Breskens

Breskens

Breskens in de gemêente Sluus
Provinsje	Zêeland
Gemêente	Sluus
Coördinoatn	51°23′NB 3°33′OL
Ippervlak	km²
Inweuners	4629 (2023)
Gemêente Sluus in Zêeuws-Vloandern

Breskens (ofte Bresjes in't Zêeuws) es e plekke in 't westn van Zêeuws-Vloandern, geleegn tusschn Groede, Schôondyke en Hoofdploate. Der weun'n e klêene vuufduusd inweuners, die ze 'Bressioanders' noemn. Breskens ligt an de zuudkant van de moundienge van de Westerschelde, woa da de riviere oovergoat in de Nôordzêe. 't Dorp wos tout 1970 e zelfstandige gemêente woarachter 't by de gemêente Ôostburg wierd gesmeetn. Sedert de gemêentelyke erindêelienge van 2003 ôort Breskens by de gemêente Sluus.

Breskens es surtout gekend vo zyn visserye. In de vôorige êeuwn leefde Breskens bikkans ollene mo van inkomstn uut die branche mo teegnwôordig leevn ze der surtout van't tourisme. Ôok gekend zyn de visseryfêestn in de moand oest die vele volk na de plekke doe komm'n

Geschiedenisse

Breskens ountstound an't ende van de Middeleêuwn, toenda in 'n uutkom van 1487 de schorrn an de Schelde deur keyzer Maximilioan van Oôstnryk in lêen wierd uutgegeevn an hertog Filips van Kleef om te bedykn. In 1510 wos de bedykienge van de polder van Breskenssandt grêed en wierd 't dorpke Breskens esticht. Nie vele derachter wierd ôok de polder van Nieuw Breskens bedykt, woarachter ôok nog de Barbarapolder en de Kleefsepolder volgd'n. In 1585 wierdn in den Tachtigjoarign Ôorloge teegn de Spanjoardn de polders ounder woater gezet. 't Es mo achter verooverienge van Sluus in 1604 der prins Maurits van Oranje da de polders were herdykt wierd'n.

Bist den Twiddn Weireldôorloge es Breskens deur de g'allieerdn zwoar gebombardêerd ip 11 september 1944. Vantevoôrn woarn der pertank ol evakuoasjes gebeurd, mo der vieln ton oglyk nog 199 slachtoffers. By de Woatersnoodrampe van 1953 woarn der relatif letter dôo in't westn van Zêeuws-Vloandern. In Breskens koest je de koaie nie mêe zien, mo vodder van de reste es Breskens eignlyk van de rampe gespoard gebleevn. Mè datter in de reste van Zêeland wel massa's mienschn getroffn zyn gewist, zyn der vele visschers uut Breskens goan elpn ip ander plekkn, surtout vo mienschn die vaste zoatn ip ulder dak der van 't oaln.

Verkêer

In tydde koest je van Breskens noa Vlissiengn me jun otto via de ferry oover de Westerschelde, tesedert d'oopenienge van de Westerscheldetunnel in moarte 2003 ester gin ottovêerdienste mêe. Westerschelde Ferry zorgt nu wel nog vo e dienste vo mienschn te vélo en te voete.