2017年：西遊·伏妖篇
- 2016年：美人魚
- 2013年：西遊·降魔篇
- 2008年：長江7號
- 2004年：功夫
- 2001年：少林足球
- 1999年：喜劇之王、玻璃樽（客串）、千王之王2000
- 1998年：行運一條龍
- 1997年：97家有囍事、算死草
- 1996年：大內密探零零發、食神
- 1995年：西遊記第一百零一回之月光寶盒、西遊記大結局之仙履奇緣、回魂夜、百變星君
- 1994年：破壞之王、九品芝麻官、國產凌凌漆
- 1993年：逃學威龍3之龍過雞年、唐伯虎點秋香、濟公
- 1992年：漫畫威龍、家有囍事、逃學威龍2、審死官、鹿鼎記、鹿鼎記2之神龍教、武狀元蘇乞兒
- 1991年：整蠱專家、龍的傳人、賭霸、新精武門1991、逃學威龍、賭俠2之上海灘賭聖、情聖、豪門夜宴（客串）、非洲和尚（旁白）
- 1990年：望夫成龍、一本漫畫闖天涯、龍鳳茶樓、風雨同路、咖喱辣椒、小偷阿星、師兄撞鬼、賭聖、無敵幸運星、江湖最後一個大佬、賭俠
- 1989年：龍在天涯、義膽群英、流氓差婆
- 1988年：霹靂先鋒、捕風漢子、最佳女婿
得獎記錄
[編輯]- 2005年：台灣金馬獎：最佳導演《功夫》
- 2001年：香港電影金像獎：最佳導演、最佳男主角、傑出青年導演《少林足球》
- 2001年：香港金紫荊獎：最佳導演《少林足球》
- 1997年：香港金紫荊獎：最佳男主角《西遊記大結局之仙履奇緣》
- 1992年：亞太影展：最佳男主角《審死官》
- 1988年：台灣金馬獎：最佳男配角霹靂先鋒
經典對白
[編輯]- 砂煲咁大個嘅拳頭你見過未，連我自己都驚呀！
- 一支穿雲箭，千軍萬馬來相見！
- 註：因為好多套星爺嘅戲都有搵佢老友李健仁扮女人做「如花」，所以而家呢個名已經普遍成為醜樣嘅代名詞，重要通常係指女性。
- 甲：我未同你嗌交，你食我嘅住我嘅痾我嘅瞓我嘅，你重溝我啲女你係咪人嚟？ 乙：係佢話做雞做到悶，做到冇癮，我家下安慰佢啫，你都係雞，重係隻老雞添，有冇曾幾何時覺得空虛覺得寂寞覺得凍丫？／甲：有……關你咩事呀？ 乙：唔關我事？我做雞竇都想雞乸好，佢一冇心機就待慢啲客，啲客就會嬲，一嬲就唔嚟，唔嚟就執笠，執笠我就瞓街，你夠膽話唔關我事？／甲：你駁我咀？因住收尾嗰兩年！ 乙：收尾兩年同你執骨！／甲：因住生仔冇屎窟！ 乙：冇屎窟個仔係同你生嘅！／甲：我睇你惡得幾耐！ 乙：惡到你斷氣為止！／甲：我… 乙：你冇化妝好過化妝，做鬼好過做人！ ／甲：你… 乙：我做人夾到你抽筋 做鬼嚇到你失魂
- 呢段係包龍星練成鬥鬧交絕技之後，同龜婆鬥鬧嘅對白其中之一二。
- 皇帝將蘋果擺在官員頭上，要包龍星用飛刀掟蘋果時，包龍星：可唔可以蒙住眼？ 皇帝：莫非噉樣掟會準啲？ 包龍星：皆因我見到血會暈！
- 方唐鏡：打我阿笨﹗（包龍星即刻衝埋去打佢一身）
- 包龍星對大太監李連英講：你呀，檸檬頭，蝠鼠眼，秤鈎鼻，八字眉，葵扇耳，
哬哚 嘴，老薑牙，燈芯頸，鴛鴦膊，長短手，高矮腳，雞胸狗肚飯桶腰！我係你就死咗佢啦！叻到抆，除褲瞓，周身囉柚印，抵你插住碌棍咯！
- 包龍星對大太監李連英講：你老母湊大你咁辛苦你走去做太監就是為不孝，唔尊重老佛爺就是為不忠，你呢個不忠不孝嘅死人妖坐響度
䟴䟴 腳做咩呀！
