Konakovo

Konakovo
Конаково

Lidnanznam	Flag
Valdkund	Venäma
Eläjiden lugu (2021)	33,560 ristitud
Pind	39,03 km²
Telefonkod	7−48 242-xx-xxx
Avtokod	69
Aigvö	UTC 3 (MSK 0)

Konakovo (ven.: Конако́во) om Venäman lidn Tverin agjan suvipäivnouzmas. Se om agjan kudenz' lidn eläjiden lugun mödhe, om Konakovon ümbrikon (edel vn 2023 semendkud — rajonan) administrativižeks keskuseks da palaks, sen üks'jäine lidn.

Istorii

Eländpunktan aluz om pandud kut Kuznecovo-žilo vl 1806. Vspäi 1929 sen nimi om Konakovo Porfirii Konakov-revolücioneran kanzannimen mödhe. Vodele 1936 lähižen Korčevanlidnan eläjad (läz koumed tuhad) oliba sirtud Konakovoho Ivan'kovon vezivaradimen sauvondan tagut. Konakovo sai lidnan statusad vl 1937.

Konakovon ižandusen päsarakod oma sauvondmaterialiden tegimišt (terazkonstrukcijad) da sömtegimišt (leibänkombinat, maidtegim, osötran kazvatandan tegim), mugažo fajanstegim (alusenpanend 1809, tegim Kalininan nimed nevondkundaližen aigan, vspäi 2006 radab vaiše paloin) i Konakovon GRES ratas lidnas. Ende mehaniziruidud instrumentan tegim radoi mugažo.

Geografijan andmused

Lidnan sijaduz rajonas i agjas vn 2006 kartal

Lidn sijadase ümbrikon pohjoižpäivnouzmas, läz Donhovk-jogensud Volgan oiktal randal (Ivan'kovon vezivaradim), 124 m ü.m.t. keskmäižel korktusel.

Matkad Tverihesai om 55 km lodeheze orhal vai 82 km avtotedme. Lähembaine lidn om Dubn (Moskvan agj) 25 km pohjoižpäivnouzmha orhal vai 32 km avtotedme.

Tobmuz

Lidn i rajonan kundad vl 2005

Konakovon lidnankund oli vll 2005−2023. Kaik viž pen't küläd da pen' Energetik-žilo mülüiba lidnankundha Konakovon ližaks. Lidnankundan pind oli 81,5 nellikkilometrad.

Lidnankundan tobmuden pämez' oli sen Deputatoiden nevondkundan ezimez'. Nevondkund om pästtud radmaspäi vn 2024 kezakus, Jelena Ganzük radoi sen likvidatoran vn 2024 sulakuspäi, edel händast Irina Korotenkova (kül'mku 2023 — sulaku 2024). Nened ristitud radoiba nevondkundan ezimehen: Aleksandr Dzübak (reduku 2020 — kül'mku 2023), Dmitrii Kozirev (viluku 2019 — reduku 2020), Valerii Maksimov (2006 — uhoku 2018). Lidnankundan Administracijan ezmäine varapämez' (mer) oli Dmitrii Kolupanskii vn 2021 kezakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 41 291 ristitud, lidnankundan — 42 094 ristitud, rajonan pol', vn 2021 lidnan — 33 560 ristitud. Kaik 39 345 eläjad oli lidnas vl 2017. Kaikiš suremb lidnan ristitišt oli 44 600 eläjad vl 1998.

Ortodoksižen hristanuskondan viž pühäpertid oma letud lidnas: nell' jumalanpertid i časoun'. Kaks' tošt jumalanpertid ei ole kaičenus. Baptizman loičendpert' om avaitud.

Lapsiden opendusen aluzkundad oma ühesa nimitadud i nomeruidud päivkodid (nomer 1, 3, 6, 7, 9..12, 14), seičeme keskškolad (nomer 1..3, 6..9), gimnazii (nomer 5), specialine (korrekcine) škol VIII toižendan, čomamahtoiden škol, lapsiden da norišton Olimp-sportškol üks'borcuindoiden sportškol. Konakovon kolledž, energetine kolledž (MEI:n filial), mugažo Moskvan i Tverin üläopendusen aluzkundoiden nell' tošt filialad oma lidnan professionaližen opendusen aluzkundoikš.

Transport

Avtobusad (viž maršrutad) da maršruttaksid (nell' maršrutad) oma kundaližeks transportaks lidnas, ned-žo ühtenzoittas ezilidnoidenke da Tverinke. Konakovon GRES-raudtestancii om lopstancijaks «Klin — Konakovo»-jonol, om ezilidnelektrojonusid Moskvhasai. Jogivaldmad oma lidnas lebukateriden täht.

«Moskv — Piter»-avtote i raudte ristikoitas tahondad kaks'kümnes kilometras suvipäivlaskmha lidnaspäi.

Galerei

• 
  Kundoidenkeskeine kirjišt (2008)
• 
  Sportpert'kulu (2013)
• 
  Konakovon GRES vl 2013
• 
  Veziproblemoiden tedoinstitut (2004)
• 
  «Konakovo River Klab»-adivpertin pala (2013)

Irdkosketused

• Lidnan da sen ümbrikon tobmuden sait (konakovoregion.ru). (ven.)