ဟဲ့ရှောင်ယွင်  တစ်ယောက် အဆမတန်မြန်လာသော သူ(မ) ၏နှလုံးခုန်သံကိုခံစားလိုက်မိသည်။ 
ယောင်းမဖြစ်သူကသူ(မ) အနားကပ်လာပြီး ထပ်ပြောသည်။ "မနေ့ကလေ...တစ်ချို့လူတွေက...ပြောနေကြတယ်...ရှောင်ကျန့်ကသူ့မိသားစုကိုသိပ်ဂရုစိုက်တယ်တဲ့...နင့်ရဲ့ကျန့်ဝေ့ကိုဘယ်သူမှယှဥ်နိုင်မှာမဟုတ်ဘူး...သူဒီကိုပြန်လာတော့အထူးလေ့ကျင့်ရေးရဲဘော်အနေနဲ့တာဝန် ထမ်းဆောင်ဖို့ ရွေးချယ်ခံလိုက်ရပေမဲ့...စပါးပြန်စိုက်နေသေးတယ်...သူဘာလို့အရမ်း အလုပ် ကြိုးစားနေရတာပါလိမ့်"။ 
ဟဲ့ရှောင်ယွင်  မှာသတိလက်လွှတ်ဖြစ်သွားပြီး ယောင်းမဖြစ်သူ ဘာပြောသွားမှန်းမသိလိုက်ပေ။
ထို့ကြောင့်လက်လွတ်စပယ်ဖြင့် ခေါင်းသာတစ်သွင်သွင်ညိမ့်ပြလိုက်သည်။ 
တစ်ဖက်လူမှာ သူ(မ) အလောတကြီးအိမ်ပြန်ချင်နေသည်ဟု အထင်မှားသွားပုံရကာဟဲ့ရှောင်ယွင်  အား စသလိုနောက်သလိုပြောလာသည်။ 
"အလိုက်မသိတဲ့ငါပါလားနော်...နင့်ကိုနားပူနားဆာလုပ်နေမိတယ်...အိမ်မြန်မြန်ပြန်တော့...
နောက်ကျမှငါနင့်အိမ်လာလည်ပြီးသကြားလုံးတွေလာတောင်းမယ်နော်"။ 
"ဟုတ်ကဲ့ပါ...ယောင်းမလေးသေချာပေါက်လာခဲ့နော်"။ စကားဆုံးသည်နှင့်ဟဲ့ရှောင်ယွင်  တစ်ယောက်ဟန်ဆောင်ပြုံးပြုံးကာ ဒယီးဒယိုင်နှင့်အမြန်လှည့်ထွက်လာရာ ရွှံ့ဗွက်အိုင်များကိုမတော်တဆတက်နင်း
မိကုန်သည်။ အောက်သို့ငုံ့ကြည့်လိုက်ချိန်တွင် သူ(မ) ၏ခဲရောင်ပိတ်စသားဖိနပ်မှာ ရေထဲနှစ်နေပြီးရွှံ့များဖြင့်ပေကျံနေသည်။
သူ(မ) ၏အတိတ်ဘဝတွင်ဝင်ငွေရှာနိုင်သည့်အချိန်တည်းကဤသို့သောဖိနပ်မျိုးကိုတစ်ခါမှမဝတ်ဖူးခဲ့ချေ။ 
ကင်ဆာရောဂါဝေဒနာကသူ(မ) ၏အသက်ကိုနှုတ်ယူသွားခဲ့ပြီး ထူးခြားဆန်းကြယ်သောဘဝအသစ်တစ်ခုပေးခဲ့သည်။ယခုမူ သူ(မ) က ဝတ္ထုထဲရှိ ဇာတ်လိုက်၏မိခင်ဘဝသို့ရောက်နေလေပြီ။ ထိုဇာတ်ကောင်ကသူ(မ) အတွက်ဘာအထင်ကြီးစရာမှမရှိ။ သို့သော်ထူးဆန်းသည်က ဝတ္ထုထဲရှိဇာတ်ကောင်မှာ ယခင်ဘဝက သူ(မ) နှင့်နာမည်ရောမျိုးရိုးပါ တစ်ထပ်တည်းတူနေခြင်းဖြစ်သည်။