အခန်း (၁၅) တပည့်ဆိုးများ၏ စိတ်ဓာတ်

                                    

                                          
Burmese Translation of {我的徒弟都是大反派} by author 谋生任转蓬
                          
Translator - ME 
.........
                          
အခန်း (၁၅)   တပည့်ဆိုးများ၏ စိတ်ဓာတ်
                          
လုကျိုးက ဈေးဆိုင်မှ ကျင့်စဉ်နှင့် လက်နက်တို့ကို တစ်ချက်ကြည့်လိုက်သည်။ ဈေးအချိုဆုံးမှာ အနည်းဆုံး ကုသိုလ်အမှတ် တစ်ထောင် ကျသင့်သောကြောင့် လက်ကျန်အမှတ်များအား ဆက်မသုံးတော့ပေ။
                          
သူက သူ့အသက်လေး ရှည်စေရန် တပည့်များကို တာဝန်ထပ်ချပေးဖို့ရာ ကြံစည်ထားလေသည်။ ထိုအခါမှ သူ့အတွက် သူ ကျင့်စဉ်ကောင်းများနှင့် လက်နက်ကောင်းများကို ရယူနိုင်မည် မဟုတ်ပါလော။
                          
သူ့မှတ်ဉာဏ်ထဲ၌ ဤကမ္ဘာသည် အလွန်အန္တရာယ်များပေသည်။ သူ့လက်ရှိအနေအထားဖြင့် ရွှေနန်းဥယျာဉ်တောင်မှ ထွက်သွားလျှင် သူ့ကိုယ်သူ ကာကွယ်ဖို့ပင် အလွန်ခက်ခဲပေမည်။ ထို့ကြောင့် သူက အချိန်အတိုင်းအတာ တစ်ခုအထိ တောင်ပေါ်မှာ  နေဖို့ ဆုံးဖြတ်ထားသည်။ သူ့အား ကာကွယ်ပေးနေသည့် တပည့်များနှင့်  ပြဿနာ မရင်ဆိုင်ရပေ။
                          
သူ့အနေနှင့် တပည့်များ သစ္စာဖောက်နိုင်ခြေကိုလည်း ထည့်တွက်ထားရမည်။
                          
တပည့်ငါးယောက် ထွက်သွားပြီ ဖြစ်သောကြောင့် ကျန်လေးယောက်အား အလွန်အမင်း သတိထားရပေမည်။ သူတို့ ပြဿနာ ရှာမည်ကိုတော့ မကြောက်ပေ။ သူ့တွင် အထွတ်အထိပ်သဏ္ဍာန် ကတ်နှင့် အတိုက်ခိုက် ဒဏ်ပြင်းကို ကာကွယ်နိုင်သော ကတ်တို့ ရှိနေသေးသည် မဟုတ်ပါလော။
                          
“ ယွမ်အာ ”
                          
ဝှစ် …
                          
သစ်တောအတွင်း ရှောင်ယွမ်အာက နတ်မိမယ်လေးအလား ကြော့ရှင်းစွာ ထွက်ပေါ်လာပြီး ဦးညွှတ်လိုက်လေသည်  “ ဟုတ် ရှစ်စွင်း ”
                          
“ မိစ္ဆာဝေဟင်မျှော်နန်းကနေ စာရေးဖို့ ရတနာလေးသွယ် ယူခဲ့ပေး ”
                          
“ရှစ်စွင်းက ဘယ်တော့မှ မရေးဘဲနဲ့ တပည့်ကိုပဲ ရေးခိုင်းခဲ့တာလေ။ ဒီနေ့ ရှစ်စွင်းဘာသာ ရေးမလို့လား”