وعصفت بنا الاقدار

وعصفت بنا الاقدار... البارت الثامن والثلاثون
للكاتبه زهراء ( روزايه)...

عاذرك من تسـأل
‏شغيرني هِيچ !
‏ما تـدري شتحس داخلك
‏مـن تنغلب !
‏لمن يگودون گـاعك للـغريب
‏و انتَ لسـهـ بعينك تـراب الـحرب
.....

قبل شهر ....

فجر... شيخ ياسين جان هوايه يجينه مرات السبع
موجود ومرات بالشغل دائما يحجي ويه ضرغام
لو ويه جراح وكانو اكو مشكله..

بيوم منهن طلعت اقره اني وعقيق بره
اخذنه فراش وكعدنه بالمنور محد يشوفنه
عفنه الباب اليطلع ع الحديقه مفتوح..

بيومهه سمعنه كل كلامهم ضرغام وياسين وجراح
والمشكله جبيره ومالهه حل شيخ ياسين يكلهم
لو اعرف الخاين البيناتنه ارتاح...

ضرغام.. الخاين منك وبيك واكيد اكو واحد
من جهتنه مساعده
جراح.. فهموني السالفه ياخاين تحجون عنه؟؟

ياسين.. من اليوم دخلت ام شهد دخيله عدنه
وانه للصبح انطر وحته ازلامي ماتنام كمت مااعرف
منين اتلگه المشاكل

انخطفت مرت السبع من نص دارنه وهاي
مااغفرهه لروحي شلون ماحميتهه علما يطلع
رجلهه

ووراهه كام حلالنه ينباگ خساره جبيره
نكعد الصبح يجوني الازلام يكلولي كل 50
راس سوه ينباگن وكول وزعنه زلمنه وبعد ماصار بوگ

كل حجينه واسرارنه جاي توصل لجبار
راح اموت يابويه منو اليوصل الحجي اله
حته سالفه حسام اخو ام سيف واصله
وحته سالفه ابوجهال من انطيت كلمه ومارجعتهم
الهه واخذهم ابوهم

الحجي موبس يم جبار حته يم شيوخنه واهلنه
بالناصريه يوميه واحد مخابرني يعتب شلون
اريدن اطعن جبار بظهره معناتهه خاين وبنصنه

حجينه انه والسبع وضرغام يوصل بالتفصيل
كمت ماامن ع داري ومااكدر اطلع لاينغدرون
غدرة فاضل..

هذا كله نكدر نعبره بس الماكدرت اعبره
واتضحلي اكو خاين يلعب علينه سالفه ثار
اخوي ...

صار سنتين ماتهمت احد وانه متاكد
جبار وخله زلمه من ازلامه يشيل القضيه
وراحت بدون دليل وظل دم اخوي بالكاع...

ماكعدت لا انه ولا السبع ودفعنه فلوس حته
نحجي ويه الشال القضيه وبعد اشهر وفلوس
وضمن حق عائلته يله اعترف وكال مااحجي كدام
العداله بس الكم هو جبار الكتل وهددني بعائلتي
وشلتهه عن لا يكتل جهالي ...

هذا الحجي وصل لجبار كلشي يمه هاي
الابره اذا وكعت بمضيفي هو يدري بيهه
وحته الواحد مايكدر يفتح القضيه بعد
المتهم كال انه محكوم محكوم اخاف ع عائلتي
ومستعد يشهد باطل ويبري جبار...

جراح.. منو الخاين بنصنه؟ الحجي البينك وبين
السبع منو يوصله بس  المنه وبينه ترى جبار نعرفه
موساكت معناتهه تاب لو خاف لا يحضر مكيده جديده

فجر.. جنه نسمع كلامهم ونقاشهم وانطبع براسي
كلمه خاين منو الجاي يسوي بيهم هيج وره يومين
كالو انباك حلال القصر وياسين يصيح انباگ حلالي
اكثر من مره..

بوقتهه اني وعقيق كملنه قرايه وحته ماسولفت
لاحد لان هاي امور خاصه بيهم وسوالف زلم
واكيد هسه يكشفوا ...