- 常威：你條仆街跣我？包龍星：跣你咪跣你囉﹗
- 包龍星：我有今日都係多得皇上嘅提攜，我對佢都非常之掛念，好在我重收埋皇上呢條龍底橫，聞一聞格外醒神，索一索舒筋活絡，
𦧺 一𦧺唔會兩頭擺添！
- 9527
- 唐伯虎做書僮華安之前嘅僕人編號。
- 小李飛刀個老母，哦，原來係小李老母飛刀。
- 唐伯虎：燒雞翼，我鐘意食。
但係你老母講你就快釘 唐伯虎母：越係快釘之所以越要整多隻，如果而家唔食以後無機會再食。 你真係就快釘？唐伯虎：我真係就快釘！ 全部：如果而家唔食以後無機會再食。
- 註：呢段其實係一首歌嚟。
- 小強！小強你點呀小強？小強你唔可以死㗎小強！我同你相依為命、同甘共苦咗咁多年，一直當你係親生骨肉一樣供書教學，估唔到今日白頭人送黑頭人。
- 註：小強喺戲入面係一隻曱甴。
- 稟夫人，小人本住在蘇州嘅城邊，家中有屋又有田，生活樂無邊，點知個唐伯虎，佢橫蠻不憸點，勾結官府目無天，巧取豪奪我家田，我阿爺同佢翻面，慘被佢一棍來打扁，我阿嫲鬧佢欺善，更被佢捉了去唐府，強姦了一百遍，一百遍！最後重懸樑自盡慘無邊，佢還將我父子，逐出了家園，流浪到江邊，我為求養老父，袛有獨自行乞在廟前，點知個唐伯虎，佢實在太陰險，知道此情形，竟派人來暗算，把我父子狂毆在市前！小兒身壯健，殘命得留存，可憐老父魂歸天，此恨更難言，為求葬老父，唯有賣身為奴更作賤，我一面勤賺錢，一面讀書篇，發誓把功名盡顯，手刃仇人意志堅，從此【唐寅詩集】伴身邊，我銘記此仇不共戴天！
- 呢段係劇中唐伯虎以敲擊樂嚟表演嘅數白欖內容。
- 你老豆有身紀紀紀紀，恭喜恭喜
- （歌嚟嘅）
- 巴黎鐵塔反轉再反轉
- 無定向喪心病狂間歇性全身機能失調症，簡單啲嚟講即係腦震盪！
- 阿諾「豬」－－華生力「啤」
- 邊個淫蕩啊？你淫蕩！邊個淫蕩啊？我淫蕩！
- 我愛你
- 人生有個真正朋友的確好極！飲勝！
- 生仔好痛㗎
- 各位觀眾，五條煙！
- 你睇我唔到！你睇我唔到！總之你硬係睇我唔到！
- 昨日，我菲律賓工人行過街市，聽到有個賣魚佬講話有條友仔叫做賭神，係你。哈哈……我當堂嚇一跳，然後得啖笑。呢個世界，居然有人自稱為賭神，噉即係分明當我流唧！嗱！我就叫賭聖，你賭啤都要帶隱形液晶體眼鏡，我呀睬你都嘥氣，直情睇穿牌嘅，呢啲就叫特異功能。呢度有隻煙士，只要我輕輕一捽，就即刻變為一隻皺咗嘅煙士，因為我未發功呀嘛，發咗功變副麻雀出嚟都得。你話我講嘢無厘頭，我夠話你瞓醒戇㞗㞗咯。望咩呀？條氣唔順呀？發個輪嚟大家研究下。當然，你要補番一百幾廿萬過我就唔再講㗎啦。啤咩呀？學嘢唔使錢呀？抄低我聯絡電話係︰(香港)3345678，我再重覆一次係︰(香港)3345678。你唔搵我我無所謂，因為呢啲係你嘅損失。十點鐘後唔好打嚟，因為我瞓咗！
- 逝去感情如何留得住，半點痴情遺忘殊不易，更多悽悽慘慘的遭遇，我不知道，冚家剷！
- 註：呢段係香港女歌手徐小鳳當年名曲《變色感情》嘅歌詞，最尾改篇咗少少。
- 刀仔鋸大樹。
- 你吹得我脹咩？答：吹你唔脹
- 我講個幾多次用特異功能贏返嚟嘅錢只可以做善事唔可以使㗎嘛！答：我知，第一次就衰，第二次就仆街，第三次就冇命呀嘛！
- 有冇搞錯呀，成日揼男人底褲落嚟，屋企冇女人㗎？
- 大命大命！嗱係咪呀，我都話仆硬㗎啦，你依家信我啦！重未重未！做咩呀！仆街囉！唔係啩！
