Serbske barby

nadpis	Serbske barby
awtor	Handrij Zejler
lěto
žórło	http://texty.citanka.cz/
licenca	public domain
nota	stary prawopis, Zhrom. spisy III.

    Bratřa, dajće město spěwej,
    Sława! barbje wyskajće,
    Módrej, čeŕwjenej a běłej,
    Kajkuž Serbstwo lubuje;
    Twjerdźizna njebjeska
    Sama k njej' so póznawa.

    Młody dźeń, hdyž ranje swita
    Z róžowatej kročelu,
    Z našej barbu zemju wita
    Z lubosću we wobliču;
    Lubosć a wuznawa
    Naša barba čeŕwjena.

    Firmament so módri krasny
    W fijałkowej módrini,
    Jeho barba njewuhasny
    Přećelow slub poswjeći;
    Přećelstwo, bratrowstwo
    W našej barbje hordźi so.

    Běłu drastu njewinosće
    Jasny dźeń so wobleka,
    Z běłych liljow khwalba rosće
    Twojej barbje, Łužica!
    Njewina wuzwola
    Twoju barbu Łužica!

    Módra, čeŕwjena a běła,
    Haj, to krasna barba je;
    Komuž wutroba so zhrěła
    Za čuća je wótčinske:
    Zawyskaj, zaklinkaj,
    Sława serbskej barbje praj!