Kailan pinakamagandang bumisita sa Japan?

Medyo maginaw ang Japan sa Enero na may mga temperaturang bumababa sa humigit-kumulang 10°C at nakararanas ng pag-ulan ng snow ang maraming bahagi ng bansa. Ngunit sa pagitan ng mga winter festival, hot spring, at skiing, maraming paraan para magpainit. Sulit na sugurin ang malamig na panahon sa malalaking lungsod tulad ng Tokyo at Kyoto dahil sa mas kaunting dagsa ng tao at mga kamangha-manghang pasyalan, ngunit tandaan na sarado ang maraming negosyo sa panahon ng Bagong Taon. Kung desidido kang iwan ang iyong coat at payong sa bahay, ang Okinawa Islands sa timog-kanluran ay nakararanas ng semi-tropical na panahon sa buong taon, na may mga temperaturang hanggang 18°C.

Nagsisimula ang Shōgatsu (New Year) festival sa Enero 1 kung kailan nagkakaisa ang lahat na hilingin na sana’y magkaroon ng mabuting kalusugan at kasaganaan ang isa’t isa. Magtungo sa isang snow art festival para pagmasdan ang magagandang ice sculpture ng mga mythological na nilalang na pinapailawan sa gabi. Dahil pinakamalamig na buwan ng taon ang Enero, marami ring nagpupunta sa mga slope para i-enjoy ang skiing at snowboarding, kung saan ang Hakuba at Niseko ang dalawa sa mga pinakasikat na resort.

Sa pagpapatuloy ng malamig na panahon patungong Pebrero, nasa kasagsagan na ang ski season habang sinasalubong ang makapal at pinong snow ng mas madalas na sikat ng araw at medyo mas maiinit na temperatura kaysa sa Enero. Bagama’t karaniwang maaraw at tuyo ang panahon, dapat kang magdala ng maraming maiinit na damit para makayanan ang mas malalamig na temperatura na may average na humigit-kumulang 10°C sa maghapon at 2°C sa gabi. Kakaunti ang dagsa ng tao sa bahaging ito ng taon, kaya napakagandang panahon ito para libutin ang mga pangunahing pasyalan na may mas maiikling pila.

Kabilang sa mga highlight ng Pebrero ang taunang snow festival ng Sapporo, na umaakit ng dalawang milyong bisita dahil sa ice sculpting competition, skating rink, at mga pambatang snow slide nito. Sa pagtatapos ng buwan, nagsisimulang lumitaw ang mga plum blossom para maghudyat sa pagsisimula ng spring. Magtungo sa mga sikat na viewing point tulad ng Kairaku-en sa Mito o Hinage Park ng Tokyo kasabay ng maraming iba pang hardin at shrine para hangaan ang matitingkad na shade ng makukulay na punong ito.

Walang kaduda-duda na ang pangunahing atraksyon ng Marso ay ang tradisyon ng hanami, na ang literal na ibig sabihin ay tumingin sa mga bulaklak. Hindi magtatagal ay malalaman mo kung ano nga bang pinagkakaguluhan, dahil nagkalat ang mga puno ng sakura sa mga park, sa kahabaan ng daan, at sa tabing-ilog. Nag-uumpisang sumilip ang mga kulay ng cherry blossom sa pagsisimula ng Marso habang lumalaganap ang mga mapula-pulang kulay mula timog hanggang hilaga, ngunit asahan ang matingkad na pagpapakita ng kulay pink kapag papatapos na ang buwan. Makakatulong na tingnan ang mga cherry blossom forecast nang maaga kung gusto mong makita ang bansa sa pinakamakulay nito. Magiging available ang mga ito sa pagitan ng Enero at Pebrero at ia-update linggu-linggo sa buong season.

Malaking bagay ang anime sa Japan, kaya kung nasa Tokyo ka sa panahong ito, sulit na puntahan ang AnimeJapan – ang pinakamalaking festival sa mundo na nakatuon sa sikat na istilo ng animation na ito. Ang mga temperatura sa maghapon ay may kaaya-ayang average na 13°C, ibig sabihin, ito ay isa sa mga pinakanakaka-enjoy na panahon para bisitahin ang bansa. Kung nasa labas ka buong araw, dapat kang magdala ng medyo makapal na coat o sweater para balutin ang iyong katawan sa gabi kapag lumalamig nang kaunti.

Ang biglang pag-init ng panahon sa buong bansa ay nangangahulugan na tamang-tamang oras ang Abril para bisitahin ang anumang bahagi ng Japan. Tuluy-tuloy ang cherry blossom season sa mga lungsod tulad ng Tokyo at Kyoto, at bukas ang negosyo sa mga beach resort ng katimugang Okinawa. Bagama’t may average na 19°C ang mga temperatura sa maghapon, gugustuhin mo pa ring magsuot ng mas mainit na damit sa gabi kung kailan maaaring medyo guminaw.

