"Akala ko kasi nainip ka na. By the way, this is Lukas." Pinakilala niya 'yong kasama niyang lalaki. "My new head bodyguard."
                          
Tinanguan ko lang. Bagong bodyguard pala 'to. Hindi kasi gano'n ang dating niya sa 'kin. 
                          
"Tara?" tanong ko na rito kay Isabela. 
                          
"Okay." 
                          
Pinabuksan ko na siya ng pinto ng kotse. Pagkasakay niya, umikot na agad ako papunta sa kabilang pinto para sumakay na rin. Gusto ko nga sanang ako ulit ang magkabit ng seatbelt niya, kaso naunahan niya na ako. 
                          
"Saan mo gustong pumunta?" tanong ko na lang. 
                          
"Kahit saan." 
                          
"Mahirap 'yang 'kahit saan'. Isip ka ng gusto mong lugar."
                          
"Hmm . . . remember the hideout?" Ngiting-ngiti pa siya. "Can we go there? Kaya pa ba ng oras natin? Na-miss ko kasing pumunta roon, kahit saglit lang."
                          
Napaiwas ako ng tingin. "Wala bang iba? Pasensiya na, ayoko pang bumalik do'n." 
                          
"Oh, o-okay. Sorry."
                          
Pasimple ko siyang sinilip. Halatang medyo nalungkot siya. Pero mayamaya lang din, nagsalita ulit. "Let's just go to the mall then. May binanggit sa 'kin si Jewel last time na bagong mall sa McKinley Hill. Alam mo ba 'yon?" 
                          
"Sige, doon na lang." Binuhay ko na 'tong makina ng sasakyan at nagmaneho na paalis. 
                          
Naisip ko na nga rin 'yong lugar na 'yon kanina. Doon ko rin sana siya planong dalhin kung sakaling wala talaga siyang maisip na mapuntahan.

                          
***
                          
BANDANG ALAS-KWATRO NA no'ng nakarating kami rito sa mall. Hapon na rin kasi kami nagplanong magkita. Kumain lang kami tapos pumasyal na kaagad. 
                          
Ang daming beses nga na palihim ko siyang tinititigan habang namamasyal kami. 
                          
Ang ganda niya pa rin kasi talaga. Hindi ko 'to maamin sa sarili ko no'ng mga panahong sobrang sama pa ng loob ko, pero ang totoo, gandang-ganda pa rin talaga ako sa kanya. Kahit na medyo nangayayat siya, ang lakas pa rin ng dating niya sa 'kin. 
                          
Mas lalo pa siyang nagmukhang pormal at dalaga ngayon. Umiksi na 'yong buhok niya, pero 'yong pananamit niya, katulad pa rin ng dati. Ang hilig niya pa rin sa mahabang palda. 
                          
"Ark, don't you have work later?" biglang niya namang tanong habang naglalakad kami. 
                          
"Wala. Pero dadaan ako mamaya sa club."
                          
Dapat talaga may set ako mamaya, pero pina-cancel ko kagabi sa isa kong tauhan kasi nga magkikita kaming dalawa. Ayoko na siyang tanggihan ngayon. 
                          
"Ihahatid muna kita bago ako tumuloy sa Third Base," dagdag ko. 
                          
"Okay. Thanks." Nginitian niya ako nang matamis tas tumingin na ulit sa pinapasyalan namin na para pang nagmu-munimuni. "I still can't believe you're with me right now. Akala ko talaga hindi tayo matutuloy. Hindi ka kasi nagpaparamdam sa 'kin kaninang umaga." 
                          
"Sorry, tulog ako."
                          
"Yeah, I thought so. Naalala kong tanghali ka nga pala nagigising."