بس ماتوقعت اني راح اوكع بهيج موقف
همزين جانت اضويه مفتوحه واكدر اشوف واميز
انذهل من شافني وجه سلاحه عليه وهو يتلفت

استغليت خوفه يريد يحجي مايكدر يريد
يبرر ولو بكلمه ماكدر صرخت بصوت عالي
ارتبك ظليت اعيط وهو لف شماغه وركض
من جهه الحديقه...

صح لحظات خوف وارتباك بس ماجنت احس
ع نفسي مجرد بداخلي قوه اريد اكشفه وكدرت
اعرفه منو الضحك عليهم طول هاي المده..

دائما انكول موكل اصابيعنه سوه وهالشي
اثبت اليوم الشيخ ياسين رجال والنعم منه
بس اخو طه هو الخاين هو الجاي يطعن
ظهر اخو بخنجر اعمه ...

اعرفه كلش زين طه زوج ام علي الساعدت بخطف
عقيق كالو هجر مرته بس بعد الشفته مستحيل
اذا ماطلعت وره هالشي يمكن طمع بالشيخه من
اخو ويمكن جبار مهدده بشي؟؟

هنا بالقريه شفت اخوان يوسف الحقيقين
شفت جبار الغدر باخو الجبير وعائلته
وشفت طه الطعن ياسين من ظهره وراح يسحب
الشيخه منه..

ليوين وصل دنائه بني ادم الله شيشوف جواه
من قتل وظلم والاخ يغدر باخو ويبوگ حلاله وتعبه

اخوهم الصغير انقتل وهو شاب ويكولون التؤام
مال طه يعني حته ماانقهر ومافكر ياخذ بثاره
وهو جاي يساعد جبار ع حساب اخو ياسين..

طلع السبع يركض وضرغام وبعد زلم ماعرفهم
صوتي جان عالي واني اصيح الحكولي لاول
مره السبع يلمسني لزمني من اكتافي يهز بيه
ويصيح شبيج شبيج فجر..

اشرت عكس الاتجاه الركض بي لان شفت جبار
واكف كتلهم طلعت اريد اروح لماما وواحد لزمني
وعطت وهو انهزم..

جنت احجي وعيني ع جبار وردة فعله ممثل بارع
الى درجه مجرم قاتل مأجور صاح ع عاصم
وعباس طلعوا من جوه الكاع منو التعده ع حرمة
القصر...

اخذني السبع للغرفه لكيت البنات ميتات خوف ع الصوت
نسوان محد طلعت لان المضيف يصير بعيد عن داخل
القصر بس زلم هواي طشت بالطرمه وكلمن يكول
وكت حرامي بهيج وضع...

ماسولفت لاحد ابد اكتفيت بداخلي اريد
الله هو اليدليني ع الطريق الصحيح
وهو ينطيني اشاره احجي بيهه..

اصريت ع نفس الكلام حرامي يريد يبوك
القناني ومن شافني انهزم السبع وضرغام ماعبرت
عليهم بس ماحجوا كدام الموجودين..

اجت ماما نامت يمنه وكلما اغمض عيني
يجي شكله ابراسي وخوفه وارتباكه
وشلون انصدم حته مايعرف شيسوي..

من الصبح فزينه ع صوت صياح النسوان
والمله ماما كعدت راحت يمهن واحنه غسلنه
وكعدنه بس ابالي سالفه ويمكن انفذهه لو
تعتبر مجازفه...

اجت نور جابت ريوك تريكنه ولبابه كالت
نروح جوه شعدنه هنا هي هم بيبيتنه ع الاقل
بس نوكف يمهم..

عفنه جهال رانيا يم عقيق لان السبع ماقبل
تطلع كالهه هوسه وصياح اكعدي بغرفتج
واسكتي..

لبابه.. هوايه وجوه جديده بس احنه
نحاول نساعد ولو بشي قليل بس محد
رايدنه ولاواحد حاب وجودنه ...

اجت خديجه كالت لبابه صبي جاي
ايدي كلهه عجين كمت اصب جاي ويجون
ياخذونه لو نور اطب توزعه للنسوان..

