Storia de la Siera Leon
El teritorio de la Siera Leon el xe stà abità in pasà da le etnie kissi, sherbro e krim. En tel XV secolo d.C . etnie mandinga le xe rivà dal nord ; etnie emné le xe entrade dal teritorio de la Liberia de ancò; e i soussou i xe entrà e stabilì in tel sentro del paexe.
En tel 1460, l’esploratore portoghexe Pedro da Cintra el ga dato el nome Serra Leoa (Montagna del Leon) a na colina rente de do ancò sorge la cavedal, Freetown. I spagnoli i ga pi tardi canbià el nome in Siera Leon.
Sciavi
[canbia | canbia el còdaxe]El primo risultato de l’interese portoghexe par la Siera Leon el xe stà la s-ciavitù. Za in tel 1472 i s-ciavi i vegnea portadi da qi a l’America del nord. En tel XIX secolo i s-ciavi de la Siera Leon i xe stà portà tuti inte le piantagioni de la Carolina del Sud e de la Georgia. I s-ciavi leonexi i xera considerà boni parché i savea laorar el riso. Oltre a i portoghexi, inglexi e olandexi i comerciava longo la costa de la Siera Leon.
Durante la Rivolusion Americana, i inglexi i ga promesa la libartà a i s-ciavi neri che i ga decixo de conbatar co lori. Dopo la guera, sti neri i xe stà portà a Londra do la Conpania de la Baia de San Giorgio i ga dato on vitalisio a la majoria de lori. Stufi de pagar on mucho de schei, i menbri de la Conpania i ga decixo de mandar i s-ciavi in Africa do i podea costruirse on futuro in na nova tera. EL primo grupo de omeni e done i se rivà so la costa de la Siera Leon el 15 Magio 1787. Malatie e guere co i locali le ga copà quasi tuto el primo grupo. On secondo grupo de domila parsone el xe rivà in tel 1792. A sto grupo, i xe stà zontà altri s-ciavi libarà in altre situasioni. La colonia la ga tolto el nome de Freetown (sità libara) e la xe diventà la prima colonia inglexe inte l’Africa Osidentale.
La Compania de la Siera Leon, che la ga vù i diriti de sfrutamento de la colonia dal governo inglexe, no la ga dato la propietà de la tera a i novi coloni, ma solo l’uso del tereno. La zente la se sa ribeà in tel 1799 e la somosa la xe stà calmà solo co l’arivo de 500 soldadi giamaicani. Ne i ani che i xe seguii, miliari de s-ciavi i xe stà portà qi. I xera s-ciavi che vegnea da tuti i paexi de l’Africa e i ga formà on grupo creolo ciamà krio. La lengoa krio la xe diventà la lengoa franca de la colonia.
Era coloniale
[canbia | canbia el còdaxe]El governator inglexe de la Costa de l’Oro (ancò Ghana e Ganbia) el ga visù a Freetown par quasi tuto el XIX secolo. En Siera Leon ghe xera le scole pi inportanti de le colonie inglexi. El Fourah Bay College, na scola de livel universitario, la xe stà istituia in tel 1827 e la xera la sola università de stile eoropeo inte l’Africa de l’ovest.
I africani locali i ga de frecuente tentà de ribelarse al dominio coloniale de i inglexi e de i krio. La rivolta pi inportante la xe stà quela del 1896-98. Soto la guida de Bai Bureh, la opolasion la ga rifiutà de pagare la tasa so le capane. I leonexi i xera a casa sua, i no gavea da pagare tase a nisun. Dopo na serie de tentativi de inpor la tasa, i inglexi i ga dato ordine de arestar Bureh, e lu el ga dichiarà guera a i inglexi. Guerieri de le etnie tenme, limba, loko, soso, kissi e mandinga i se sa unio a la rivolta. Bureh e i so guerieri i ga vinto quasi tute le bataje fin che Bureh el xe stà caturà in tel novenbre 1898 e portà a Freetown.
Le tension le xe ndà calando in tel XX secolo e l’indipendensa la xe rivà sensa violensa. En tel 1953, Sir Milton Margai el xe stà eleto Cao Ministro par la Siera Leon e el ga laorà par la scritura de la nova Costitusion. L’indipendensa la xe rivà in tel 1961 e Margai el xe diventà el Primo Ministro de la nasion.
Potere militare
[canbia | canbia el còdaxe]Margai el xe morto in tel 1964 e el so fratelastro, Albert Margai, el ga preso el so posto. Albert Margai el ga teà de inpor el monopartitismo, ma l’oposision del Congreso de Tuto el Popolo (All People’s Congress - APC) el ga costreto Margai a canbiar idea.
En tel marso 1967, el APC el ga vinto le elesion e el so leader, Siaka Stevens, nominà primo ministro. Dopo poche ore, Stevens and Margai i xe stà aresta dal brigadiere David Lansana, cao de le forse armate de la Siera Leon. Lansana el volea spetar l’elesion de i rapresentanti tribali al parlamento prima de tor altre decisioni. El 23 marso, altri uficiali i ga arestà Lansana e formà el Consilio Nasionale de la Riforma co a cao Andrew Juxon-Smith. A so olta, anca sto Consilio el xe stà sopreso da on grupo de militari el tel aprile 1968. El primo ministro Stevens el xe sta rimeso in carica.
