JADA POV:

                                    

                                          
" Jada . Jada" mi feel somebody shake mi shoulder an mi open mi eye dem fi si Shanique a look pon mi . Mi eye dem guh towards  eh bed weh Andre lie dung inna . Mi still neva recova from eh shock weh mi feel when mi si him pon mi step an eh hole heap a blood ,mi neva si suh much blood inna mi life mi honestly think him did dead. All when eh ambulance an eh police come an dem rush him guh a hospital mi deicide  seh mi couldn't  lef him because eh fact seh afta him get shot an instead a guh hospital  like normal smaddy him drive half dead come a mi yaad. That piss mi off because why him woulda do sumuh like that ? Eh way how mi did frighten mi almost drop dung an then of course when eh doctor  dem tell mi seh him might nuh mek it but, dem aguh try dem best fi save him life . 
All a that happen last night an now mi did curl up inna wah chair inna him room cause mi deicide  seh mi nah guh home until him wake up an show mi seh him aguh be alright.  Shanique , Nick, Oshane , Adrian an some whole heap a other people weh mi neva know come an guh continuously but, fi right now a did just me an Shanique an two security  did deh outside a him room fi prevent any media from coming in because of course eh news seh him get shot did already spread fast an did deh all ova social  media an dem wah know everything  like who , why an where it happen but, obviously  nuhbody nuh know except fi Sinna himself an him nuh wake up yet . 
" yuh nuh wah guh home ? Yuh need fi get some sleep cause yuh must tiyad" Shanique  seh but, mi shake mi head .
" no ,mi nah lef until him wake up Shanique" an she open har mouth fi seh sumuh but, stop when eh door open an Tanya rush in an stop when she si Andre . Mi feel anger rush through mi as mi watch har cause as much as she might mean sumuh to Andre mi neva want har noweh near him . Who fi seh a nuh she set him up suh him get shot? Sumuh bout eh gyal mi just know she nuh good an she done prove seh she cannot be trusted afta she tell mi bout she a him best friend  an den fuck him inna eh same day . She turn har head an look from mi to Shanique  an then back to mi an mi hold har stare a dare har fi open har mouth an seh sumuh to mi . 
" wah the doctor dem seh ?" an Shanique  ansa since mi done decide seh mi nah guh engage  inna nuh conversation  wid har . 
" that a just wah waiting  situation right now because him lose nuff blood an eh bullet  miss him heart by a inch suh wi just have to wait an si if him wake up " 
" anybody know who or why ..."
" no , Adrian work wid eh police fi look into it but, suh far nuhbody nuh know anything "
Mi eye dem still deh pon Andre an suh comes mi seh him finga twitch a likkle an then him eye dem squeeze an flutter as him open dem an look round eh room . Before mi coulda guh to him Tanya turn from me an Shanique  an si seh him a wake up .
" Andre " she seh as she hold him hand an look dung pon him an can you believe  seh muma all start bawl ?
" Jada " eh word dem come from him mouth as him focus  pon mi an Tanya frown as har crocodile tears dem stop instantly.  
" Tanya yuh cah excuse please Andre need fi talk to Jada . Come help mi find eh doctor " Shanique  seh as she open eh door an Tanya look pon har an then pon mi an mi nuh miss eh dirty look weh she gi mi but, she need fi relax harlsef cause anuh like mi a tek har man , although a deveen fi har man cause him doh want har . 
" wah happen Andre ? An why yuh neva guh a hospital when yuh get shot ? Yuh know seh yuh almost dead cause a foolishness " mi seh as soon as Shanique an Tanya lef . 
" suh eh fact seh mi almost dead mek yuh suh upset?" Him ask an mi feel like slap him 
" yes, yuh know how much people yuh woulda hurt? " 
" eh woulda hurt you?"Him ask 
" of course yah mi boss an mi work fi yuh an mi know yuh an..." 
" mi good Jada . Mi come a yuh yaad because if mi did fi dead mi woulda wah yuh fi know seh you a eh last person weh mi did a think bout an eh only person weh mi woulda wah fi try help mi inna mi last moment " 
" wah that suppose to mean ? Yah talk as if mi an you even ..." 
" nuh yet but, belive seh as soon as mi come out a dis mi aguh show yuh wah mi mean an who mi want" an mi look pon him still confused because mi know seh a must joke him a mek because wi done establish  eh fact seh wi cah be together. 
" eh look like eh medicine a affect yuh brain but, seriously  Andre yuh si a who shoot yuh or yuh have any reason fi nuhbody wah do sumuh like this to you ?"
" that gov man , aguh deal wid it . This anuh nuhun " him seh an eh way how him seh him aguh deal wid it like seh him already have everything  plan out an know a who him a guh afta mek mi fraid an again mi wonda a who him really be . Eh door open an eh doctor come in wid Shanique  an Tanya . Mi decide fi guh home guh fresh up mislef since him wake up an mi know him aguh be alright , suh mi tell Shanique  lata an guh home . Afta mi done bathe an a look afta sumuh fi eat couple question start guh through mi mind because eh fact seh Andre seh him aguh deal wid it mean seh him obviously  know a who an that might mean seh eh smaddy weh shot him might have a reason  but, wah eh reason ? Wah him coulda involve inna suh or do fi upset smaddy suh mek dem decide fi try kill him ? An then smuh else sink in , despite eh fact seh him get shot an eh deh all ova social  media not one smaddy weh come look fi him nuh related to him an mi start wonda bout him family again because mi mind a tell mi seh somehow this weh happen link to that . 
Mi did aguh guh back a eh hospital but, mi get wah call from Shawn.  Him ask mi if mi did free cause him did have sumuh important  fi discuss wid mi an even though  mi know mi shoulda tell him seh mi did busy mi decide fi gi him half an hour fi talk to mi bout wah him wah talk to mi bout.  
" wah suh important?" Mi ask when him come an mi did inna eh front seat a him car beside him . 
" cool nuh , why yah rush mi suh ?" 
" because mi actually  kind a busy an mi only have  bout half an hour " 
" ah , listen . Mi know yuh done tell mi seh wi cah deh because mi aguh lef again an yuh nuh wah nuh unstable  relationship  suh..."
" Shawn..." mi seh as mi try fi stop him but, him just continue 
" just listen nuh . Mi buy wah house inna Mobay , just like wi did plan fi do when wi did aguh school . Mi done talk to mi boss overseas  a ready an mi aguh work out mi final contract  fi eh year an den mi aguh live here permanently . Jada mi know mi anuh eh perfect  man but, fi tell eh truth mi cah focus without  yuh bredda an wi did good together anuh like wi lef cause a anything personal  between wi . Just gi mi one more chance mek mi prove to yuh seh mi cah be eh man weh yuh want , swear pon mi life seh mi nah guh fuck it up Jada , yuh cah fix up eh house how yuh want eh fi look , anything  yuh wah just seh eh word an mi deal wid it , a just one last  chance mi a ask yuh fah " 
" Shawn.." mi look inna him eye dem as him reach fi hand an hold on pon it . Mi know seh him a be honest  but, mi neva inna eh frame a mind fi mek wah decision  right now  an mi honestly neva know if mi coulda gi him wah next chance because,  well  there was Andre to think about  an wid eh condition weh him inna right now mi have fi deh deh wid him . 
" I will think about it " 
" ah , just nuh tek too long " an as mi come out a eh car an watch him drive weh ,mi already know eh choice weh mi affi mek .