Litkarino

Litkarino
Лыткарино
Lidnanznam;	Flag;
Valdkund	Venäma
Eläjiden lugu (2023)	66,079 ristitud
Pind	17,29 km²
Pämez'	Konstantin Kravcov; (kül'mku 2020—)
Telefonkod	7−495-xxx-xx-xx
Avtokod	50, 90, 150, 190, 750
Aigvö	UTC 3 (MSK 0)

Litkarino (ven.: Лытка́рино) om Venäman lidn da lidnümbrik Moskvan agjan keskuzpalan suvipäivnouzmas. Se om Moskvan suvipäivnouzmaine ezilidn.

Istorii

Žilo alištui Moskvan Kremlin Čudon jumalankodin (ei ole kaičenus) tobmudele 15.-17. voz'sadoil. Eländpunkt mainitase ezmäižen kerdan jumalankodin vn 1429 kirjeižes kuti Litkorino-žilo. Saihe vauktad kived žilonno. Vspäi 1939 oli lidnanvuiččen žilon statusanke. Ühtištadihe lähižidenke žiloidenke da külidenke aigan mändes. Vl 1957 lidnanvuitte žilo sai lidnan statusad. Genplanan mödhe lidnan ristitišt voib ližatas 150 tuhazesai eläjid.

Litkarino šingotase aviasauvomižen tegimil (likutimed), ladimensauvomižen tedoinstitutal^[1] (atomreaktorad), sauvondmaterialiden pästandal (sendvičpaneliden tegim, «Starateli»-sauvondsegoitused), optižen stöklan järedal tegimel^[2] (kvarcletken sijaližel torhudel, optižed ladimed mugažo), karakatoiden edheotandal i sömkombinatal. «Avantaž»-datakeskuz radab lidnas.

Geografijan andmused

Lidn sijadase Moskv-jogen hural randal, vedase kümne kilometrad pidust' sidä, 150 m ü.m.t. keskmäižel korktusel. Matkad Moskvhasai (Moskvan rengazavtotehesai) om kuz' kilometrad lodeheze. Toižed lähembaižed lidnad oma Kotel'niki i Lüberci (raudtestancii) vides kilometras pohjoižhe, Žukovskii 12 km päivnouzmha, Vidnoje 14 km suvipäivlaskmha, Dzeržinskii üks' kilometr lodeheze.

Vspäi 1947 raudte om saudud lidnas, se om vaiše jüguiden täht. Turaevo-jüguport om saudud Moskvanjogen randal. Lidn ühtenzoitase ehtatimel vodes läbi (laivad il'mpölusel) Moskvan oiktanke randanke.

Tobmuz

Litkarino om lidnümbrikon üks'jäižeks eländpunktaks.

Lidnümbrikon pämez' om sen Administracijan pämez'. Edeline lidnan Administracijan pämez' om Jevgenii Serögin (keväz'ku 2010 — kül'mku 2020). Lidnümbrikon Deputatoiden nevondkundan ezimez' om hän-žo, Jevgenii Serögin, vn 2020 redukuspäi. Edeline nevondkundan ezimez' om Vasilii Deräbin (kül'mku 2016 — reduku 2020).

Eläjad

Vl 1939 žilon ristitišt oli 6 366 eläjad, vl 1959 lidnan — 25 145 eläjad. Vn 2010 Venäman rahvahanlugemižen mödhe lidnan eläjiden lugu oli 55 237 ristitud. Kaik 57 565 eläjad oli lidnas vl 2017. Kaikiš suremb lidnan ristitišt om nügüd', uz' järed pertišt projektiruiše.

Rahvahad (2010): venälaižed — 93,2 %, ukrainalaižed — 1,4 %, toižed rahvahad — 5,4 %.

Ortodoksižen hristanuskondan koume jumalanpertid^[3] oma kaičenus lidnas, niiden kesken üks' pühäpert' om vanhuskolaižiden.

Litkarinon tehmištoliž-gumanitarine kolledž^[4] (Dubnan universitetan filial) om lidnan professionaližen opendusen aluzkundaks.

Galerei

«Petrovskoje»-usadiban päine sauvuz (2012)
Jumalanmaman sündundan pühäpert' (vanhuskolaižed, 1905−1907), vn 2016 nägu
Volkuš-järv i kar'jer Tomilinon puištos vl 2008
«Mir»-kul'turkeskuz pätorgul
Turaevo-port vl 2010

Homaičendad

↑ Ladimensauvomižen tedoinstitutan sait (niipriborov.ru). (ven.) (angl.)
↑ Litkarinon optižen stöklan tegimen sait (lzos.ru). (ven.)
↑ Litkarinon pühäpertid sobory.ru-saital. (ven.)
↑ Litkarinon tehmištoliž-gumanitarižen kolledžan sait (lp-gk.ru). (ven.)

Irdkosketused

Lidnümbrikon tobmuden sait (lytkarino.com). (ven.)
Lidnan informacine sait (lytkarino.info). (ven.)

Litkarino Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Ladimensauvomižen tedoinstitutan sait (niipriborov.ru). (ven.) (angl.)

[2] Litkarinon optižen stöklan tegimen sait (lzos.ru). (ven.)

[3] Litkarinon pühäpertid sobory.ru-saital. (ven.)

[4] Litkarinon tehmištoliž-gumanitarižen kolledžan sait (lp-gk.ru). (ven.)

[1]

[2]

[3]

[4]