Oulainen

Oulainen (veps. i suom.)
Oulainen / Oulais (roč.)
	Lidnanznam;
Valdkund	Suomenma
Eläjiden lugu (2024)	6,922 ristitud
Pind	597,54 km²
Pämez'	Riikka Moilanen; (2021—)
Telefonkod	358-
Aigvö	tal'vel UTC 2,; kezal UTC 3

Oulainen (mugažo suomen kelel, roč.: Oulainen / Oulais) om lidn da lidnankund Suomenman keskuzpalan päivlaskmas. Mülüb Pohjoižpohjanma-agjha, sen kahesanz' lidn üks'toštkümnespäi eläjiden lugun mödhe.

Istorii

Municipalitetan aluz om pandud vl 1865. Oulainen-raudtestancii radab jogen oiktal randal vspäi 1886. Kätihe žilod lidnanvuiččeks (suom.: kauppala) vl 1967, anttihe lidnan statusad (kaupunki) vl 1977.

Oulainen šingotase radkengiden fabrikal («Sievin Jalkine», vspäi 1951), raudan metallurgijan ročin SSAB-kompanijan tegimel, kahtel sauvondkompanijal («Lehto Group» i «Rakennusliike Sorvoja Oy»), mecpilindan tegimel («Junnikkala Oy»). Oulun sättutoitud tedoiden universitet i Taukokangas-reabilitaciikeskuz oma järedad radonandajad mugažo. Jogavoččed aigtegod oma Veteranoiden mašinoiden rahvahaline jarmank (suom.: Waltakunnalliset Weteraanikonepäivät) i Oulainenan muziknedalid (Oulaisten Musiikkiviikot).

Geografijan andmused

Lidn sijadase agjan suvipäivlaskmas, Pühäjogen molembil randoil (suom.: Pyhäjoki 166 km pitte, lankteb Botnižhe lahthe).

Matkad agjan Oulu-keskushesai om 89 km pohjoižhe-pohjoižpäivnouzmha orhal, 101 km avtol vai raudtel, Hel'sinki-pälidnhasai — 456 km suvhe orhal, 535 km avtotedme vai raudtel. Lähembaižed lidnad (avtoteidme) oma Haapavezi 35 km päivnouzmha-suvipäivnouzmha, Üliviesk 35 km suvipäivlaskmha, Kalajogi 46 km päivlaskmha, Raahe 66 km pohjoižhe. Raudtestancii om saudud «Üliviesk — Oulu»-keskustal.

Vn 2022 andmusiden mödhe lidnankundan pind om 597,54 nellikkilometrad, sidä kesken kuiv ma — 587,84 km², vezi i sokaz tahond ottas 9,70 km².

Tobmuz

Kaik kuz' küläd alištudas lidnan tobmudele keskuzrajoniden ližaks: Kilpua, Lehtopää, Matkaniv (suom.: Matkaniva), Petäjäskoski, Piipsjärvi, Honkarand (Honkaranta). Oulainenan municipaline suim kogoneb 27 ezitajaspäi.

Edeližed lidnan pämehed oma Hannu Kaartinen (kül'mku 2017—), Esa Sippola (radoi vll 2004−2017).

Eläjad

Vl 1980 lidnankundan eläjiden lugu oli 7 885 ristitud, vl 2000 — 8 203 ristitud, vl 2010 — 7 889 ristitud, vl 2020 — 7 268 ristitud. Kaikiš suremb kundan ristitišt oli 8 444 eläjad vl 1995. Koume eläjad nelläspäi elädas lidnankundan keskuses.

Mamankelen mödhe (2016): suomen kel' — 98,8 %, ročin kel' — 0,2 %, toižed keled — 1,0 %.