久子

  呢篇文章講嘅係日本憲仁親王妃久子。想搵其他都叫久子嘅人，請睇「久子 (搞清楚)」。

久子響加拿大訪問

響2013年高圓宮杯U-18足球聯賽入面，久子親自頒獎。最左手面個嗰就係久子。

憲仁親王妃 久子（日文：のりひとしんのうひ ひさこ ^{Norihito Shinnō Hisako} 、1953年7月10號—）係高圓宮憲仁親王老婆，原名鳥取久子（日文：とっとりひさこ^{Tottori Hisako}），尊稱係「憲仁親王妃久子殿下」，高圓宮現任當主。

佢同今上皇后雅子關係幾好。

經歷

佢出身於名門望族，老豆係日本出名生意人鳥取滋治郎，太爺係日本華族子爵兼軍人曾我祐邦，而鳥取家族重係響香川縣三豐郡嘅有錢世家。響聖心女子學院初等科同埋中等科畢業之後，因為當時重係響三井物產打工嘅老豆畀人調職去英國，所以佢跟住老豆一齊去，佢重響劍橋大學格頓學院讀考古學、人類學同埋中國學，響1975年畢業，之後返嚟日本嘅翻譯社到打工。之後佢為咗讀法律而再次出國（亞伯達大學同埋愛德華王子島大學），攞到法學博士名譽學位，響1982年返翻日本。聽講話佢講出嚟嘅英文係完全冇日本人口音。

響第三十一次國際亞洲・北非人文科學會議入面，佢做咗嗰個會議嘅總裁三笠宮崇仁親王嘅翻譯助理。而佢響卡片上面就用咗假名「鳥取恆久子」，聽講話係因為佢覺得自己個名「鳥取久子」讀起上嚟唔係幾好聽。

響1984年，佢加拿大大使館搞嘅歡迎會上面見到細自己一歲嘅憲仁。同年五月，崇仁問佢「你對我個仔憲仁有冇好感？」。響同月二十號，憲仁用英文「Will you marry me?」向佢求婚，而佢就用返英文答「Yes」。同年九月，行皇室納采儀式（日文：納采の儀），重響同年十二月結婚。兩個人生咗三個女，分別係承子女王、千家典子同埋守谷絢子。

響2002年，老公憲仁突然死咗。之後，佢接任高圓宮當主一職，後嚟佢重接任咗部分憲仁生前做過嘅公務。