Navoloki

Navoloki
Наволоки

Lidnanznam	Flag
Valdkund	Venäma
Eläjiden lugu (2021)	8,167 ristitud
Pind	10 km²
Pämez'	Vadim Koptev (kül'mku 2023—)
Telefonkod	7−49 331-xx-xxx
Avtokod	37
Aigvö	UTC 3 (MSK 0)

Navoloki (ven.: На́волоки) om Venäman lidn da lidnankund Ivanovon agjan pohjoižpäivnouzmas. Se om Kinešman rajonan üks'jäine lidn.

Istorii

Eländpunkt mainitase ezmäižen kerdan vl 1775. Vl 1880 Vičugan torgovanoiden kanghiden fabrik radaškanzi Navoloki-žilos. Se oli radnikžiloks vspäi 1925, sai lidnan statusad vn 1938 semendkus. Vll 1935−1958 oli Navolokin rajonan keskuseks. Lidnan päiv znamoičese kezakun koumandel sobatal.

Navoloki šingotase tekstiližel tegimištol: bumagkanghiden kombinat, omblendfabrik.

Geografijan andmused

Lidn sijadase rajonan lodehližes čogas, Volgan Gor'kijan vezivaradimen oiktal randal, 120 m ü.m.t. keskmäižel korktusel.

Matkad Ivanovohosai om 80 km suvipäivlaskmha orhal vai 111 km avtotel. Toižed lähembaižed lidnad oma Kinešm-rajonankeskuz (ei mülü rajonha) i Zavolžsk (raudtestancijad) kümnes kilometras päivnouzmha orhal vai avtotedme. Raudtesarak tuleb Kinešmaspäi, se radab vaiše jüguiden täht.

Tobmuz

Kaik koume žilod i 15 küläd mülüdas lidnankundha Navolokin ližaks, niiden kesken kuz' küläd oliba kaikenaigaižeta ristitištota vl 2010. Lidnankundan pind — 94,97 km².

Lidnankundan tobmuden pämez' om sen Administracijan pämez'. Edeližed lidnan Administracijan pämehed oma Aleksandr Sadovskii (eloku 2022 — kül'mku 2023), Aleksandr Kostin (sügüz'ku 2020 — heinku 2022), Viktor Ivanov (kül'mku 2015 — sügüz'ku 2020). Lidnan Nevondkundan ezimez' om Aleksei Rumäncev vn 2022 kezakuspäi.

Eläjad

Vl 1939 lidnan ristitišt oli 12 301 eläjad. Vn 2010 Venäman rahvahanlugemižen mödhe lidnan eläjiden lugu oli 10 206 ristitud, lidnankundan — 13 475 ristitud, rajonan koume videndest. Vn 2021 rahvahanlugemižen mödhe lidnan ristitišt oli 8 167 eläjad. Kaik 9 546 ristitud elihe lidnas i 12 639 ristitud kaikes lidnankundas vl 2017. Kaikiš suremb lidnan ristitišt oli enamba 13 tuhad eläjid vozil 1959−1970 (13 832 rist. vl 1959).

Rahvahad (2010): venälaižed — 97,0 %, ukrainalaižed — 1,4 %, toižed rahvahad — 1,6 %.

Ortodoksižen hristanuskondan üks'jäine pühäpert' om saudud lidnas, se om Jumalanmaman Emäganpäivän jumalanpert' (1785).

Lapsiden opendusen aluzkundad oma severz'-se päivkodid, kaks' keskškolad (nomer 1 i 4), muzikškol, lapsiden da norišton sportškol. Professionaližen opendusen aluzkundad ratas lähembaižiš lidnoiš.

Irdkosketused

• Lidnankundan tobmuden sait (navoloki.ru). (ven.)