Elektrogorsk

Elektrogorsk
Электрогорск

Lidnanznam	Flag
Valdkund	Venäma
Eläjiden lugu (2020-01-01)	22,653 ristitud
Pind	39,81 km²
Pämez'	Denis Semönov (tal'vku 2016—)
Telefonkod	7−49 643-x-xx-xx
Avtokod	50, 90, 150, 190, 750
Aigvö	UTC 3 (MSK 0)

Elektrogorsk (ven.: Электрого́рск) om Venäman lidn da lidnümbrik Moskvan agjan pohjoižpäivnouzmas. Röunatab Pavlovskii Posadan i Orehovo-Zujevon lidnümbrikoidenke.

Istorii

Eländpunktan aluz om pandud vll 1912−1914 kuti žilo udenno elektrostancijanno (nüg. Elektrogorskan GRES), radoi sijaližel turbhal. Vn 1926 rahvahanlugemižes om kirjutadud kuti lidnanvuitte Elektroperedač-žilo (ven.: Электропередача). Žilo sai lidnan statusad nügüdläiženke nimenke vn 1946 25. päiväl sulakud. GRES radab londuseližel gazal vspäi 1985. Lidn om erine lidnümbrik vspäi 2009.

Elektrogorsk šingotase elektrusen tehmižel GRES:an abul, kahtel zell'edheotandal i medicinižiden abutusiden tehmižel, sauvondmaterialiden pästandal (metalližed konstrukcijad, elektrolaudad, iknad, puižed apakod, trotuarine apakut, asfal't), sömtegimištol (kül'menzoittud sömtavarad, alkogolitomad jomad i marjasižed želed), mašinansauvomižel (avto- i aviakohenduzmašiništ, vilugoitimed), meblin i sen furnituran edheotandoil, mugažo voižimiden, himižreagentoiden i radsobiden tehmine om lidnas. Kaks' tedokeskust: keskuz AES:oiden varuitomudes i kivivoin ümbriradmižen institut.

Geografijan andmused

Lidn sijadase 132 m ü.m.t. keskmäižel korktusel. Virk-jogi (ven.: Вы́рка 15 km pitte, Kläz'man hura ližajogi) zavodiše lidnan ani suvipäivlaskmaižen röunan taga, kävutadas lidnan puhtastadud veziden vedhuzvaluks. Om uitoid lidnan pohjoižes. Matkad Vladimiran agjhasai om 5 km pohjoižpäivnouzmha orhal. Matkad Moskvhasai (Moskvan rengazavtotehesai) om 65 km päivlaskmha-suvipäivlaskmha. Lähembaižed lidnad oma Orehovo-Zujevo suvipäivnouzmha i Pavlovskii Posad suvipäivlaskmha.

Elektrogorsk-raudtestancii radab lidnan pohjoižapalas vspäi 1925, se om 17-kilometrižen sarakon Pavlovskii Posad-lidnaspäi lopstancijaks. Edel 1995. vot se oli kaidraižuižen raudteverkon zavodindaks. Toine om «14. km»-passažirplatform lidnan suviröunal. «Volg»-mante (M7-trass) mäneb 2 km suvhe lidnaspäi. Moskvan agjan sur' rengazavtote (A108-trass) ümbärdab lidnad 3 km pohjoižpäivnouzmha.

Eläjad

Vl 1939 žilon ristitišt oli 12 370 eläjad, vl 1959 lidnan — 11 454 eläjad. Vn 2010 Venäman rahvahanlugemižen mödhe lidnan eläjiden lugu oli 22 480 ristutud. Kaikiš suremb ristitišt om 22..23 tuhad eläjid vspäi 2010 (23 085 rist. vl 2016).

Rahvahad (2010): venälaižed — 91,4%, uzbekad — 1,6%, ukrainalaižed — 1,3%, moldovalaižed — 1,2%, azerbaidžanlaižed — 1,0%, toižed rahvahad — 3,5%.

Professionaližen opendusen aluzkund om Pavlovskii Posadan tehnikuman filial.

Galerei

• 
  Elektrogorskan GRES i sen üks' vilugoitajiš uitoišpäi
• 
  Ph. Konstantinan jumalanpert'
  (vn 2009 nägu)
• 
  Kul'turkeskuz vl 2016
• 
  Elektrogorsk-raudtestancijan sauvuz
  (2009)

Irdkosketused

• Lidnümbrikon tobmuden aluzkundoiden oficialine sait (elgorsk-adm.ru). (ven.)