نور.. انتن شبيجن تايهات عوفن المطبخ الزمن
شغله سهله تعالن بغرفة الحجيه سون خضره
احسن الجن..

لبابه.. رحنه بغرفة الحجي اني ورانيا فجر
رجعت يم عقيق اكو نسوان هواي كعدنه
نشتغل وياهن جانت وحده جنهه مدرعه نايمه
وعينهه علينه..

حجت وهي مصفطه اديهه جوه خدهه كالت هذني
منين ؟ جاوبتهه وحده بعدين عرفتهه بنت ام جاسم
كالت هاي لبابه خطيبه جراح وهاي رانيا خطيبه
ضرغام..

كامت عدلت روحهه فتحت شيلتهه وعدلتهه
وكالت وينهه خطيبه ضرغام اشرتلهه ع رانيا..

ظلت تباوع لرانيا وتخزر بيهه بس رانيا
ملتهيه شويه واجت وحده بعمر رانيا
كعدت يم هاي المدرعه وتبسبس حجي

مانحسهه غير بصوت عالي وهي توجه كلامهه
لبنت ام جاسم ماكو نسوان حته مخليات
الغربه تشتغل ويصولن ويجولن..

ردت عليهه منين غربه ترى الهن حصه
بالگصر ياغربه
... كومن كومن وسحبتت الخضره من
رانيا ودفعتهه بس اني عافتني

حجت رانيا ااااوي شبيج ماعندج ذوق
ليش دفعتيني ؟

... شوفن هاي شتلغي خايبه كومي لاأكوم
افعصج هسه
رانيا.. انتي منو؟ وشبيج معصبه عليه

لبابه.. بسرعه طبت نور وماخلت رانيا تحجي طلعتنه
وهي دكول عوفنهه هاي من البارحه واليوم طاكه
قهر..

رجعنه لغرفه عقيق والله موشكول واحد يساعدهن
عبالنه اواودم طلعو زلم ونسوان مجلوبين

نور.. هاي بنت نوفه تصير بنت خاله ضرغام
جانت گبل تريد ضرغام واتزوج  وماتت قهر ورادت تنتحر وزوجتهه امهه بسرعه  ومن ماتت مرت ضرغام كامت تسوي مشاكل ويه رجلهه تريد تطلك حته ياخذهه وهسه من سمعت
خطب غريبه من البارحه لسه هي ميته قهر...

رانيا... عابتلهه لعد هيج تصرف اسمكم شيوخ كل
اصول ماعدكم ماعداج طبعا..

نور.. چااا غير البارحه هيجت نوفه دكلهه شنو
مايشتغلن ورادن يجن عليجن وكتلهن السبع
كال ممنوع يشتغلن يله سكتت

هن هذني هيج حته جناينهن يصيحن الغوث
منهن والله من يجن يمنه حته انه يلوحني
طشار منهن ..

لبابه.. شنو من ناس شنو من بيئه ناس تتقدم
وهذوله يردون ليوره باوعت من البرده
الشباك ع البستان اكو سيارات هواي فاتحه جبيره

بس الجو مغيم حته اضويه مفتوحه عبالك
ظلمت وهي الساعه ب12 كاموا يصبون غده
وتغدينه واحنه تعبنه من الكعده كلما نكول رجعونه
مايقبلون يكولون محد يمجن ...

الجو بارد ومال نوم فرشنه ونمنه وفجر ظلت
كاعده كالت مانعسانه بس ماندري اكو غايه
براسهه...

فجر..الساعه ب2 الظهر طلعت من الغرفه افتريت
من الجهه الثانيه وطلعت من الباب اليصير
مقابيل بيت الشيخ ياسين ...

وصلت لحل اذا حجيت للسبع ماراح يسكت
وراح يرجع من جديد ع جبار وهالمره طه بالنص
يعني يخرب ويه الشيخ ياسين وخاف تصير وحده
من عدنه ضحيه مثل عقيق ولا اتحمل فكره السبع
هم يقتل ويفوت سجن..

