Artöm (lidn)

Artöm
Артём
Lidnanznam;	Flag;
Valdkund	Venäma
Eläjiden lugu (2023)	108,690 ristitud
Pind	506,4 km²
Pämez'	Väčeslav Kvon; (sulaku 2020—)
Telefonkod	7−42 337-xxx-xx
Avtokod	25, 125
Aigvö	UTC 10 (MSK 7)

Artöm (ven.: Артём) om Venäman lidn Merenrandaližen randan suves, Vladivostokan pohjoižpäivnouzmaine ezilidn.

Istorii

Eländpunktan aluz om pandud vl 1924 radnikžiloks samha burad hil't läz Zibunnii-kaivut. Nimitihe radnikžilod Födor Sergejev-revolücioneran psevdonimal (1883−1921), «Artöm-sebranik». Vl 1938 (26. reduku) žilo sai lidnan statusad.

Artöm šingotase sömtegimištol (leibänkombinat, maidtegim), metalltegesiden, sauvondmaterialiden (raudbetontegesed) i meblin pästandal, FAW-jüguavtoiden ühthekeradamižel. Artöman LEK radab hilel. Sadas burad hil't Artöman lidnümbrikos. Varažomiden zon, mägisuksiden «Sinine kukkaz»-lebutaho (ven.: Синяя сопка) da «Mererand»-azartvändzon (ven.: Приморье) oma läz lidnad.

Geografijan andmused

Reljef om erazvuitte, om järvid, jogid da kukhid lidnas. Artöm sijadase Murav'jov-Amurskijan pol'saren jurel, mägidenkeskeižes katl'uses, 40 m ü.m.t. keskmäižel korktusel, mülütab Japonijan meren Amurskijan i Ussurijskan lahtiden randoid.

Kaik viž žilod mülüdas lidnümbrikho Artöm-lidnan ližaks: Kneviči (4845 rist. vl 2010), Krolevci, Olenii, Suraževk (ven.: Суражевка), Jasnoje.

Eläjad

Vn 2010 Venäman rahvahanlugemižen mödhe lidnan eläjiden lugu oli 102 603 ristitud. Vspäi 2005 lidnümbrik om sätud, enččed Artomovskii-, Zavodskoi- da Uglovoje-radnikžilod nügüd' mülüdas lidnan territorijha, i lidnan ristitišt ližadui enamba pol'tošt kerdad. Kaik 106 732 eläjad oli lidnas i 116284 eläjad kaikes lidnümbrikos vl 2017. Kaikiš suremb lidnan ristitišt oli 109 556 eläjad vl 2021, lidnümbrikon — 118 842 eläjad sil-žo vodel, mugažo 117 974 ristitud elihe nügüdläižen lidnümbrikon territorijal vl 1979.

Ortodoksižen hristanuskondan kaks' pühäpertid^[1] oma saudud lidnas: Jumalannägundan jumalanpert' (om pühästadud vl 2007) i Pühän Jumalanmaman Blagoveššenjan kodijumalanpert'. Niiden ližaks kaks' jumalanpertid i kodijumalanpert' oma avaitud lidnümbrikon žiloiš.

Lidnan professionaližen opendusen aluzkundad oma Merenrandaline sauvondkolledž^[2], Artöman servisan i dizainan kolledž^[3], Edahaižen Päivnouzmman finansoiden da oiktusen kolledž, Energetikan da sidon tegimištoližen kolledžan (Vladivostok) filial^[4], Vladivostokan valdkundaližen universitetan filial.

Edeline lidnümbrikon pämez' om Aleksandr Avdejev (sügüz'ku 2016 — uhoku 2020).

Transport

Vn 2016 sügüz'kuspäi avtoümbärte om olmas Artömas. Avtobusad da raudted oma kundaližeks transportaks lidnas da sen ümbrištos.

Rahvahidenkeskeine soda- da civiline Vladivostok (Kneviči)-lendimport Vladimir Arsen'jevan nimed^[5] (VVO / UHWW / ВВО, 3 mln passažiroid vl 2019) sijadase koumes kilometras pohjoižhe lidnaspäi. Sišpäi tehtas reisid Kitaihe, Pohjoižkorejha da Suvikorejha, čarterreisid Uzbekistanha, mugažo Venämadme. Sodalendimbaz sijadase ühesas kilometras suvipäivlaskmha lendimportaspäi.

Galerei

Artöman LEK vl 2008
«Venecija»-adivpert' (2001)
Hilensajiden kul'turkeskuz (2013)
Uglovai-sodail'mbaz vl 2015
Avtobusstancii vl 2018
Rahvahidenkeskeižen Vladivostok-lendimportan terminal vl 2014
Kneviči-päraudtestancijan sauvuz Vladivostok-lendimportas vl 2017

Homaičendad

↑ Artöman pühäpertid sobory.ru-saital. (ven.)
↑ Merenrandaližen sauvondkolledžan sait (psk24-artem.ucoz.net). (ven.)
↑ Artöman servisan i dizainan kolledžan sait (acsid.ru). (ven.)
↑ Energetikan da sidon tegimištoližen kolledžan filial Artömas (artem.ekvl.ru). (ven.)
↑ Rahvahidenkeskeižen Vladivostok-lendimportan sait (vvo.aero). (ven.) (angl.) (kit.) (jap.) (kor.)

Irdkosketused

Lidnümbrikon tobmuden aluzkundoiden oficialine sait (artemokrug.gosuslugi.ru). (ven.)

Artöm (lidn) Vikiaitas

	Merenrandaližen randan lidnad
	Arsen'jev \| Artöm \| Dal'negorsk \| Dal'nerečensk \| Fokino \| Lesozavodsk \| Nahotk \| Partizansk \| Spassk Dal'nii \| Sur' Kivi \| Ussuriisk \| Vladivostok

[1] Artöman pühäpertid sobory.ru-saital. (ven.)

[2] Merenrandaližen sauvondkolledžan sait (psk24-artem.ucoz.net). (ven.)

[3] Artöman servisan i dizainan kolledžan sait (acsid.ru). (ven.)

[4] Energetikan da sidon tegimištoližen kolledžan filial Artömas (artem.ekvl.ru). (ven.)

[5] Rahvahidenkeskeižen Vladivostok-lendimportan sait (vvo.aero). (ven.) (angl.) (kit.) (jap.) (kor.)

[1]

[2]

[3]

[4]

[5]