丙型肝炎

Hepatitis C
分類同外部資源
ICD-10	B17.1, B18.2
ICD-9	070.4, 070.5
OMIM	609532
疾病DB	5783
MedlinePlus	000284
eMedicine	med/993
醫學主題詞	D006526
Patient UK	丙型肝炎

丙型肝炎（粵讀：bing² jing⁴ gon¹ jim⁴，簡稱：丙肝，英文：Hepatitis C）係一種由C型肝炎病毒（hepatitis C virus）所引起嘅病毒性肝炎，嚴重時會導致肝癌。

病原體

丙型肝炎病毒簡稱為HCV，喺病毒分類上屬於正鏈RNA病毒，早期被認為係造成非A非B病毒型肝炎（non-A, non-B viral hepatitis）嘅主要致病因子之一。於1978年被發現，1989年通過基因技術首次獲得基因組序列。佢係一種45納米大、有外殼、單鏈核糖核酸嘅病毒，屬於黃病毒科中嘅肝炎病毒屬。根據1994年新建立嘅分類系統，HCV可分成六種唔同嘅屬型（Genotype）同30種亞型（subtype）。喺歐美同日本主要係第一型為主、第二型以日本、中國居多、第三型喺泰國、新加坡、同部份嘅印度較常見、喺埃及、中東同非洲中部主要係第四型，而第五型同第六型就喺南非同東南亞常見啲。丙型肝炎淨係會感染人同埋猩猩。

傳播途徑

C型肝炎喺美國嘅感染途徑——60%注射毒品；15%性行為；10%輸血（篩檢前）；5 %其它（母子垂直感染、血液透析、醫療照護等）；10%未知

傳播嘅途徑為腸胃道外傳播（parenteral transmission），同B肝類似，而最主要嘅傳播途徑係血液同體液。有施打藥物或者毒品習慣嘅人（如共用針頭）通常係得到C肝嘅高危險群，大約70%嘅感染者都有注射毒品嘅習慣。使用唔乾淨嘅器械紋身或者穿窿亦係危險因素。隨住血液檢測進步，開發中國家而家喺輸血後感染HCV嘅風險經已大大降低咗。另外喺美國嘅一項統計結果顯示，輸血者嘅血液喺通過所有血液檢查之後，感染HCV嘅機率係103000分之一。除咗血液傳染之外，HCV亦可能會經由性行為同埋垂直傳染嚟傳播，喺HCV感染者嘅精液同陰道嘅分泌物入面可以檢測到HCV病毒，目前亦有一啲報告經已顯示性行為係可以傳播HCV嘅。另外HCV垂直傳染（通過母親傳染畀未出世嘅嬰兒）嘅機會亦係非常低，大約佔0%到12%左右。至今為止仍然有高達40%嘅感染者係由於不明原因而感染，所以似乎重有未知嘅傳染途徑存在。

分佈

估計目前全世界有1.7億攜帶病毒者或者患病者。

診斷

診斷方法係喺唔係由於酗酒導致嘅唔正常嘅肝功能嘅情況下通過蛋白質轉漬法驗證針對丙型肝炎病毒嘅抗體以及通過聚合酶鏈鎖反應驗證病毒嘅核糖核酸。假如只能驗證抗體而喺三個月內持續唔可以驗證病毒，就可以確定病人曾經被感染。目前只有通過活檢嘅方法來確定病況（對肝臟嘅損壞情況）。同其它病毒性肝炎唔同嘅係轉氨酶值無法用來判定病況。

疾病進程

急性C型肝炎

感染之後6到12個禮拜，少部份人會產生急性C型肝炎，其中25%嘅人會出現一啲輕微唔特別嘅症狀，包括鬱悶、食慾唔振、噁心等症狀，有時重會出現比較獨特嘅症狀，例如黃疸、脂肪痢，以及血清中ALT指數嘅升高。剩低75%嘅人，基本上都冇任何症狀嘅出現，另外感染HCV可能會產生急性猛爆性肝炎，但係機率係非常低嘅。

慢性C型肝炎

大多數感染HCV嘅人通常會轉變成慢性肝病，除非到咗末期，慢性C型肝炎通常係冇任何症狀嘅，ALT嘅指數亦通常係正常或只有輕微嘅升高，不過大多數嘅人肝臟組織經已有異常病變。喺1/4嘅情況下病人喺之後20年嘅病情逐漸惡化，導致肝硬化（hepatic cirrhosis），此外肝細胞癌（hepatocellular carcinoma）嘅可能性提高。

肝外病變

感染咗HCV之後除咗會影響肝臟之外，重會引起好多組織同器官嘅病變。最常見嘅病變係混合性冷凝球蛋白血症（essential mixed cryoglobulinemia），佢會同時出現紫斑症、虛弱、關節疼痛呢三種典型症狀。其它常出現嘅病變重有非何杰金氏淋巴瘤（non-Hodgkin's b-cell lymphoma）以及膜性增生性腎絲球腎炎（membranoproliferative glomerulonephritis）。出現喺皮膚上嘅病變係遲發性皮膚紫質症（porphyria cutanea tarda），典型皮膚症狀係皮膚易脆，而且喺日光曝曬部位，例如面、四肢、手背易有水泡、紅斑產生。

治療

目前（2004年）嘅治療方法係持續24至48週對病人混合使用PEGα干擾素同抗病毒藥利巴韋林（Ribavirin）。根據病人病毒屬型嘅唔同，治愈率係喺50%至80%之間。但係干擾素療法有好多副作用，尤其係對病人嘅心理有不良影響，可能會產生暴躁、憂鬱同恐懼等嘅心理狀態。影響治愈率嘅因素除咗病毒屬型之外，重有病人嘅年齡、性別、體重、病毒載量、患病時間同病毒對肝臟產生咗嘅破壞程度。

預防

到而家都冇有效針對丙型肝炎嘅免疫，唯一嘅預防措施係防止血液接觸。目前亦冇疫苗或者預防性治療，不過如果病毒喺被感染後半年內能夠被發現嘅話，一次24周長嘅干擾素療法可以喺90%嘅情況下喺疾病進入慢性前醫好丙型肝炎。

出面網頁

• 微生物免疫學-Flaviviridae(黃病毒科)