من اطلع من القصر يصير كدامي بستان ياسين
طريق مباشر يوصلنه للمضيف حته اذا شفت
طه هناك المهم اشرح للشيخ ياسين حته يسد
السالفه قبل لاتوصل للسبع..

مامشيت وحدي ولا اتخدت قرار بدون تفكير
اني اؤمن باحساسي وجان احساسي يدفعني
حته اروح للشيخ واحجيله بالشفته وافتهم
طه شعنده بالقصر وشلون دخل وهم عداوه...

الجو حيل مغيم بسرعه كامت ترعد وعبالك
الصواعق توكع قريب سرعت خطواتي امشي
شفت من بعيد اكو غنم يرعون بيهه بس مأمنه
لان السيارات هواي وناس بالقصر مايصير شي..

كامت تمطر موبانصاف اريد اشيل رجلي من الكاع
تلزك الثانيه بالطين وكفت بصف نخله ومااكدر
احمي راسي من المطر لو ملابسي تنكعت وصارت
ثگيله ..

انسب حل انزع نعالي واركض هو المعرقل حركتي
نزعته وشلته بيدي وكمت اركض رجليه تغوص
بالطين وكلساع اريد اوكع ع وجهي ابد موخوش
سالفه بس اريد اوصل صاروا شبعدهم..

دخلت ببستانهم يفصل بينهم وبين بستان جبار
نخل صغار كمت امشي باتجاه المضيف بس
بستان ياسين بي اشجار هواي حته زيتون
وليمون موبس نخل..

المشكله هبت الريحه تخبل لو لابسه ملابس
هواي اله اظل افتر جوه المطر واشتم هذا العطر
الطيب..

رفعت راسي ليفوك وايدي ع عيوني وعبالك
كالت اوكفيلي شعندج طالعه المطر احسه يزرف
راسي من كدما قوي ..

نزلت نعالي لبسته رجلي ماتفوت من كدما
تشبعت طين شلون حاله لو يدري بيه السبع
لو ماما يطيحون حظي ...

لمت نفسي هذا احساسي دمرني امشي وراه
وتاليتي ماادري وين بلحظه فكرت عود ليش
ماخابرت الشيخ ياسين واني بالقصر واحجيله
شكو صرت مغامره واجيت..

بوسط اللوم وتفكيري فززني صوت من وراي
وهو يكول شعندج هنااا عرفته من صوته
اواااب...

التفتت واني لازكه بالطين بس محور جسمي
يفتر رجليه ماتفتر وملابسي كلهه منكعه الحجاب
مصفوط ع راسي وينكط مي منظر كسيف..

هو لابس قمصله نيلي نفخ وبيهه خطوط
بيض من اكتافهه ولابس كلاو براسه هم نيلي
وشايل اسلاح صيد بيده ...

اواب.. تقرب عليه وكال شتسوين؟ وشجابج
وحدج وين امج ؟
فجر.. وحدي محد يدغي اغيد الشيخ
اواب.. بنص المطر حبكت اله هسه

فجر.. مستعجله اغيده بشغله
اواب..شوفي حالج منكعه والدنيا تمطر والجو اظلم
زلم ماتطلع انتي وين تردين؟

فجر.. اغيد الشيخ.. باوعلي وهز راسه ماقابل
نزع القمصله مالته لابس جواهه جاكيت شتوي
خلاهه ع اكتافي وكال البسيهه ..

نزع الكلاو وفرك شعره مهوس وكال اخذي
نزعي حجابج والبسي لاتتمرضين وامشي
اخذج لابوي وراج طلابه...

فجر.. لبستهن شكبرهه القمصله ضعت بيهه
نزعت حجابي وهو يمشي كدامي لبست الكلاو
وشالي شمرته بعد مايفيد ينكط وراي..

وصلنه للمضيف اكو صحيات كال غسلي
غسلت رجليه واديه وهو واكفلي بره محد اكو
بره فتح باب المضيف وكال فوتي اكعدي
خلي اصيح ابوي..

ركضت يم الصوبه دافي المضيف ميته برد
اعظامي تصل ظليت ادفه شويه واجه الشيخ
مفزوع واواب وياه ..