El governo de l’APC de Stevens el xe stà difisile. En tel novenbre 1968 el governo el ga proclamà lo stato d’emergensa. En tel 1971 i militari i ga tentà n’altro colpo de stato, che el ga falio. N’altro colpo de stato el xe stà tentà in tel 1974. En tel 1977 i studentii ga protestà violentemente contro el governo. En tel 1971, co la trasformasion in republica, Siaka Stevens el xe diventà el primo presidente de la Siera Leon. El xe stà rieleto in tel 1977.
Monopartitismo
[canbia | canbia el còdaxe]En tel 1978, Siaka Stvens el ga riproposto el monopartitismo e el parlamento el lo ga aprovà. La prima elesion soto el novo sistema la xe stà in tel 1982. El primo giro de voto, 1 magio, el xe stà anulà par i brogli. El secondo giro el 4 giunio, el ga eleto la metà de i parlamentari de l’etnia temne e l’altra metà de i mendes. Par la prima olta, el parlamento de la Siera Leon el gavea on equilibrio etnico.
Stevens el ga dato le dimision in tel novenbre 1985, dopo 18 ani de presidensa. El general magiore Joseph Saidu Momoh el xe stà eleto presidente in tel genaro 1986.
RUF
[canbia | canbia el còdaxe]En tel otobre 1990, Momoh el ga istituì na comision par vedar se el xera el caso de canbiar el monopartitismo. Dopo che la comision la ga dato parer positivo, el parlamento el ga aprovà i emendamenti a la vecia Cotitusion. Inte el fratenpo, el caitan Foday Sankoh el ga fato on amutinamento e scominsià la guerilia inte l’est del paexe.co el nome de Fronte Rivolusionalrio Unio (Revolutionary United Front – RUF).
El 29 aprile 1992, Momoh el xe stà mandà in bando da on grupo de militari che i ga fato on colpo de stato. Valentine Strasser el xe diventà presidente. En tel genaro 1996, el ministro de la difesa – Julius Maada Bio - el ga fato n’altro colpo de stato. Bio el ga promeso on ritorno rapido al governo sivile. Dopo le elesion de marso, la presidensa la xe ndà a Ahmad Tejan Kabbah. Kabbah el ga subito verto el dialogo co i guerilieri del RUF e firmà on fermè el fogo. Subito dopo, el Consilio Rivolusionario de le Forse Armate guidà, da Johnny Paul Koroma, el ga fato on colpo de stato e parà via Kabbah. Dopo 10 mexi de governo, le trupe de la Nizeria, soto el control del i governi de la region, le ga rimoso el governo militare e restituìo el posto a Kabbah.
Kabbah el ga visù momenti dificili, co somose e violense fin inte la cavedal. Miliari de sivili i xe morti durante i scontri co i ribeli in tel 1997-98, tanti de pi i xe stà mutiladi da i guerilieri che tajava man, brasi e pié a omeni, done e buteleti sensa distinsion. Le trupe nizeriane le xera pi ocupade a scavar diamanti che a mantegnar la paxe.
Le Nazioni Unie le ga mandà de i soldati par mantegnar la paxe (a partir dal otobre 1999). I soldadi de le Nasion Unie i se sa scontrà co i ribeli de Sankoh e 500 de lori i xe stà caturà da i ribeli. I inglexi i ga mandà on grupo de 800 militari par salvar i eoropei de la Siera Leon. I militari inglexi i ga conbatù contro i guerilieri del RUF e i ga anca arestà Sankoh. Le Nasion Unie le ga inposto sansion a ci che ghe conprava i diamant de la Siera Leon par fermar el finansiamento de le armi de i ribeli. El conflito el xe finio in tal genaro 2002. Pi de 50 000 leonexi i xe morti durante la guera sivile.
En tel magio 2002, Kabbah el xe stà rieleto presidente e el paexe el xe ritornà on poco a la olta a la calma. Le trupe de le Nasion Unie le xe ndà via in tel 2005. La Comision Giustisia e Verità la ga scominsià el so laoro de ricerca de i fati, de scoltar le lamentele de la zente e de stabil ci gavea pi responsabilità in tel conflito.
En tel marso 2003 la Corte Speciale par la Siera Leon l ga emeso i primi ordini de aresto. Foday Sankoh, za in prison, Sam "Mosquito" Bockarie, Johnny Paul Koroma, e Hinga Norman i xe stà i primi a esar ciamadi da la Corte. El 25 Marso 2006, el presidente nizeriano Olusegun Obasanjo el ga consegnà a la Corte Charles Tayor, vecio rible e anca presidente de la Liberia, che el ga sostegnù la guera in Siera Leon. Taylor el xe stà portà in Olanda parché no ghera le condision de sicuresa par tegnarlo in Siera Leon.
