Idawltit

Tga idawltit yan umqqun n tqbilin ticlḥiyin illan ɣ idrarn n Iguzuln (جزولة) lli mi aqqran s yism n Waṭlas Mẓẓiyn. Ɣ isugam iɛṛabn da tettyubdar ddu yism Wltita (ولتيتة), tg tasuta tiss 15 taqburt akkʷ g ittyubdar ism ad.

Tiqbilin n idawltit gant tnt: Idawbaɛqil, Idawrsmuk, Idawsmlal. Ɣ mad izrin, kkant tt inn tqbilin n Tẓṛwalt d Ayt lmɛdr kcmnt ula nttnti ɣ Idawltit.

Asidg arakal

Tumẓ yan udɣar imqqurn ɣ idrarn n waṭlas imẓẓiyn d yan ugzzum zɣ uzaɣar n tznit.

Izɣuran n idawltit

Ɣ tannayt n kra n imrzzutn, Idawltit ad ibdr umsknakal alatin Bulib (Polype) g tasuta tis snat DƐ ddaw n yism: Scelatito. Ar tettini tallast is d jddis n idawltit kullu tn iga t Sidi Zuzal Aguzul lli iffɣn zɣ tmdult ḍaṛt n lliɣ txʷla, ig jddis n Sidi Ḥmad u Musa (Aḥmad Bn Musa Ssmlali) agʷrram lli s ttyunsabn inssixfn n tẓṛwalt. Ar daɣ taddra tallast ad mas iẓḍaṛ is d Idawgarsmuk ad dark izdɣ Zuzal, izdɣ darsn iwis Sidi Dris ula ntta, maccan ayyaw nns Sidi Ḥmad Bn Dris izdɣ dar ismlaln nna g ilul Sidi Ḥmad U Musa Asmlal lli immutn g 1563 DƐ.