Atterbury Trust

Die seisoen het gedraai en met dié verandering word ons elkeen opnuut aan die grootsheid van die skepping herinner. Winter se bekoring lê opgesluit in die sikliese aard van die natuur en só ook die lewe – die goeie en die slegte wat daarmee gepaard gaan. Vir die natuur is dit ʼn tyd van rus, terwyl ons die tyd gegun word om bestekopname te neem en te besin oor die ryke verbondenheid wat ons menswees inkleur. In ʼn veranderende wêreld waar mense dikwels onder druk verkeer om slegs vir hulself as individue te lewe, vier Akademia mooi vanjaar die tema van verbondenheid. Hierdie viering plaas opnuut die fokus op verbande soos die gesin, die Afrikaanse taal- en kultuurgemeenskappe, die Christelike en klassieke universiteitswese, en ook ons gewaardeerde alumni. Die aard en omvang van verbondenheid word mooi in die Bybel verduidelik. In Kolossense 2: 6-12 sluit die Here met elkeen ʼn verbond wat Hom as Saligmaker en Verlosser aanneem. Gevolglik moedig Hy (die Here) ons aan om in verbondenheid met Hom te lewe, in Hom gewortel te wees, op Hom te bou en vas in geloof, met dankbaarheid, te leef. As alumni staan julle in ʼn verbondenheidsverhouding met julle alma mater. Ons is trots op elkeen van ons afgestudeerde Fonties en wil julle graag uitdaag om aktief betrokke te bly en te wees en só julle unieke “Fontie-teit” te omhels. Hierdie wederkerige verbondenheid bied aan julle opwindende geleenthede tot verdere studiegeleenthede, betekenisvolle netwerkgeleenthede, gehalte voortgesette leeropsies en die geleentheid om as verskilmakers in die gemeenskap na vore te tree. In hierdie nuwe seisoen, waar julle van studente na alumni gegroei het, wil ons julle aanmoedig om geleenthede aan te gryp en as trotse Akademia-ambassadeurs voort te bou op dié gees van verbondenheid. Een van die maniere waarop hierdie verbintenis versterk en uitgebou kan word, is deur wedersydse kommunikasie. Ons nooi julle daarom om julle suksesverhale met ons te deel en ons op hoogte te hou van hoe julle loopbaanreis en -ervaring daarvan uitsien. Hierdie meelewing dien as brandhout wat die pad vir nuwe generasies van Fonties sal verlig. Maak daarom seker dat julle kontakbesonderhede gereeld op die alumnidatabasis bygewerk word. Dit is voorts ons wens en bede dat julle ook in diepe verbondenheid met jul onderskeie gemeenskappe sal tree. Wees die verskil daar waar jy woon en werk. Ploeg terug, steek ʼn hand van bereidwilligheid op en raak besig met dinge wat ʼn ewigheidswaarde het – óf dit nou in jou gesin, gemeente, vriendekring of beroepsveld is. Tree na vore met kennis en bied aan ander ʼn belewenis van die goeie, die skone en die ware. Akademia-groete Mareli Swanepoel