Venus

                     زھره  Venus

زھره نظام شمسي جو ھڪ سيارو آھي جيڪو گرهن جي ترتيب سان سج جي سڀ کان ويجهي سياري عطارد (Mercury) کان پوء واقع آھي. وينس جو قطر 12104 ڪلوميٽر تي مشتمل آھي، ھن گره جو وزن ڌرتي جي لڳ ڀڳ ۽ صورت ۾ به ڌرتي جھڙا جابلو علائقا اٿس، پر کيس ڌرتي جيان ڪو چنڊ نه آھي زهره تي آبهوا به موجود آھي جنهن ۾ � ڪاربان ڊاء آڪسائيڊ گئس آھي پر آڪسيجن غير موجود اٿس، هن جي ھوا جو داٻ زمين جي آبهوا کان 92 ڀيرا وڌيڪ آھي يعني ان ۾ ڌرتيءَ جو انسان يا جانور ايتري ته چيڀاٽ محسوس ڪري جو جسم جي اندر جو رت ۽ پاڻياٺ ٻاهر نڪري اچي، وينس نظام شمسي جي مڙني گرهن مان گرم ترين سيارو آھي جنهن تي سڄو سال سراسري گرمي پد °500 سينٽيگريڊ جي لڳ ڀڳ رهي ٿو. اسان جي ڌرتيءَ وانگر وينس پنهنجي چوڌاري به ڦري ٿو ته سج جي چؤگرد به گردش ڪندو رهي ٿو، ھي زمين جي ڀيٽ ابتو ڦري ٿو ان ڪري وينس تي سج اولهه کان اُڀري ۽ اوڀر طرف لهي ٿو. وينس سَيارو ڌرتي جي نسبت سج کي وڌيڪ ويجهو هجڻ ڪري 225 ڏينهن ۾ چڪر پورو ڪري ٿو پر پنهنجي محور ۾ انتهائي سست رفتار سان ڦري ٿو، ڌرتي پنهنجي محور ۾ ھڪ چڪر 24 ڪلاڪن ۾ پورو ڪندي آهي پر زهره پنهنجي محور ۾ 2784 ڪلاڪن ۾ ھڪ چڪر مڪمل ڪندو آھي، يعني وينس سياري تي بيهي سج اُڀرڻ جو نظارو ڪجي ته ٻيو دفعو سج ڌرتي جي 116 ڏينھن کان پوءِ اُڀرندو. ھي سيارو آسمان ۾ ستارن جيان عام اک سان پڻ ڏسي سگهجي ٿو. وينس انتهائي شفاف، سفيد ۽ روشني سان چمڪندڙ آھي، ھي سج ۽ چنڊ کان پوء وڌ ۾ وڌ روشن ترين گره آھي.

تحرير: ياسر منگي رتوديرو