الشيخ.. شبيج بويه شجابج؟وين السبع وطلعتي
وحدج!!
فجر.. كمت احجيله بالتفصيل وهو يشب وينطفي
واواب يلزمه كام وصاح اليوم اكتله بيدي ومنعه اواب..

ظل يفرك بكلبه وساعه بوجهه وهو يكول استغفر
الله واتوب اليه حجه وهو يطمني لاتحجين بويه
بين مايهدء السبع هسه حزين ع الحجيه..

كوم اواب بويه اخذ البت الدنيا وكفت
وكون محد يشوفهه كمت واني مطمئنه يحلهه
رجعت بنفس الطريق واواب كدامي لابس قمصله سوده
هذا شكد عنده وكلهن حلوات ..

وصلني قريب وكال روحي بس لتحجين لاحد
مشيت والتفت اشوفه واكف لحدما دخلت للقصر
وهو واكف يباوع ..

طبيت من وره الغرفه سمعت حركه وصوت ظليت
واكفه لحدماصار هدوء طلعت بعدني هستوني
افتح الباب وايد شالتني من القمصله ليفوك
وهو يكلي وين وليتي؟؟

فجر.. يمه كلبي شبيك ضغغام
ضرغام.. وووجع وين جنتي ومنيلج هاي القمصله
وهذا الي على راسج وين جنتي فجرررر؟

فجر.. هسه اكلك وين بس لحد يشوفنه
ضرغام.. فوتي جوه من اصيحج تعاي
فجر.. شراح يخلصني منه محد يفلت من مراقبته..

طبيت كلهن نايمات بسابع نومه بدلت يم راسهن
وطلعت غسلتهن وشريتهن شويه واندك الباب
بالسويج عرفته اللحوح مايسكت اله يعرف..

طلعت بره حاجيته بسرعه كال بدون مقدمات
وين جنتي؟ القمصله المن؟ والبارحه اشفتي؟
ولادكولين حرامي ماتعبر عليه..

فجر..شجاك انطيني مجال اخذت نفس وحجيتله
بس حلفته بجهاله مايحجي اشوف عيونه
تروح يمنه يسره من التفكير ..

ضرغام..انتي متاكده؟
فجر... اي بس ماادري السويته صح من ماحجيت
ورحت لياسين!؟
ضرغام.. صح صح وهز راسه وكال طبي ولاتحجين
للسبع هسه ..

رانيا... صار الليل واجت ماما تعبانه كلنه مكدسين
بغرفه السبع وهو يدك الباب ع شي مايفوت
تنطي عقيق ويروح...

تليفوني العب بي حيه اجتني رساله مكتوب
شلونهه الانثى؟

ضحكت ولا نساهه شلون جان مستفز
وع كولته ساقط من الشوارع كتبتله زينه
وانت؟

ضرغام.. الحمدلله كومي اطلعي واكفلج بالباب
رانيا.. لبست حجابي وطلعت محد اكو بس جراح
بعيد واكف يدخن ...

ضرغام.. البارحه التهيت واجيت متاخر وكالو نايمه
ليش نمتي هنااا ومحبوسين بغرفه
رانيا.. وين اروح لعد القصر شكبره بس مامرحب بينه

ضرغام.. مد ايده لجيبه كال هاج المفتاح مال غرفتي
اخذي البنات والجهال وروحو هناك خلو السبع
ينام هنا صارله يومين مانايم

رانيا.. وانت. وين تنام؟
ضرغام.. بحضنج!!
رانيا.. لااحد يسمعك ويشرونه ع الحبل
ضرغام.. ديله بايگ واذا سمعونه..

رانيا.. تعبان انت نام لاتظل كاعد
ضرغام.. دروحي يله واقفلي الباب عليكم
رانيا.. اخذت البنات ودخلنه للقصر تلكتنه
نور كتلهه اريد غرفه ضرغام جانت كلهه نايمه النسوان

دلتني بيهه يم الدرج مقفوله فتحتهه وطبينه
كفختني ريحه عطره مغركهه تغرك اول مره اشوفهه
حته ذوقه بالترتيب مااعرفه...

