الحلقة 60

                                    

                                          
🕯السحر الملعون 🕯
#شيطان زوجي 2
#صونيا
🤍الحلقة 60🤍 
******************
طلعت الشمس عبات لمكان ؛ سلمى ما قدرتش تفتح عينيها جات ترفد يدها باش تغطي الضوء عليهم ما قدرتش ....
شافت لقات روحها مكتفة من يديها ورجليها ...
رجعت تعيط حتى جات الفرملية تجري عندها ....
سلمى  : علاش درتو فيا هكذا قولي هند لي قالتلكم اه البارح كانت معايا وين راهي .....
تعيط لربي لي خلقها بسيف ما سكتتها الفرملية....
الفرملية: يا ختي البارح درتي حالة خفنا عليك كتفناك وعطاك الطبيب برا رقدتي طول الليل ....
سلمى : وينها هند كانت هنا وينها ...
الفرملية: مكانش حتى ما خلاوهاش تدخل كنتي ماشي مليحة كامل...
لازم تهدي روحك ولا مستحيل اخلوك تخرجي اليوم صدقيني .....
رجعت حطت راسها ماشي مصدقة بلي واش صرا البارح كان حلم رايحة تهبل رجعت تبكي وتعيط ما بغاتش تتكالما ....
الفرملية عيطت الطبيب خافو عليها زادو مدولها دوا وقالو موحال تخرج اليوم ....
حكمتها الدوخة ؛ حبست من لعياط رجعت غير تشوف فيهم والدموع يهبطو خزرت في واحد الشوكة شافتها ؛ شافت يماها واقفة  ما عندها لا عينين ولا فم اصلا ملامح وجها ما كانش ؛ هزت صبعها وقالتلها : اوووووووشت ...
غمضت عينيها سلمى دخلت في نوم عميق بسبت هاذاك الدوا ........
جا وائل طل على مراد وزينب ؛ طارق مزالو في غيبوبة من نهار الحادث .
رجع ليها باش يعرف خبارها ما خلوهش يدخل ؛ خبراتو الفرملية بلي  مستحيل تخرج قبل سمانة وضعها ما يسمحش كامل تشوف الناس.
وائل: اليوم جنازة يماها ؛ وختها من الصدمة راهي مشلولة نصفيا تعوجت كامل ؛كون ما تحضرش للجنازة موحال تسامحني .... 
الفرملية : اسفة هاذا قرار الطبيب مكانش حل راهي دونجي على روحها البارح قريب حلت الطاقة وبغات تصوطي لازم تعرف خطورة الوضع ....
وائل تكتفو يديه مي لازم اروح هو يوقف على نسيبتو ما عندهاش طفل من غير زوج بنات او راجلها لي ما فهمش كيفاش خربت دارو بين ليلة وضحاها.....
عيط لزينب وصاها كشما كاين تعيطلو وراح مع والديه عند نسابهم .....
دخل لدار كانت مقلبة بالغاشي؛ يسمين في شومبرة وغالقين عليها .... 
طلب يفتحولو الباب مي بنت خالتها ما حبتش زعف وكسر الباب ودخل كي شافها شوكا منها ؛ كانت عينها قاع دايرة وفمها معوج راقدة على جيهة والجيهة لخرى كامل معوجة ....
رفدها وداها لسبيطار خلاها ثمة ورجع للجنازة ....
داو المرحومة باش يدفنوها ....
كي وصلو بدات المطر طيح ؛  جاو احطوها في لقبر لقاوه صغير بزاف ؛ حطوها على جنب وهزو البالة وبداو يحفرو باش اوسعو فيه ؛ كي خلصو تعمر لقبر بالماء ما عرفوش واش يعملو الإمام قالهم لازم نحفرو قبر اخر هاذا مستحيل يقبلها ....
دارو ربعة من الناس باش يحفرو قبر اخر بجنب هاذاك وصلو لنص ما قدروش اكملو ؛ كان لتحت حجر مكانش كيفاش يحفرو؛ الإمام استغفر ورجع يدعي لربي انو يرحمها برحمتو ويغفرلها ذنوبها ؛ هو يدعي وهوما يحفرو في قبر الثالث  كي كملو زاد عاود استغفر وطلب منهم يدعو وهزوها باش لرض تقبلها هاذ المرة .....
رجعو كامل يدعو لربي يغفرلها الذنب لي داراتو ....
بسيف ما دفنوها فوتو تقريب 5 ساعات وهوما معاها .... 
كي خلصو طلب منهم لازم اصدقو عليها باش كشما يغفرلها ربي وخفف عليها ....
كامل راحو قعد غير وائل ونسيبو لخرين مع دارو باش اشوفو لقبر قبل ما اروحو لقاو افعى كبيرة وكحلة داخلة فيه اب سلمى مشوكي من هاذ المنظر دار شاف في وائل: واقيل دارت حاجة كبيرة بزاف في حياتها خلات ربي سبحانو يغضب عليه إلى يوم الدين ....
طاحو دموعو ما قدرش أصدق بلي مرتو خايبة لهاذ الدرجة ؛ انهد حيلو وقعد يمشي اكركر في رجليه ...
لحقو وائل شدو من يدو وراحو .....
كي طلعو في اللوطو شاف معاه وقالو : اسمع يا ولدي سلمى يماها لي كانت تفسد فيها ؛ ذرك قعدت براسها انت اوعدني تنطهلى فيها انا لازم نقوم ببنتي لخرى هي ثاني ماشي عارف واش صرالها ....
هبط راسو وقال وائل: نوعدك عمي ما تحتاجش اي حاجة مدامها معايا بربي ....
وصلو لدارو دخلو يرتاح في بيتو كي جا خارج لمح واح واقف في الظلمة وداير للحيط ...
وائل: شكون انت واش تعمل هنا ....
دارت كانت هي أم سلمى عينيها وفمها مخيطين كانت تسيي تهدر ما قدرتش شوية ونفك فمها رجعت تعيط ساعدنيييييييييي .
#يتبع 😈