Helloween
Helloween is e power metalgroep uut Hamburg in Duutsland, die ol bestoat van begun joarn '80. Bekende nummers zyn oendermêer Heavy Metal Is The Law en I Want Out.
Noame
[bewerkn | brontekst bewerken]De noame komt van Halloween, e dudelikke verwyzienge no Hell (d'elle). De O in 't min van nunder noame is oek e pompoene.
Geschiedenisse
[bewerkn | brontekst bewerken]Kai Hansen, Michael Weikath, Markus Grosskopf en Ingo Schwichtenberg begustn in 1983 met 'n groep Iron Fist en noame dan ze ol zêre veranderdn in Helloween. 't Wos Schwichtenberg die vôornstelde voen van de O e pompoene te moakn.
't Joar derup brochtn ze ol en EP (Helloween) en e ploate (Walls of Jericho) uut. Ze krêegn ol drekt e masse fans, binn en buutn Duutsland (oendermêer Bruce Dickinson van Iron Maiden). Kai Hansen a rôoi voen te ziengn en gitaar te speeln en ne besliste voen nem ollêne nog me zyn instrument bezig t'oun. Michael Kiske kwaam in ze plekke en me nem beguste de grôte veroverienge van Europa en de reste van de metalweireld. De twêe êeste ploatn dan ze me nem uutbrochtn (Keeper of the Seven Keys I & II) scôordn stief goed.
Deur mêniengsverschilln en deur dat 'n an 't sukkeln wos me ze gezoendeid, gienk Kai Hansen deure (loater begust 'n me Gamma Ray). Roland Grapow nam ze plekke in en me nem brochtn ze verschillnde ploatn (Pink Bubbles Go Ape en Chameleon) uut die nie ol te goeie kritiekn krêegn en 'n verkoop liep oek nie lik of dat zyn moeste. Beistn 'n dien tour (1993) danktn ze Schwichtenberg oek of omdat 'n te vele drugs gebruukte en te vele persôonlike probleem adde.
In 1994 kwaamn der e nieuwn zanger en e nieuwn drummer by (Andreas Deris en Uli Kusch) en ze krêegn were mêer en mêer succes. Master of the Rings verkocht goed en oek dei The Time Of The Oath (upedroagn an Schwichtenberg, die zyn zevn tekort edoan adde) nunder populariteit were vermêezn.
Achter die twêe ploatn kwaamn der nog 4 originele (Better Than Raw, The Dark Ride, Rabbit Don't Come Easy en Keeper Of The Seven Keys - The Legacy) en 1 cover-CD uut. Oendertusschn woarn der oek nog êentige vervangiengn in de bezettienge.
Leedn
[bewerkn | brontekst bewerken]Nu
[bewerkn | brontekst bewerken]- Andreas Deris - Zang (1994-nu)
- Michael Weikath - Gitaar (1982-nu)
- Sascha Gerstner - Gitaar (2002-nu)
- Markus Grosskopf - Bas (1981-nu)
- Daniel Loeble - Drum (2005-nu)
Vroeger
[bewerkn | brontekst bewerken]- Kai Hansen - Zang (1978-1986) & Gitaar (1978-1988)
- Michael Kiske - Zang (1987-1993)
- Roland Grapow - Gitaar (1988-2001)
- Ingo Schwichtenberg – Drum (1981-1993)
- Ulrich Kusch - Drum (1994-2001)
- Mark Cross - Drum (2001-2003)
- Stefan Schwarzmann - Drum (2003-2005)
Ploatn
[bewerkn | brontekst bewerken]- Helloween (1985, EP)
- Walls Of Jericho (1985)
- Keeper Of The Seven Keys Part 1 (1987)
- Keeper Of The Seven Keys Part 2 (1988)
- Pink Bubbles Go Ape (1991)
- Chameleon (1993)
- Master Of The Rings (1994)
- The Time Of The Oath (1996)
- Better Than Raw (1998)
- The Dark Ride (2000)
- Rabbit Don't Come Easy (2003)
- Keeper of the Seven Keys - The Legacy (2005)
- Gambling with the devil (2007)
- 7 Sinners (2010)
- Straight Out of Hell (2013)
- My God-Given Right (2015)