Volgodonsk

Volgodonsk
Волгодонск
Lidnanznam;	Flag;
Valdkund	Venäma
Eläjiden lugu (2021)	168,048 ristitud
Pind	182,3 km²
Pämez'	Sergei Ladanov; (reduku 2020—)
Telefonkod	7−8639-xxx-xxx
Avtokod	61, 161
Aigvö	UTC 3 (MSK 0)

Volgodonsk (ven.: Волгодо́нск) om Venäman lidn da lidnümbrik Rostovan agjan päivnouzmas. Se om agjan nellänz'-videnz' lidn eläjiden lugun mödhe.

Istorii

Eländpunktan aluz om pandud vn 1950 27. päiväl heinkud kuti žilo-varatoitandbaz sauvomha Cimlänskan padoseinäd i Volgan-Donan kanalad. Vl 1953 nimitihe žilod Volgo-Donsk (ven.: Волго-Донск), sil-žo vodel täuttihe Cimlänskan vezivaradint. Žilo sai lidnan statusad vn 1956 2. päiväl kül'mkud.

Volgodonsk šingotase atomreaktoriden tegimel^[1] («Atommaš») i mašinansauvomižen toižil tegimil, sauvondmaterialiden pästandal (puižed apakod, beton, raudbetontegesed), sömtegimištol (maidkombinat, kalakombinat, leibtegim), Rostovan AES:an ekspluatacijal (vll 2001−2010 Volgodonskan AES) i järedal jogiportal, mugažo kodihimijan tegim^[2] radab.

Geografijan andmused

Lidn sijadase Cimlänskan vezivaradimen padoseinänno, Donan hural randal, 50 m. ü.m.t. keskmäižel korktusel. Vezivaradimen pind om 35 m ü.m.t. kortte. Irrigacine Donan magistraline kanal zavodiše lidnas.

Matkad Rostovhasai Donal om 189 km päivlaskmha orhal, 241 km avtotel vai raudtel. Lähembaine lidn om Cimlänsk vides kilometras pohjoižhe orhal, avtotedme vai raudtedme Donan vastrandal. Volgodonsk röunatab Volgodonskan rajonanke suves i päivlaskmas, Cimlänskan rajonanke lodehes i pohjoižes, Dubovskojen rajonanke päivnouzmas.

Klimat om ven kontinentaline. Voden keskmäine lämuz om 9,6 C°. Paneb sadegid 466 mm vodes, läz tazomäras kuidme.

Tobmuz

Volgodonsk om lidnümbrikon üks'jäižeks eländpunktaks.

Lidnümbrikon tobmuden pämez' om sen Duman ezimez'. Lidnan Dum kogoneb 25 deputataspäi. Edeline lidnan pämez' — Duman ezimez' om Lüdmila Tkačenko (reduku 2015 — reduku 2020). Lidnan Administracijan pämez' om Vadim Kuleša vspäi 2023. Edeline Administracijan pämez' om Viktor Mel'nikov (2017−2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 170 841 ristitud. Kaik 171 471 eläjad oli lidnas vl 2017. Kaikiš suremb lidnan ristitišt oli 181..184 tuhad eläjid vl 1991−1998 (184 tuh. rist. vl 1995).

Rahvahad (2010): venälaižed — 92,7 %, ukrainalaižed — 2,8 %, toižed rahvahad — 4,5 %.

Ortodoksižen hristanuskondan 14 pühäpertid^[3] oma saudud lidnas: kafedraline Raštvoiden päjumalanpert' (letihe vll 2001−2012), kümne jumalanpertid, koume časounäd. Om saudud protestantizman severt-se pühäpertid.

Professionaližen keskopendusen aluzkundad oma pedagogine i medicinine^[4] kolledžad, nell' tehnikumad, sauvondškol i Sal'skan kozakišton proflicein filial. Kaks' üläopendusen aluzkundoiden filialad ratas lidnas: Moskvan «MIFI:n» tedoiduzkeskuz i inženeriž-tehnine institut^[5], Donan valdkundaline tehnine universitet (Rostov Donal) — Tehnologijoiden institut^[6].

Galerei

Lidnan Duman i Administracijan sauvuz (2008)
Majak vezivaradimen randal (2010)
Raštvoiden kafedraline päjumalanpert', vn 2012 nägu
Baptizman pühäpert', vn 2010 nägu
Atommašan inženerine keskuz vl 2015
Rostovan AES vl 2018
Kul'turkeskuz Kurčatovan nimed vl 2009
Volgodonskan politehnine tehnikum (2009)
Lidnan avtostancii vl 2014
Volgodonskai-päraudtestancijan sauvuz vl 2009

Homaičendad

Irdkosketused

Volgodonsk Vikiaitas

	Rostovan agjan lidnad
	Aksai \| Azov \| Bataisk \| Cimlänsk \| Doneck \| Gukovo \| Kamensk Šahtil \| Konstantinovsk \| Millerovo \| Morozovsk \| Novočerkassk \| Novošahtinsk \| Proletarsk \| Rostov Donal \| Rusked Sulin \| Sal'sk \| Semikarakorsk \| Šahti \| Zernograd \| Zverevo \| Taganrog \| Vauged Kalitv \| Volgodonsk

[1] Volgodonskan atomreaktoriden tegimen sait (aemtech.ru). (ven.) (angl.)

[2] Volgodonskan himižen tegimen sait (вхз-кристалл.рф). (ven.)

[3] Volgodonskan pühäpertid sobory.ru-saital. (ven.)

[4] Volgodonskan medicinižen kolledžan sait (vmedcollege.ru). (ven.)

[5] Volgodonskan inženeriž-tehnižen institutan sait (viti-mephi.ru). (ven.)

[6] Volgodonskan Tehnologijoiden institutan sait (vis2.ru). (ven.)

[1]

[2]

[3]

[4]

[5]

[6]