Ang mga sobrang hilig sa winter sports ay maaari pa ring magpunta sa mga slope sa ilang resort, tulad ng Niseko na nakalaan para sa spring skiing. Kung sabik kang hangaan ang kagandahan ng cherry blossom season sa kasagsagan nito, inaalok ng Tokyo, Osaka, at Kyoto ang ilan sa pinakamagagandang hanami (pagtingin sa pamumulaklak) habang nababalot ng kulay pink ang mga daan, park, at shrine. Gayunpaman, may libu-libong lugar sa buong bansa para pagmasdan ang pamumulaklak ng sakura (mga cherry tree). Mag-ingat sa pagdagsa ng maraming tao sa panahon ng Golden Week (Abril 29 hanggang sa unang bahagi ng Mayo) kung kailan nagaganap ang ilang Japanese holiday.

Sa pagpapatuloy ng mga pagdiriwang ng Golden Week sa unang linggo ng Mayo, nasa kasagsagan na ang pagkukulay pink ng mga cherry blossom sa hilagang rehiyon ng Hokkaido at unti-unting umaakyat ang mga average na temperatura papunta sa kaaya-ayang 23°C. Maraming Japanese ang walang trabaho sa buong linggo kaya asahang magiging abala ang pampublikong transportasyon at mga park.

Kapag humupa na ang dagsa ng tao, mae-enjoy mo ang medyo maluwag na paglilibot sa mga pangunahing lungsod tulad ng Tokyo, Osaka, at Kyoto at puwedeng t-shirt lang ang suot sa panahong ito. Kapag opisyal nang nagtapos ang ski season, pinakamainam na paraan ang hiking para manatiling aktibo, kung saan pinakamagandang lugar ang mga bundok at iba’t ibang pambansang park ng Hokkaido para sa magandang paglalakad. Puno ang Tokyo ng mga festival sa Mayo, kabilang ang magulong Sanja Matsuri sa buong weekend kung saan humigit-kumulang 100 portable shrine ang ipinaparada sa mga daan. Sa huling bahagi ng buwan, masisilayan ang napakasikat na Roppongi Art Night - isang weekend ng mga outdoor installation at live performance na ginagawang isang malaking open-air gallery ang lugar.

Pagsapit ng huling bahagi ng Hunyo, nakakaapekto ang maulan na panahon (“tsuyu”) sa malaking bahagi ng Japan kaya mahalagang magdala ng waterproof coat at payong. Ang pinakahilagang mga isla ng Hokkaido ay ang isang bahagi ng Japan na nakakatakas sa mga pag-ulan, kaya maaraw ang panahon halos buong buwan. Sa bandang timog, medyo maalinsangan na may mga kalat-kalat na tropikal na pagbuhos ng ulan at temperaturang humigit-kumulang 26°C.

Sa kabila ng basang panahon sa gitna at timog Japan, marami pa ring puwedeng makita at magawa sa malalaking lungsod. Tamang-tamang panahon ito para gamitin ang mga tradisyonal na hot spring na kilala bilang onsen, kung saan ka maaaring magbabad sa mga geothermally heated na tubig na mayaman sa mga mineral. Marami ring libreng festival na nangyayari sa buong bansa, tulad ng Hyakumangoku Matsuri sa Kanazawa kung saan mo maaaring pagmasdan ang mga tradisyonal na ika-16 siglong kasuotan at katutubong sayawan.

Pagsapit ng Hulyo, madalas na umaaraw sa hilaga at timog, na tamang-tama para sa mga excursion sa bundok o snorkeling sa palibot ng Okinawa Islands. Mas mamasa-masa ang sitwasyon sa Honshu at gitnang Japan habang nagpapatuloy ang tag-ulan. Bagama’t maaaring maging maalinsangan sa malaking bahagi ng bansa, makakakita ka ng mas malamig na panahon sa mga hilagang rehiyon tulad ng Hokkaido kung saan may average na 21°C ang mga temperatura.

Opisyal na nagsisimula ang climbing season sa Hulyo, kung kailan inaakyat ng mga mahilig sa adventure ang Mount Fuji – ang pinakamatayog na bundok sa bansa na may taas na 3,776 metro. Kung nandito ka sa huling weekend ng Hulyo, maaabutan mo ang ilan sa pinakamalalaking music act sa Fuji Rock Festival. Ito rin ang panahon para sa mga sikat na summer festival tulad ng Gion Matsuri sa Kyoto, Tenjin Matsuri sa Osaka at daan-daang “hanabi taikai” (mga fireworks show) na idinaraos sa buong bansa.

Setyembre ang buwan na dapat iwasan ng travelers na bumisita sa Japan dahil sa masamang lagay ng panahon at limitadong travel option. Bagama’t hindi gaanong maalinsangan ang panahon sa pangkalahatan, magaganap pa rin ang typhoon season at karaniwan itong nangyayari sa mga baybayin ng Okinawa, Kyushu, at Shikoku na may matinding pag-ulan at mga napakalakas na hangin. Kaya tandaang magdala palagi ng payong at alamin ang mga weather forecast bago ka lumabas.

