Sursk

Sursk
Сурск

Valdkund	Venäma
Eläjiden lugu (2021)	6,034 ristitud
Pind	6,37 km²
Pämez'	Aleksei Pervušin (reduku 2024—)
Telefonkod	7−84 158-xx-xxx
Avtokod	58
Aigvö	UTC 3 (MSK 0)

Sursk (ven. i tot.: Сурск) om Venäman lidn da lidnankund Penzan agjan päivnouzmas. Mülüb Gorodiščen rajonha, sen kahtenz' lidn i nellänz' eländpunkt eläjiden lugun mödhe.

Istorii

Eländpunktan aluz om pandud Astafjev-pomeššikal vl 1849 kuti Nikol'skii-futor (ven.: Никольский хутор) vatefabrikanno. Kätihe sidä lidnanvuiččes Nikol'skii futor-žiloks vl 1928. Vl 1941 valamižmehanine tegim oli evakuiruidud sihe Višnii Voločok-lidnaspäi. Žilo sai lidnan statusad Sursk-nimitisenke vn 1953 elokus, nimitihe jogen mödhe.

Sursk šingotase savičun tegimel i leibtegimel. Järed rujopoligon täudase läz lidnad.

Geografijan andmused

Lidn sijadase rajonan suves, Sur-jogen üläjoksmusen hural randal tobjimalaz (Volgan oigedpol'ne bassein), 220 m ü.m.t. keskmäižel korktusel.

Matkad Penzhasai om 48 km päivlaskmha-lodeheze orhal vai 76 km avtotel. Lähembaine lidn om Gorodišče-rajonkeskuz 22 km pohjoižhe orhal vai 27 km avtotedme. Lähembaine Asejevskai-raudtestancii (ven.: Асеевская) radab koumes kilometras pohjoižhe lidnaspäi, «Penz — Sizran'»-keskustal.

Tobmuz

Sursk om lidnankundan üks'jäižeks eländpunktaks. Lidnankundan pind — 6,37 km².

Lidnankundan tobmuden pämez' om sen Ezitajiden suiman ezimez'. Edeline suiman ezimez' om Tat'jana Dibina (Татьяна Дибина, sügüz'ku 2019 — reduku 2024). Valentina Kirillova radab lidnan Administracijan pämehen velgusentäutajaks vn 2024 redukuspäi. Edeližed lidnan Administracijan pämehed oma Šamil' Nazirov (kül'mku 2020 — reduku 2024), Jekaterina Tačukova (viluku 2018 — kezaku 2020), Al'fija Jumajeva (tal'vku 2015 — viluku 2018).

Eläjad

Vl 1939 lidnan ristitišt oli 7 222 eläjad. Vn 2010 Venäman rahvahanlugemižen mödhe lidnan eläjiden lugu oli 7 034 ristitud, rajonan kahesandez, vn 2021 — 6 034 ristitud. Kaik 6 393 eläjad oli lidnas vl 2017. Kaikiš suremb lidnan ristitišt oli 11 608 eläjad vl 1959.

Rahvahad (2010): venälaižed — 78,7 %, totarlaižed — 15,2 %, mordvinalaižed — 4,9 %, toižed rahvahad — 1,2 %.

Ortodoksižen hristanuskondan Kazanin Jumalanmaman jumalaižen jumalanpert' om letud vspäi 2002.

Lapsiden opendusen aluzkundad oma kaks' päivkodid, aluzškol, keskškol, čomamahtoiden škol. Lähembaižed professionaližen opendusen aluzkundad ratas Penz-, Zarečnii- i Kuzneck-lidnoiš.

Irdkosketused

• Lidnan lehtpoled Gorodiščen rajon oficialižel gorodishe.pnzreg.ru-saital. (ven.)