Paso de montagna

Paso Khardung La (Karakorum)

El paso de montagna anca ciamà vargo, dogo o pasada el ze un ligamento intrà do località o vałi o conche idrogràfeghe, traerso na caena montagnoza. El pasajo zeogràfego el połe èsare traversà, e de consevensa el ligamento el połe èsare fato da un sentiero, na strada o na ferovia.

Descrision

Modełizasion del paso cofà che ła lìnea verda, co el ponto roso a indegar el ponto de seła

Caraterizà da do o pì varsanti de sałita, el vargo, propiamente dito, el ze el posto de menor altitùdine che ze nesesàrio sorpasar par poder rivar inte el versante oponesto; normalmente el ze el ponto pì alto del percorso che core seguir par móvarse da un versante a chel'altro. I itinerari de ingreso ai varghi de montagna i se carateriza par ver na trata racuanto sinoza co pendense pì o manco asentuae.

Ponesto che tante cadene montagnoze inte el mondo łe ga senpre costituio de łe grande bariere par el viajatore, i varghi łe ze divegnesti inportanti fin dai tenpi pì antighi e i ga zugà un roło esensiale par el comerso, par ła guera e par łe migrasion.

In topografia, un vargo el ga ła forma zenerałe de na seła de cavało intrà do montagne (l'altesa come funsion intrà do coordinae de pozision el ze matemategamente el ponto de seła). I varghi i se cata de frecuente pròpio sora ła sorzente de un fiume, costituindo na sorta de ponte sora łe àcue superiori de un fiume. I varghi i połe èsare racuanto curti, gavendo l'aparensa de pendenti camini verso ła sima del vargo, o i połe èsare de łe vałae de tanti chiłòmetri col ponto pì alto che el połe èsar definio e persepio solché gràsie a łe indicasion.

Le strade łe ze stae par racuanto tenpo costruie sora dei varghi, e pì odiernamente anca łe linee feroviàrie. Racuanti varghi de alta cuota i połe vere tùnel par jutar el decorimento del tràfego. La sima del vargo ła ze de frecuente l'ùgnoło tereno piato de l'àrea; divegnendo un ponto panoràmego che el vien de frecuente favorio cofà pozisionamento par nove costrusion. Par i stati che i ga confini fati da caene montagnoze, el vargo el ze de sòłito parte del confin isteso e łe atività inte el posto łe prevede de norma dei controłi de confin o na stasion doganałe e de frecuente anca na postasion militare. Par i varghi co strade, ła ze de sòlito un costumare gavere dei segnałi stradałi col nome del vargo e ła so altitùdene sora del liveło del mare.

Ghe ze tanti varghi tanto conosesti inte el mondo, cofà el vargo del Gran San Bernardo (2.473 m) inte łe Alpe, el vargo Khyber (1.027 m) intrà l'Afghanistan e el Pakistan, e el Khardung La (5.359 m) in Kashmir, India, mentre el vargo acesìbiłe a łe àuto pì alto del mondo el ze el poco conosiesto Semo La (5.565 m) inte el Tibet.

Siclismo

Inte el ànbito del siclismo, i pasi de montagna i ze partegołarmente inportanti. I coridori de serte conpetision sicliste i ga da scałar sti pasi inte el menor tenpo pusìbiłe, par cheło che la lonzitùdene e el versante i ze i fatori chde i detèrmena la dificultà del vargo de montagna.

Categorie

Drio łe so dificultà, i pasi de montagna i se clasìfega inte el siclismo in diferenti categorie. Par calcular el grado de dificultà de un paso de montagna, se dòpara ła fòrmula $GD=(h/10) p$,andove $GD$ el ze el grado de dificultà, $h$ el ze la altura totałe scałada in metri, e $p$ el ze la pendensa màsima (in persentuałe).

Na volta calcołà el grado de dificultà, la categoria ła se determina par i seventi paràmatri:

• speciałe: da 140 a 250 GD
• 1ª: da 80 a 140 GD
• 2ª: da 50 a 80 GD
• 3ª: de 30 a 50 GD
• 4ª: de 20 a 30 GD

Gałaria

• 
  Paso Stèlvio (Alpe, Itàlia)
• 
  Agua Negra paso intrà Arzentina e Chile.
• 
  Paso de ła dona morta, inte el sentiero del Machu Picchu in Perù
• 
  Paso in Tatras (Ornak, Połònia).
• 
  Paso in Slovachia
• 
  Nèpal

Altri projeti

Altri progetti

• Wikimedia Commons

• Wikimedia Commons el detien imàjini o altri file so Paso de montagna

Linganbi foresti

• valicoTreccani.it – Enciclopedie on line, Istituto de ła Ençiclopedia Italiana.
• vàlico¹Vocabolario Treccani, Istituto de ła Ençiclopedia Italiana.
• vàlicosapere.it, De Agostini.
• (IT, DE, FR) Paso de montagnahls-dhs-dss.ch, Disionàrio stòrego de ła Svìsara.