Pereslavl' Zalesskii

Pereslavl' Zalesskii
Переславль-Залесский

Lidnanznam	Flag
Valdkund	Venäma
Eläjiden lugu (2017)	39,105 ristitud
Pind	23,01 km²
Pämez'	Vladimir Volkov (reduku 2018—)
Telefonkod	7−48 535-xx-xxx
Avtokod	76
Aigvö	UTC 3 (MSK 0)

Lidnan kart (2014)

Pereslavl' Zalesskii (ven.: Переславль-Залесский) om Venäman lidn da lidnümbrik Jaroslavlin agjan suves. Se om agjan nellänz' lidn eläjiden lugun mödhe, mugažo om Pereslavlin rajonan administrativižeks keskuseks (ei mülü sihe).

Pereslavl' Zalesskii mülüb turizman tetabha «Kuldaine rengaz»-maršrutha (292 tuh. turistoid vl 2009) kahesan lidnan keskes.

Istorii

Kleščin-lidnut (ven.: Клещин) oli olmas 11.-12. voz'sadal pohjoižhe järven randadme. Eländpunktan aluz om pandud Jurii I Pit'kkäded-ruhtinasel vl 1152 kuti Pohjoižpäivnouzmaižen Venän ezmäine Perejaslavl'-pälidn, nimitihe amuižemban Perejaslavl' (nüg. Ukrain) lidnan mödhe. Uden pälidnan aluz oli amuižen Vladimiran surtte. Pereslavlin puine kreml' oli olmas lidnan alusenpanendaspäi vhesai 1759, sen maižed pudotesed oma kaičenus. Kadoti pälidnan statusad Jurijan I surman jäl'ghe vl 1157. Kuldaižen ordan väged anastihe da poltihe lidnad vll 1238, 1252, 1282, 1293, 1382, 1408 i 1419. Kerdan tulihe Jaroslavlin (1294), Tverin (1304), Litvanman (1372) i Pol'šanman (1608) väged.

Vll 1175−1302 oli Perejaslavl' Zalesskijan kunigahusen pälidnaks, sid' alištui Moskvan tobmudele. Virktas i nimitadas lidnad nügüdläižikš («ja»-kirjamita) 15. voz'sadaspäi. Vll 1688−1692 ezmäine Venäman laivišt oli saudud Pleščeevo-järvel Suren Petran ohjandusel.

Pereslavl' Zalesskii šingotase turizmal, «Slavič»-tegimel (paimižmaterialad, fotomaterialad, pakuitezbumag i materialad mikroelektronikan täht), sauvondmaterialiden tehmižel (lämuzizoläcii, kleindlent, sauvondblokad), polimerižen pakuitesen tegimel sömsarakon täht, mugažo tekstil'fabrik i leibtegim ratas lidnas.

Geografijan andmused

Lidn sijadase Pleščeevo-järven suvipäivnouzmaižel randal (ven.: Плещеево озеро, 51 km², Volgan oigedpol'ne bassein), 142 m ü.m.t. keskmäižel korktusel. Trubež-jogi (36 km pitte) lankteb järvhe Kalaslabad-fartalas (ven.: Рыбная слобода). Matkad Jaroslavlihesai om 117 km pohjoižhe-pohjoižpäivnouzmha orhal vai 125 km avtol. Lähembaižed lidnad oma Vladimiran agjas: Aleksandrov 39 km suvhe orhal vai 72 km avtotedme sen päivlaskmaiženke Strunino-ezilidnanke.

Federaline «Moskv — Arhangel'sk»-avtote (M8-trass) ümbärdab lidnad suvipäivnouzmaižes polespäi. Kaks'kümnekilometrine sarak tuleb lidnha suvipäivnouzmaižes Berendeevo-žilospäi («Moskv — Jaroslavl'»-raudtekeskust), se radab vaiše jüguiden täht. Lähembaine avtotedme passažiroiden raudtestancii sijadase Räzancevo-žilos 20 km päivnouzmha. Lidn da järv mülüdas rahvahaližhe «Pleščeevo-järv»-puištho.

Pereslavl' Zalesskii om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 41 925 ristitud. Kaikiš suremb lidnan ristitišt oli 43..44 tuhad eläjid vll 2000−2003 (44 900 rist. vl 2000). Ortodoksižen hristanuskondan kuz' jumalankodid (nell' oma väges) i ühesa jumalanpertid oma olmas lidnas, sidä kesken amuine Spasan Toižetamižen päjumalanpert' (om saudud vll 1152−1157). Dendropuišt om sätud lidnas.

Pereslavl' Zalesskijan kolledž Aleksandr Nevskijan nimed (kinofotohimii) om professionaližen opendusen aluzkundaks.

Galerei

• 
  «Viktorija-Plaza»-adivpert' (2017)
• 
  Ph. Mikita Gotalaižen mez'jumalankodi i Pleščeevo-järv, vn 2010 nägu
• 
  Pereslavlin tehnopark vl 2014
• 
  Pereslavlin kolledž (2013)
• 
  Sportkeskuz (2013), «Slavič»-tegim om tagamal

Irdkosketused

• Pereslavl' Zalesskijan sijaližen tobmuden aluzkundoiden oficialine sait (admpereslavl.ru). (ven.)
• Pereslavl' Zalesskijan turizman sait (tourismpereslavl.ru). (ven.)