chapter -75-[စေ့စပ်ကြောင်းလမ်းမှုသတင်း ]

                                    

                                          
chapter -75-[စေ့စပ်ကြောင်းလမ်းမှုသတင်း ]
လျိုယွဲ့ထွက်သွားပြီးနောက် ရွာသားများစွာကအဖွားရှန်ဆီလာမေးကြသည် ။
လုလင်းနဲ့ချန်းရှောင်မီတို့က ရွာမှာရှိတဲ့ ချန်းရှောင်ခိုင်နဲ့ရှန်ချီအကြောင်း ကောလဟာလတွေကို ကြားသွားတာဖြစ်မယ်လို့ ထင်မြင်နေကြပြီး သူတို့ကရှန်ချီကိုဆိုင်အလုပ်လုပ်ဖို့မကောင်းဟု ခံစားရတာကြောင့် အဖွားရှန်နဲ့ ရှန်ချီကို အလုပ်ထုတ်လိုက်တာဖြစ်မည် ။ ဒါကြောင့်ပဲ သူတို့(ရွာသားတွေ)ဒီနေရာကို မစ္ဆရိယစိတ်ဖြင့်ရောက်လာတာဖြစ်သည်။ 
သူတို့ထဲက လူနည်းစုကတော့ အဖွားရှန်ကိုနှစ်သိမ့်ပေးဖို့လာတာဖြစ်ပြီး ကျန်တဲ့သူတွေက အဖွားရှန်ရဲ့အလုပ်ဟောင်းနဲ့ပတ်သတ်တဲ့ သတင်းအချက်အလက်တွေကိုမေးမြန်းဖို့လာကြတာဖြစ်သည် ။
အဖွားရှန်ရဲ့အလုပ်ကို ကျန်းရှုဟယ်သာမက ရွာသားများစွာကလည်း လိုချင်နေကြတာဖြစ်သည် ။ 
" အဖွား အဲ့ဒီချန်းရှောင်မီက အရမ်းရက်စက်တာပဲ ၊ အချိန်အကြာကြီးသူတို့အတွက်အလုပ်လုပ်ပေးခဲ့တာတောင် နောက်ဆုံးတော့ ရှင့်ကိုဒီလိုမျိုး အလုပ်ထုတ်ပစ်လိုက်တယ်တဲ့လား ။ "
" အဖွားချန်းကသူ့ကို ရက်စက်ကြုမ်းကြုတ်တယ်လို့ပြောတာ အံ့ဩစရာမရှိတော့ဘူး ။ ရှင်က သူ့ရဲ့မိတ်ဟောင်းဆွေဟောင်းဖြစ်နေတာတောင် အခုလိုမျိုးအလုပ်ထုတ်ပစ်နိုင်တဲ့ နှလုံးသားရှိသေးတယ် ။ "
အဖွားရှန်က ကျန်းရဲ့အဓိပ္ပာယ်မရှိတဲ့ ဗလုံးဗထွေးစကားတွေကို သည်းမခံနိုင်တော့တာကြောင့် မတတ်နိုင်စွာပဲ အမှန်အတိုင်းပြန်ပြောလိုက်သည် ။
" ငါအလုပ်ထုတ်မခံရပါဘူး ။ တစ်ခုခုလုပ်စရာရှိလို့ ပြန်လာရုံပဲ ။ "
" ရှင်ပြောတာဟုတ်ပါတယ်။ ဒါပေမယ့် ဘာကိစ္စရှိလို့ပြန်လာရတာလဲ ။ "
ကျန်းက အဖွားရှန်ဟာသူအလုပ်ထုတ်ခံရတာကိုဝန်ခံဖို့ ရှက်နေတာလို့ အခိုင်အမာယုံကြည်နေသည် ။
" ဒီကျန်းရှုဟယ်က တော်ရုံလူမှမဟုတ်တာ ၊ သူ့ရဲ့ပန်းထိုးပညာက ကောင်းပေမယ့်ရိုးရိုးသားသားပြောရရင် ပန်ထိုးတော်တာရွာမှာသူတစ်ယောက်တည်းမှမဟုတ်တာ ။ သူ့မှာအစ်ကိုကောင်းတစ်ယောက်ရှိနေတဲ့အချက်ကြောင့်သာမဟုတ်ရင် သူကရှင့်နေရာမှာဘယ်လိုအစားထိုးဝင်လို့ရပါ့မလဲ ။ "