Sa hilaga, mararanasan mo ang mga unang palatandaan ng autumn na unti-unting bumabalot sa mga National Park ng Hokkaido, habang nagiging magagandang kulay ng pula at orange ang mga dahon. Kung nasa Osaka ka sa ikatlong weekend ng Setyembre, masasaksihan mo ang isa sa mga pinakamasiglang festival nito – ang Kishiwada Danjiri Matsuri, habang nagaganap naman sa iba’t ibang panig ng bansa ang mga full moon gathering na kilala bilang “tsukumi.”

Isa ang Oktubre sa mga pinakamagandang panahon para bisitahin ang Japan dahil ang panahon ng bagyo at tag-ulan ay binibigyang-daan ang magandang tanawin sa autumn, maiinit na araw, at mga katamtamang gabi. Magtungo sa mga National Park ng Hokkaido para sulitin ang mga kaaya-ayang shade ng pula, orange, at ginto ng autumn, kung saan inaalok ng O-numa Quasi National Park ang ilan sa mga pinakamakulay na dahon. Naglalaro ang mga average na temperatura sa pagitan ng 14°C at 22°C sa lahat ng rehiyon, kaya hindi kailangang magpatong-patong ng damit habang naglilibot ka.

Nagdadala ang kaaya-ayang panahon ng napakaraming pagdiriwang sa lahat ng sulok ng bansa, kabilang ang Matsue Suitōro festival ng tubig at liwanag, ang taunang performing arts festival (Festival/Tokyo) ng Tokyo, at ang Yokohama Oktoberfest. Malaking bagay din ang Halloween sa Japan, kaya asahang makakita ng libu-libong malilikhaing kasuotan sa palibot ng mga plaza at park pagdating ng Oktubre 31. Kasama sa mga event ang mga flash mob, street party, at maging mga zombie run.

Dahil sa maaraw na panahon at kamangha-manghang tanawin ng autumn na magandang kunan ng litrato, isa ang Nobyembre sa mga pinakamagandang buwan para bisitahin ang Japan. Nagsisimula nang lumamig sa bahaging ito ng taon, kaya siguraduhing magdala ng kaunting pampatong na damit para makayanan ang mas malalamig na gabi, lalo na kung bibisitahin mo ang pinakahilagang isla ng Hokkaido na bumaba sa humigit-kumulang 8°C. Ang pinakamainit na panahon ay maaaring matagpuan sa katimugang Okinawa Islands, na may average na temperatura na 22°C.

Nagaganap sa kalagitnaan ng Nobyembre ang tradisyonal na festival ng Shichi-Go-San (“7-5-3”) kung saan nagsusuot ng makukulay na kimono at tumatanggap ng mga pagbabasbas sa mga Shinto shrine ang mga batang babaeng pito at tatlong taong gulang at mga batang lalaking limang taong gulang. Maaari mo ring mapanood ang huling sumo wrestling tournament ng taon sa Fukuoka habang pinapabilib ng Kyushu Basho event ang maraming tao sa Fukuoka Kokusai Center. Sulit ding bisitahin ang Kyoto sa mga panahong ito dahil ang mga templo at hardin nito ay puno ng napakagandang tanawin.

Nagsimula na ang ginaw ng winter pagsapit ng bahaging ito ng taon, na naghahatid din ng unang bagsak ng snow, masasayang pag-iilaw, at ang simula ng ski season sa Hokkaido. Naglalaro ang mga average na temperatura sa pagitan ng 4°C at 12°C at ang mga araw ay mas maiksi kung saan lumulubog ang araw sa Tokyo nang mga bandang 4:30 pm. Sa mga timog-kanlurang isla, mae-enjoy mo pa rin ang katamtamang lagay ng panahon na umaabot ng 20°C at halos walang katao-tao ang mga beach, ngunit maaaring masyadong malamig ang tubig kung higit sa pagsawsaw sa daliri ng paa ang gagawin mo.

Nagdaraos ang maraming shrine ng mga event sa Bisperas ng Bagong Taon sa Disyembre 31, at ang pagkain ng buckwheat noodles ay isang masarap na tradisyon na kilala bilang “toshikoshi soba” – na sinasabing nagdadala ng suwerte at mahabang buhay sa mga nakakuha ng pinakamahabang noodles. Sa hatinggabi, 108 beses na tumutunog ang mga kampana ng templo sa buong bansa bilang bahagi ng Joya-no-kane, isang taunang purification ritual. Sa kabila ng masasayang pagdiriwang, mahalagang tandaan na ang panahong ito ay isa sa tatlong pangunahing travel season sa Japan, kaya maaaring sarado o bukas sa mga limitadong oras ang mga negosyo. Asahan ding magiging mas siksikan ang transportasyon.