Jada POV:

                                    

                                          
Watching Andre/Sinna perform in person a the best night a mi life . Him know how fi handle eh crowd , which music dem want an throughout the whole show him keep everybody active , singing and dancing especially the woman dem weh nuh stop scream him name an wine to him song dem. Him tek 10 minutes break in between an gi some other  guests artists dem chance fi perform but, eh minute him guh back pon the stage the whole party guh wild . About 4am inna eh mawning before it done and even then wi did have fi spend wah next half an hour wid some vip people weh want picture wid him an when mi tell yuh seh eh woman dem nuh ramp dem doh ramp fi bend ova in front a him , hug him up like him a dem man all tek video a wine pon him to one a him song dem and him well entertain it while mi just did tired and ready fi guh home . 
The drive back to eh office mi nuh recall it cause mi doze off the minute wi lef eh party only fi wake up to him a shake mi shoulder an a ask mi weh mi live . Mi mumble sumuh to him an doze off back , when mi wake up sometime lata mi find miself inna mi bed and fi wah moment mi did confused a wonda how mi reach inna mi bed . Mi guh back ova eh events inna mi head but, mi neva recall actually a gi Sinna mi address but, somehow mi end up inna mi house inna mi owna bed . Still inna eh party dress but, no shoes and wid a/c on and cover inna sheet . 
Mi reach fi mi phone pon the bedside table ready fi call him but, mi si seh him lef mi wah message pon mi phone cause mi did save him number cause obviously since mi a work fi him mi have to do that .  
SINNA: Mi  get yuh address from Adrian cause yuh neva did a mek nuh sense when mi ask yuh an Shanique falla mi. A she tek off yuh shoes an turn on eh a/c but a mi cova yuh wid eh sheet . By eh way fi a young girl mi rate eh look a yuh place . Yuh nuh need fi come a work todeh cause yuh need fi rest cah have yuh a drop a sleep pon eh work . Doh badda mek dis wah habit though mi get seh yuh tired but, pon dah work yah yuh hafi willing fi mek sacrifice an sleep aguh be one a dem that's why eh pay suh good cause a nuh patty shop business dis. When yuh wake up an by that mi mean wake up good memba seh Adrian need eh file a the expenses cause wi a guh Bahamas tomorrow   . 
Mi neva know how fi respond to that suh mi just type thank you an lef it deh suh an of course eh only get one tick . Mi check eh time an si seh a did afta 12 almost 1 inna eh evening bowyyy mi cah sleep enuh.  Mi bathe, wash mi face a get rid a the makeup weh Shanique did apply and brush mi teeth then walk guh inna mi kitchen a falla mi belly cause of course it come first before anything else , afta mi cah work pon hungry belly . 
Mi mek wah sandwich wid franks , plantain, egg and cheese and put on likkle bit a mayo and two leaves a lettuce that wid wah nice cup a lasco chocolate tea mix an mi set fi the evening . Afta mi done mi clean up eh kitchen an then tek up mi laptop an pull up the file weh mi did fi send to Adrian . Mi did almost done wid it , only thing missing neva add yet a did like fi mi general expenses like clothes and spending money cause if wi a guh Bahamas obviously mi aguh need fi see tourist spots as much as a work mi deh pon an since him a guh fi perform obviously mi aguh need clothes unless Shanique aguh tek care a that. 
Mi decide fi just text Adrian an ask him an about two minutes afta mi ask, him ansa wid wah laughing emoji an tell mi yes an also remind mi seh a work mi a guh deh pon but, at the same time him understand seh mi aguh wah si and enjoy ova there as long as mi mek Sinna accompany mi . Right him a the next one cause by the way how him gwaan mi honestly doh think him woulda considah  fi even bring mi guh si nuhweh but, is either him dweet or mi get lost an den si how him manage without mi .
Girl nuh get too hype cause him did a exists and a manage long before him hire yuh mi subconscious mock mi an mi roll mi eye dem . Mi finish up eh file an send it off to Adrian an him send mi wah thumbs up pon app fi mek mi know him get it . Mi then remember seh mi did need fi guh dung a courts guh pay mi bill fi the new fridge weh mi recently buy suh mi just throw on wah black body con dress , mi black slippers an ketch mi hair up inna wah bun. Likkle lip gloss fi mi lip dem an grab mi cross bag wid mi phone , purse , housekey , rag , likkle bottle a lotion , pill etc. Listen fi mi granny teach mi seh mi fi always prepare fi the unexpected suh mi aguh mek sure mi have every likkle thing inna mi cross bag when mi lef mi house . 
Mi step out a the taxi and cross eh street walking ova to eh courts building. Mi did a the third person inna the line a wait fi pay mi bill when mi feel smaddy join eh line behind mi but, mi did focus pon mi phone as mi a argue wid Kerry cause she a seh she wah mi send har 6000 an she nuh wah tell mi wah fah like seh mi have money a gi weh just suh. 
" Jada , wah gwaan?" Wah man voice seh behind mi an mi look round den up pon the person only fi mi an Shawn eye dem mek four. Mi heart stop fi gout wah good 3 seconds yuh fuck before mi smile an seh 
" hey , am good " the woman in front a mi get through an a did fi mi turn suh mi guh up to eh cashier an pay mi bill . When mi done a did fi him turn an mi did about fi lef but, him ask mi fi wait pon him until him get through.
" love how yuh look nice but, den yuh always look good a one eh thing dem weh mi always like ah respect bout yuh. Eva neat an clean an smell good" 
"thanks "
" yuh neva stay suh doh , eh one word response thing anuh really your style" 
" well mi just surprise fi si yuh come back afta yuh did lef fi suh long " 
Him push open eh door fi mi as wi come out a the building an him walk inna eh direction a him car . 
" did affi cut suh mi cah mek eh money weh mi did a pree cause nuhun nuh deh yah suh. Come mi drop yuh home , eh sun hot an yuh cah walk guh look taxi inna this yah heat " him seh as him open eh passenger side door pon the front an mi tan up a contemplate wid mislef.
Gyal put yuh backside inna eh car an top gwaan like yuh nuh wah inna eh front seat a the BMW cuh pon yuh tuh.
Mi subconscious seh an mi guh inna eh front seat and him lock eh door and walk round to eh driver's side and get in.
" suh wah yuh a gwaan wid since mi lef ?" Him ask as him pull out a the parking spot .
" work an as yuh already know me , me aguh mek the most out a life an ensure seh mi enjoy it " 
" facts . Suh yuh have nuh man ?" And him look right inna mi face when him ask an mi laugh cause him well straightforward an bright .
" no , not since 7 months now . The last relationship mi did have mi did have mi dump him because him did too wuckless an nuh wah nuhun out a life " an him laugh 
" Jah Jah , respect that though cah mek nuh man come tek yuh fi ediat an a yuh run yuh own show especially you , yuh deserve queen treatment , dem common gyal deh out a road nuh have nuhun pah yuh" 
" that's true but, right now mi just done wid relationships just wah build miself an focus pon mi goal dem weh mi a work pon " 
" ah but, mi aguh deh yah fi eh rest a eh year suh wi have nuff time fi link up as friends cause mi respect yuh Jada an yuh done know seh mi nah guh force nuhun , just wah whole a vybz an gwaan chill wid yuh whenever yuh have time " 
" okay "
" ah tek mi numba " an him gi mi him number weh mi save inna mi phone . Him pull up a mi gate an mi climb out a the car and him blow him horn and then drive weh, well look how mi guh pay bill an pickup struggle carry back , den a suh mi one salt? but, a one thing though eh minute him step out a line and feel like nuhun aguh gwaan mi aguh set him straight.