Kaya Ko Pa Bang Kumapit?

                                    

                                          
"Kaya Ko Pa Bang Kumapit?"

                          
Lima...
Limang salita ngunit kayhirap bigyang kasagutan.
Hindi naman ito dahas pero sugat at sakit ay kayang ipadanas.
Kung kusa nang kumakalas sa pagkakatali nang mahigpit, kaya ko pa bang kumapit?
                          
Napangiti ako.
Naaalala ko ang dating masayang tayo.
Iyong tipong pagmulat ko, mukha mo agad ang masisilayan ko.
Ang iyong mapupungay na mga mata, matatamis na ngiti,
Iyan ang nagpapasaya sa akin sa bawat sandali.
                          
Oo, inalagaan mo ako.
Ipinaramdam mo sa akin ang tunay na pagmamahal.
Pagmamahal na animo'y di na tayo pa mapaghihiwalay.
Ipinaramdam mo sa akin na isang importanteng parte ako ng mundo mo---
Sa mundong ikaw lang ang Adan ko,
At ako naman ang natatanging Eva mo.
Ngunit,
Apat...
Apat na salita ang biglang lumabas sa bibig mo,
"Ayaw ko na sa'yo."
Hindi---
Hindi ko matanggap ang sinabi mo kung kaya't ika'y sinubukan ko.
Tatlo...
Tatlong salita ang sinambit ko,
"I love you."
Kasabay nito ang pag-akap ko sa bewang mo.
Hinawakan mo ang mga kamay ko---
Hinawakan mo at tinabig,
Kumalas mula sa pagkakayakap ko.
Tumalikod ka---
Tumalikod ka at nagsimulang magsalita---
Magsalita ng masasakit na salita---
Mga salitang 'di na masasalaan pa ng pagmamahal
Dahil nga, sa akin ay ayaw mo na.
Halata ngang ayaw mo na
Dahil kahit dumadaloy na ang luha sa aking mukha, 
Ang punasan ito'y 'di mo na magawa.
Hindi mo na rin magawang sambitin ang salitang "Mahal kita."
                          
Paano na?
Paano pa?
Paano ako magpapatuloy sa relasyong
Ako na lang ang nakakaramdam ng pagmamahal
At ikaw, wala ng pakialam.
Kaya ko pa ba?
Kaya ko pa bang kumapit
Sa relasyong pilit mo nang inililigpit?
Kaya ko pa bang kumapit
Kung tanging ipinaparamdam mo na lang ay sakit?
Kaya ko pa bang kumapit
Kung ako na lang mag-isa?
Kung sa unang hakbang mo pa lang palayo,
Sinambit mo na ang linyang "Paalam na"?
Ang sakit.
Sobrang sakit!
Dahil kahit gusto pa kitang yakapin nang mahigpit,
Hindi na pwede---
Hindi na maaari.
Sapagkat alam kong kahit ilang hakbang pa ang gawin ko para mahagkan ka ulit,
Hindi na mababago ang katotohanang hindi mo na ako mahal pa
At ang dati'y di na pwedeng maulit.
                          
Oo, kaya ko pa---
Kaya ko pang kumapit kahit na masakit,
Pero, tama na---
Tama na'ng ako'y tumigil dahil ito ang nararapat,
Dahil para sa'yo, ako'y hindi sapat.
                          
Kaya ko pang kumapit
Subalit hindi na---
Hindi na kita pipilitin pa.
Kung saan ka masaya, doon ka.
Paalam na rin, malaya ka na.

                          
- Rara