Alalomov
Lidnanznam![]() |
Flag![]() |
Valdkund | Venäma |
Eläjiden lugu (2020) | 20,511 ristitud |
Pind | 14,5 km² |
![]() | |
Pämez' | Viktor Skomorohov (2005−2006, sügüz'ku 2019—) |
Telefonkod | 7−84 154-xx-xxx |
Avtokod | 58 |
Aigvö | UTC 3 (MSK 0) |
Alalomov (ven.: Ни́жний Ломо́в, erz.: Ало Ломонь) om Venäman lidn da lidnankund Penzan agjan lodehes. Se om Alalomovan rajonan administrativine keskuz.
Istorii
[vajehta | vajehtada lähtetekst]Eländpunktan aluz om pandud vl 1636 nügüdläiženke nimitusenke kuti lidnuz kaičemha tahondad i bradindsijad Kriman da Kubanin tatarlaižid vaste. Toine lähine mugoine lidnuz sijazihe Ülälomov-žilos, 10 km suvipäivlaskmha ülezjogen. Alalomov šingotihe jarmankal 18. i 19. voz'sadal. Se sai makundan lidnan statusad vl 1780.
Raudtesarak tuli lidnha vl 1927. Šostkan elektromehanine tegim oli evakuiruridud lidnha Toižen mail'man sodan aigan.
Alalomov šingotase elektromehanižel tegimel (šlibakod, metallan ümbriradmine)[1], fanerantegimel, sömtegimištol (leibtegim, vintegim).
Geografijan andmused
[vajehta | vajehtada lähtetekst]Lidn sijadase Lomovk-jogen hural randal tobjimalaz (ven.: Ломовка 74 km pitte, Mokšan üläjoksmusen hura ližajogi), 170 m ü.m.t. keskmäižel korktusel. Koume sildad ühtenzoittas jogen randoid. Matkad Mordovijan Tazovaldkundhasai om 35 km pohjoižpäivnouzmha orhal, Penzhasai om 95 km päivnouzmha-suvipäivnouzmha orhal, 110 km avtotel vai raudtel. Lähembaižed lidnad oma Kamenk 46 km suvipäivnouzmha orhal, 73 km avtotedme vai raudtedme, Spassk 55 km lodeheze orhal vai 59 km avtotedme, Kovilkino i Insar (molembad oma Mordovijas) 60 km pohjoižpäivnouzmha orhal. «Penz — Räzan'»-avtote ümbärdab lidnad pohjoižpäivnouzmaspäi. Sarakon lopstancii «Penz — Tul»-raudtekeskustaspäi. Alalomov-raudtestancii radab lidnan suves, jogen oiktal randpolel.
Alalomov om lidnankundan üks'jäine eländpunkt. Lidnankundan pind — 14,5 km².
Eläjad
[vajehta | vajehtada lähtetekst]Vl 1939 lidnan ristitišt oli 8 106 eläjad. Vn 2010 Venäman rahvahanlugemižen mödhe lidnan eläjiden lugu oli 22 678 ristitud, rajonan viž ühesandest. Kaikiš suremb lidnan ristitišt oli 26..27 tuhad eläjid vll 1989−2001 (27 400 rist. vl 1992). Vl 2017 lidnan ristitišt oli 21 189 eläjad.
Rahvahad (2010): venälaižed — 98,6%, toižed rahvahad — 1,4%.
Ortodoksižen hristanuskondan Jumalanmaman Emäganpäivän naižjumalankodi[2] om udessündutadud lidnan päivnouzmas. Jumalanmaman Kazanin jumalaižen mez'jumalankodi[3] om avaitud kahtes kilometras päivlaskmha lidnaspäi Norovk-žilos.
Alalomovan äiprofil'ne tehnikum[4] om lidnan professionaližen opendusen aluzkundaks.
Galerei
[vajehta | vajehtada lähtetekst]-
Federaližiden radnikoičendoiden pert' (2011)
-
Muštkivi lidnan alusenpanendas, vn 2011 nägu
-
Lomovk-jogi lidnanno, kezaku
-
Lentulov-pirdajan pert' (2018)
-
Alalomov-päraudtestancijan sauvuz vl 2006
Homaičendad
[vajehta | vajehtada lähtetekst]- ↑ Alalomovan elektromehanižen tegimen sait (nlemz.ru). (ven.)
- ↑ Alalomovan pühäpertid sobory.ru-saital.
- ↑ Kazanin Jumalanmaman mez'jumalankodin sait (monastir58.ru). (ven.)
- ↑ Alalomovan äiprofil'žen tehnikuman sait (sitenmt.moy.su). (ven.)
Irdkosketused
[vajehta | vajehtada lähtetekst]![]() |
Alalomov Vikiaitas |
Penzan agjan lidnad | ||
Alalomov | Belinskii | Gorodišče | Kamenk | Kuzneck | Nikol'sk | Penz | Serdobsk | Spassk | Sursk | Zarečnii | ||