Černogolovk

Černogolovk
Черноголовка

Lidnanznam	Flag
Valdkund	Venäma
Eläjiden lugu (2023)	19,027 ristitud
Pind	10 km²
Pämez'	Roman Hožajinov (tal'vku 2023—)
Telefonkod	7−49 652-x-xx-xx
Avtokod	50, 90, 150, 190, 750
Aigvö	UTC 3 (MSK 0)

Černogolovk (ven.: Черноголо́вка) om Venäman lidn Moskvan agjan pohjoižpäivnouzmas. Se om tedolidnan statusanke, Černogolovkan lidnümbrikon administrativine keskuz.

Istorii

Černogolovl'-tahond (volost') mainitase ezmäižen kerdan moskvalaižen Ivan Kalita-ruhtinasen vn 1336 (vai 1339) zavetoičendas. Černogolovk mainitaškanzihe vl 1710 kuti külä. Vl 1956 Himižen fizikan institut da žilo senno sauvoškanzihe Černogolovkas. Vodele 1970 lidn kändihe NSTÜ:n Tedoakademijan ühteks keskusišpäi. Vl 1975 anttihe lidnanvuiččen žilon statusad. Om lidnaks vspäi 2001. Tedolidnan status om sadud oficialižikš vl 2008. Lidnümbrik om sätud 2005, erištuihe Noginskan rajonaspäi.

Černogolovk šingotase fundamentaližen tedon ühesal institutal, tedotehmištol'žil edheotandoil (uded materialad, ladimed, telekommunikacine mašiništ), mugažo limonadoiden i alkogoližiden jomiden holdingal (pästleb konditerižid tegesid, snekid, lapsiden sömišt mugažo).

Geografijan andmused

Lidn sijadase lidnümbrikon keskuzpalas, Černogolovk-jogen üläjoksmusen randoil (ven.: Черноголовка 22 km pitte, Kläz'man hura ližajogi), 146..154 m ü.m.t. korktusil. Jogi läbitab nell' uitoid lidnas da sen röunanno.

Matkad Vladimiran agjhasai om kümne kilometrad pohjoižpäivnouzmha. Matkad Moskvhasai (Moskvan rengazavtotehesai) om 43 km suvipäivlaskmha. Lähembaižed lidnad (orhal) oma Noginsk 10 km suvhe, Losino-Petrovskii 15 km suvipäivlaskmha, Ščolkovo i Fräzino 20 km päivlaskmha-suvipäivlaskmha, Krasnoarmeisk 20 km lodeheze.

Moskvan agjan pen' rengazavtote (A107-trass) mäneb ühtes kilometras suvipäivlaskmha lidnaspäi. Raudtesarak tuleb lidnha Noginsk-stancijaspäi, se raudte kävutase vaiše jüguiden täht.

Tobmuz

Ivanovskoje- i Makarovo-žilod (sodapalakundanke), kuz' küläd i Goräčevk-futor mülüdas lidnümbrikho Černogolovkan ližaks. Peniden eländpunktoiden ühthine ristitišt om läz kaht tuhad eläjid. Lidnümbrikon pind — 61,68 km².

Lidnümbrikon tobmuden pämez' om sen Administracijan pämez'. Edeline lidnan pämez' om Oleg Jegorov (reduku 2018 — tal'vku 2023). Deputatoiden nevondkundan ezimez' om Svetlana Morgačeva vn 2018 redukuspäi. Edeline nevondkundan ezimez' om Oleg Jegorov (reduku 2014 — reduku 2018).

Eläjad

Vl 1979 žilon ristitišt oli 12 289 eläjad, vl 1989 — 18 488 eläjad. Vn 2010 Venäman rahvahanlugemižen mödhe lidnan eläjiden lugu oli 20 983 ristutud, lidnümbrikon — 22 450 ristitud. Vl 2021 kaik 19 530 eläjad oli lidnas. Kaik 21 621 ristitud elihe lidnas i 23 414 ristitud kaikes lidnümbrikos vl 2017. Kaikiš suremb lidnan ristitišt om 20..21 tuhad eläjid vspäi 2002 (21 925 rist. vl 2015).

Rahvahad (lidnalaižed vl 2010): venälaižed — 93,2 %, ukrainalaižed — 2,4 %, armenijalaižed — 1,3 %, toižed rahvahad — 3,1 %.

Ortodoksižen hristanuskondan kaks' pühäpertid oma avaitud lidnas: Panteleimon-spravitajan jumalanpert' i Jumalanmaman Iveran jumalaižen časoun'.

Lapsiden opendusen aluzkundad oma severz'-se päivkodid, Černogolovkan keskškol (valdkundaline, vhesai 2023 keskškolad nomer 75, 82 i Vesta), kaks' privatišt keskškolad (Uz' Černogolovkan i ŠkolÄr), čomamahtoiden škol, lapsiden da norišton sportškol. Professionaližen opendusen aluzkundad oma lidnan tedoinstitutad (aspirantur, doktorantur), kolledžad ratas lähižes Noginskas.

Galerei

• 
  Lidnümbrikon administracijan pert' (2009)
• 
  Venäman Tedoakademijan innovacine keskuz vl 2009
• 
  Teoretižen fizikan institut Landau nimed (2017)
• 
  Tedomehiden pertin nägu vl 2009

Irdkosketused

• Lidnümbrikon tobmuden aluzkundoiden oficialine sait (chgcity.ru). (ven.)