Page 10

                                    

                                          
ညနက်လာသည်နှင့် အချမ်းဓာတ်က ပို၍ တိုးလာသည်။ ည၏ အအေးဒဏ်ကြောင့် အိပ်မပျော်ခြင်းထက် သူ၏ မျက်စိရှေ့၌ ချမ်းတုန်နေသော ကောင်လေးကြောင့်
မိုင်စိုင်း အိပ်၍ မပျော်နိုင်ခြင်းက ပို၍ မှန်လိမ့်မည်။ ငြိမ်ငြိမ်လေး ကွေးနေရာမှ ခိုက်ခိုက်တုန်လာသော ကောင်လေးကြောင့် မိုင်စိုင်းမှာ ခြေမကိုင်မိ၊လက်မကိုင်မိ ဖြစ်သွားရ၏။ သူဖျားနာစဉ်တုန်းကတော့ မိသားစု၏ ဂရုတစိုက် နွေးထွေးမှုကို ခံရသော်ငြား ထိုကောင်လေး၏ ဘေး၌တော့ မိုင်စိုင်းတစ်ယောက်တည်းသာ ရှိနေသည်။ 
အိမ်မပျော်သည့်ညဖြစ်၍ နာရီသံ တဂျောက်ဂျောက်နှင့်အတူ ပုရစ်သံတို့သည် အကြားအာရုံ၌ ကျယ်ကျယ်လောင်လောင် ဖြစ်နေ၏။ အဖြူရောင် ဆံနွယ်တို့ကြားမှ တစ်စွန်းတစ်စ ပေါ်နေသော ကုပ်သားဖွေးဖွေးတို့ပေါ်၌ မက်ကလောင် ခြစ်ထားခြင်းကြောင့် အသားဖွေးဖွေးတို့မှာ နီညိုရောင်ဘက်သို့ ပြောင်းလုနီးပါပင် ဖြစ်နေချေပြီ။ 
မျက်စိရှေ့ရှိ ချမ်းတုန်နေသော ကောင်လေးကြောင့် မိမိကိုယ်ပေါ်၌ 
ခြုံထားသည့် စောင်ကို မိုင်စိုင်းယူကာ ခေါင်လွမ်း၏ အနားသိုု့တိုး၍ အနွေးဓာတ် ပိုစေရန် လွှမ်းခြုံပေးလိုက်သည်။ ကချင်ပြည်နယ်၏ ဆောင်းရာသီသည် မြေပြန့်သားဖြစ်သည့် မိုင်စိုင်းကိုတော့ အငြိုးဖြင့် နှိပ်စက်နေသလားဟုပင် ထင်ရ၏။ စောင်ကို ခေါင်လွမ်း တစ်ကိုယ်လုံး လုံအောင် ခြုံပေးကာ အနွေးဓာတ် ပိုလို့တိုးစေရန် မိုင်စိုင်းပါ ဘေး၌ လဲှ၍ အိပ်လိုက်တော့၏။ 
စောင်လွတ်နေသောကြောင့် မိုင်စိုင်း၏ ကျောပြင်မှာ လေပြည်အေးတို့၏ တိုက်ခိုက်မှုကို ခိုက်ခိုက်တုန်နေအောင် ခံစားနေရသည်။ 
သို့သော် ထိုအရာတို့ကို စိတ်ထဲ၌ ထားမည့်အစား ဘုရားဂုဏ်တော်တို့ကိုသာ အာရုံစိုက်၍
ပွားများနေလိုက်တော့သည်။ ခေါင်လွမ်း၏ ကျောပြင်လေးကို အသာအယာ ပုတ်ပေးရင်း
သူမှတ်သားခဲ့မိသမျှ ဘုရားစာတို့ကိုသာ 
အဆက်မပြတ် ရွတ်ပေးနေမိတော့သည်။ 
တဖြည်းဖြည်း ငြိမ်သက်သွားကာ အသက်ရှုသံမှန်မှန်ဖြင့် အိပ်ပျော်သွားသော ကောင်လေးကို မြင်လိုက်ရသည့် အချိန်မှ မိုင်စိုင်းသည်လည်း စိတ်တုံးတုံးချနိုင်သွားကာ အိပ်ပျော်နိုင်တော့သည်။ ရတနာသုံးပါးကို ဦးထိပ်ထား၍ အလုံးစုံသော အနွေးဓာတ်တို့ဖြင့် ထိုကောင်လေး နွေးထွေး လုံခြုံပါစေသား။