غرفه نوم صاجيه  مرتبه مابيهه هوسه ع الميز
عطره ركضت قريت اسمه Bleu Chanel
لونه اسود رشيت منه وسيوفي يصيح انطيني
رشيتلهم وكعدنه ...

عيني ع الغرفه اجت ماما وعمه ساهره
فرشن بالكاع واني واولادي ع الجربايه
هاي المخده نفسهه ينام عليهه اشمهه حيل
ومبتسمه همزين نايمين محد يشوفني...

طلعت تليفوني دزيتله رساله نمت؟؟؟
جاوبني لااا
رانيا.. احزر وين نايمين؟
ضرغام.. ماتحتاج حزوره نايمه ع الجربايه
وتشمشمين بالمخده كولي جذب؟

رانيا...هههه شمدريك
ضرغام.. خبره..
رانيا... صفنت اجه ابالي ليش مايكول احبج
دزيتله ليش مادكول احبج
ضرغام.. تحبين الرسميات ترى موبالحجي..

رانيا.. روح اني مااحبك ؟
ضرغام.. واني عكسج..
رانيا.. احبك
ضرغام.. واني مثلج...

رانيا.. ياربي شكد مستفز سديت التليفون
ونمت وماادري الايام الجايه شضامه النه
من فرح لوحزن...

عقيق.. نظفت الغرفه وفتحت الشباك
غيرت الهوه وسديته انتظر السبع بلكي يجي
البارحه ماشفته بليل نام بالمضيف ...

ساعه تقريبا كمت انعس وهو ماكو خليت المخده
بالكاع ومددت حسيت ع راسي انرفع فتحت
عيني جان راسي ع رجله ..

كعدت اباوعله مرجع راسه ليوره
وايده بشعري بس كتله السبع شبيك؟
سحبني حيل وحضني ويشدد ع حضنته
اكثر...

رخه ايده ابتعدت لزمت وجهه بايدي
وحجيت شبيك جمره مريض؟
السبع.. لا بس تعبان حيل وراسي مأذيني
مانايم وانتي راحتي وصار يومين بعيد عنج..

عقيق.. شعرك رطب سابح؟
السبع.. اي قبل شويه بس لكيتج نايمه ماكعدتج
عقيق.. كعدت ومديت رجليه وارتجيت ع الحايط
وكتله خلي راسك ع رجلي افرك راسك...

مدد بصفي وخله راسه بحضني العب بشعره
واحرك اصابيعي ع فروه راسه وافرك بحركات
دائريه بگصته وهو مغمض...

الساعه كدامي انتبهت عليهه صار نص ساعه
هو ساكن ماتحرك ابد اركز بملامحه اسمر
وبشرته صافيه حركت اصبعي على
الطبره مال حاجبه ...

نزلت ع لحيته احدد بيهه باصبعي وايدي
الثانيه بشعره العب بي حسيت حته ملامحه
ارتخت ...

ايدي الي ع لحيته سحبهه حيل ودنك راسي
علي وصرت بصوره معاكسه اله وباسني
بوسات متفرقه ويسحب بيه اكثر لحدماخلاني بصفه...

ضميت راسي برگبته حجه بهدوء تدرين ياعقيق
عمري مااذيت واحد ولايوم رفضت مساعده
محتاج بس ماادري ليش هيج انطعن..

عقيق.. رفعت راسي علي يباوع ليفوك
كتله منو طعنك؟
السبع.. طه اخو ياسين وكفتله وكفات ماتنعد
وهو موجبير انه اكبر منه بسنه وعشنه سوه
اكلنه فدماعون ونمنه بنفس المكان شلون هيج
يغدر بيه؟

عقيق.. ع كيفك جمره شنو غدرك؟ شسوه
بعده يتنهد يريد يسولفلي دك تليفونه فتح
خط وكام وكف وصاح بعصبيه ويكله منووو
ياكلب منووو الداس بيتي جااااي جاااي
لاتلزمون شي.....

.
.
.

يتبببببببع....... متابعه ممتعه