Den dorden brieve van Jewannes

Den dorden brieve van Jewannes is een Biebelboek uut 't Nieuwe Testamant. Ieronger wor 't ele boek in 't Zeêuws weer'egeve:

Hoôfstuk 1

1 Van den oudsten, an m’n lieve broer Gajus, dì a ‘k stik vee van ouwe. 2 Lieve broer, ik ope a ’t aol goed mie je gìt en da je in goeie gezond’eid bin. Da je ziele d’r goed voorstìt, dat weet ik a. 3 Wan d’r komme ier geregeld broeders die a vertelle da je trouw bin an de waer’eid en ik bin blieë om dat te ôren. Ze zeie da je de weg van de waer’eid volgt. 4 En d’r is niks dat a me blieër kan maeke as a’k ôre da m’n guus de weg van de waer’eid volge. 5 Lieve broer, da je trouw bin, dat bliekt wè uut aolles dat a je doet voe de broeders, ok a ken je ze glad nie. 6 Wan ze è ier in de gemeênte verteld over joe liefde. Ik ope da je zò goed wil weze om ze ’t nôdige mee te geven voe de rest van de reize, op een maniere die a God waerdig is. 7 Ze bin d’r ommers uut naem van God opuut’etrokke en ze è niks an’epakt van lui die a nie gelôve. 8 Je mò die mensen goed ontvange en zurge da ze niks tekort komme en zòdoende elp je mee om de waer’eid uut te draegen. 9 Ik è de gemeênte eschreve. Mae Diotrefes, die a dì de baes wil spele, die trok z’n eigen niks van ôns an. 10 A’k komme, dan za ‘k ’t zeker over z’n doen en laeten è. Die veint doe niks as ôns zwart maeke. En da’s nog nie aolles, é. Broeders wil t´n nie ontvange en mensen die a dat wè doe, die jaeg t´n wig uut de gemeênte. 11 Beste broer, je mò ´t goeie doe en ´t kwaeie mò je laete. Die a ´t goeie doet, dat is t´r eên van God. En die a slechte diengen doet, die trok z´n eigen niks van God an. 12 Over Demetrius oôr je alleênig mae goeie diengen, ok wat a de waer´eid anbelangt. Ôns kunne ok niks as goeds over z´n vertelle en je weet da ôns de waer´eid zegge. 13 Ik è nog vee te vertellen, mae ik wil ´t nie zwart op wit zette. 14 Ik ope julder gauw wee te zien en dan ku me mie mekare prate. 15 Ik wense julder vrede. Je ei de groeten van de vrienden die a ier bin en doe ze bie julder ok aol de groeten.

Externe verwiezing

3 Jewannes, NBV21

Bronne

Zeêuwse biebelvertaelgroep Ellesdiek