- 註：要用唔咸唔淡嘅普通話讀出嚟。
- 開心嘅時間過得特別快，又係時候講拜拜。
- 喺呢個 Moment，我要爆啦！
- 醬爆喺跳舞前嘅一句爆發性說話。適用於任何將要「爆」嘅情況，例如：發脾氣、起跑、去廁所……等。
- 「曾經，有一份好真誠嘅愛情擺喺我面前，但我無好好咁去珍惜，等到失去嘅時候先至後悔莫及，人世間最痛苦嘅事情莫過於此。如果上天能夠畀我一個重新嚟過嘅機會，我會同嗰個女仔講三個字：『我愛你』。如果係都要喺呢份愛加上一個期限，我希望係，一萬年。」
- 做咩呀？你愛呀？你愛要出聲先得㗎，你愛我畀你，你唔愛我當然唔會畀你啦！無理由你話愛我唔畀你，你唔愛我畀你㗎嘛！大家講道理丫嘛！嗱，我數三聲，你話愛唔愛喇喎。
- 你係葡提子？ ／唔係！我係菩提老祖！／咩唔提老母話？／你講粗口？我係菩提老祖化成抽葡提子嚟打救你㗎！嗰兩個係妖精嚟，唔信攞我塊照妖鏡去照就知啦！／我妖你老母塊鏡！撻咗我抽葡提子！噉我抽葡提子喺邊？／我咪你抽葡提子囉！／大聲啲！
- 世間上，人同妖都有阿媽生嘅，人嘅阿媽叫人阿媽，而妖嘅阿媽就叫妖阿媽。
- 唐僧（羅家英）唱：「Only you~ Can take me 取西經~ Only you~ 能殺妖精鬼怪~ Only you，能保護我，唔使俾~ 啲蚌精蟹精depp(食)我~ 只有你咁勁，就是only you~」
- 鹼水麵冇過冷河，所以成碗湯有鹼水味。魚蛋亦都冇魚味，但係你為咗掩飾，專登加啲咖喱汁將佢做成咖喱魚蛋，但係噉做太天真，因為你煮嘅時間唔夠，咖喱味根本只係喺表面，而冇入到裏面，掂到湯之後重要沖走埋。好好哋一粒咖喱魚蛋，俾你整到冇魚味亦都冇咖喱味，失敗！蘿蔔冇揀過，太多渣，失敗！啲豬皮又煮得太腍，冇咬口，失敗！啲豬紅
鬆婄婄 ，一夾就散，失敗中嘅失敗！最慘係啲大腸，入面都重未通乾淨，重有嚿屎，你有冇攪錯呀？喂！屎呀，屎呀喂！（跟住莫文蔚畀卷紙巾佢，話：攞去抿乾淨佢囉。）
- 佢高傲，但係宅心仁厚；佢低調，但係受萬人景仰；佢可以將神賜畀人嘅火運用得出神入化，做出堪稱火之藝術嘅超級菜式！究竟佢係神仙嘅化身，定抑或地獄嚟嘅使者？無人知，但係有一樣嘢可以肯定嘅，每個人都會畀一個稱號佢－食神！
- 俾你估到我重叫食神？！
- 爭咩呀？兩樣溝埋變做瀨尿牛丸啊～笨！
- 方丈份人好小氣！
- 整蠱道具：
- 無敵整蠱箱：收埋整蠱道具
- 誠實豆沙包：食咗會講真話
- 謊言豆沙包：食咗會講大話
- 遙控電流蕉：令對方拎兩隻蕉喺手，再經由遙控發出強勁電流
- 忌廉血滴子：忌廉血滴子會好似傳統血滴子一樣不停轉，但罩住敵人個頭，會放出過期忌廉！
- 慚愧波板糖：食咗會大聲噉講出自己以前所做嘅錯事
- 淫賤不能移：食咗之後會變得極度鹹濕
- 肌肉硬化針：打針之後肌肉會變硬
- 超級戇膠膠：會黐住地面動彈不得
- 霹靂金鋼拳：被打嘅人會遠遠噉彈開
- 紅粉迫擊炮：射出紅色粉末
- 我嘅真正身份係，改進社會風氣，風魔萬千少女，提高年青人嘅內涵，刺激電影市道，玉樹臨風嘅整蠱專家古晶，英文名叫Jing Koo。我根本唔係你個仔，我老豆叫古九寒，我老母叫吳係波，我係金默基高價請返嚟整蠱你兩仔爺令到你哋唔可以同程樂兒一齊嘅人。
- 喺古晶嘅公司內討論時：
- 古晶：我發過好毒嘅誓：呢世媾唔到女！
- 女（邱淑貞飾）：你媾唔到女，我咪畀你媾囉，如果唔係我一世都媾唔到仔囉，噉得未？
- 古晶：得！夠爽快！不過我重有一個要求﹗
- 女：乜野呀？
- 古晶：你可唔可以整整容先？
- 女：（一巴星落去）
- （*註：部分字眼可能會記錯）
- 呢支係倒後槍，一開就向後射㗎。呢支叫古惑的槍，佢會一次向前射一次向後射梅花間竹噉嚟㗎。
- 嗱！好似呢個Model F40噉，表面上，佢係一個大哥大電話，實際上，佢係一個鬚刨，方便我出席一啲宴會埸合，能夠神不知鬼不覺噉剃鬚…呢個鬚刨Model 911，表面上，係一個鬚刨，實際上，佢係一個風筒…（再指住第二個風筒）而呢個風筒只係表面嘅掩飾，事實上，佢亦係一個鬚刨，問你死未？
- 我費一生嘅精力，集合十種殺人武器於一身嘅︰超級武器霸王！！產品編號︰「攞你命３０００」，經已研究成功咗啦！西瓜刀、單車鏈、火藥、硫酸、毒藥、手槍、手榴彈、三角銼……每樣都係獨當一面嘅武器，家下集合埋一齊，問你死未？
- 註：所謂超級武器霸王，其實只係將以上嘅十大武器用禾稈草縛埋一齊。
- 唉，你噉樣「座」（做）係無用㗎，好似你呢啲咁「猝」（出）色嘅「難」（男）人，無論匿埋喺邊，都好似漆黑之中嘅螢火蟲一樣，咁鮮明，咁「猝」（出）眾。你憂鬱嘅眼神，唏噓嘅鬚根，神乎奇技嘅刀法，同埋嗰杯 Dry Martini……都已經將你深深噉「猝」（出）賣咗。雖然你係咁「猝」（出）色，但係行有行規，無論點，你都要找埋尋晚條過夜數，叫雞唔使畀錢呀！？
- 好靚表姐對凌凌漆講。
- DRY MARTINI 唔該。望咩唧攞過杯嚟啦，望喎，離嗮譜嘅你呢啲，望喎，真係。
- 喼神！
- 周星星遙距作弊
- 星：即刻話我知呢啲係咩嚟！ 細龜：港幣！ 星：我夠知囉！ 細龜：知你又問？
- 星：你哋最叻係咩嘢？ 細龜 另一位同學：溝女！
- 星：溝女係為咗咩呀？ 玩吖嘛！
《回魂夜 (1995年電影)》
[編輯]商場間精品店十點關門，佢哋習慣朝早至少存啲錢入銀行嘅，噉我哋一於聽晚去爆佢格，Yeah！唔好！格離花店好啲。點解呀？花店條女個波好大㗎，姦佢！妖！點解成世人都係噉㗎你？聽晚爆佢格。爆完格，再姦佢？爆完格咪有錢咯，有錢咪去叫雞囉，做人有啲原則好唔好？叫完雞，再姦佢。哦～～～
- Leon：我要個豉汁蒸橙。啊，要多個椒絲腐乳西瓜，少辣好啦。
- Leon：捉鬼用保鮮紙，打鬼用朱古力。
- Leon：保鮮紙含有一種硝酸氧化硫，可以將鬼嘅能量分子包住。
參考
[編輯]- ↑ 〈周星驰价值之炸、榨、诈-周星驰宁波"祭祖"记〉。《新浪娱乐'周星驰宁波寻根之旅专题'——轉自外滩画报》。2005-04-20。原先內容歸檔喺2005-04-22。喺2021-03-07搵到。
出面網頁
[編輯]
- 星樂園-周星馳台灣忠實Fans論壇
- 星星幫-周星馳國際影友會台灣分會
- 周星馳喺香港影庫嘅資料（香港繁體）
- 周星馳喺互聯網電影資料庫嘅資料（英文）
- 周星馳 at AllMovie
- 周星馳喺爛番茄嘅資料（英文）
- 周星馳喺中文電影資料庫嘅資料
- 周星馳喺豆瓣電影嘅資料（簡體中文）
- 周星馳喺時光網嘅資料（大陸簡體）
- 風雪中的故居／周星馳，好一個香港影壇神話！
- 風雪中的故居／《功夫》，周星馳的「真功夫」？