Regnu di Araucanía e Patagonia
|
|
| Muttu: Independencia y Libertad | |
| Innu nazziunali: Nuddu | |
| |
| Tipu di statu: | Micronazzioni |
| Lucalizzazzioni: | Cili e Argintina miridiunali |
| Data di funnazzioni: | 1860 |
| Forma di statu: | Munarchia custituzionale |
| Lingua ufficiali: | Mapuche e francisi |
| Muneta: | Peso |
Lu Regnu di Araucanía e Patagonia, o puru Nueva Francia («Nova Francia»), fu un regnu pruchiamatu, a mitati dû sèculu XIX, nnî banni dû sud dû Cili e di l'Argintina di l'abbucatu e avvinturieru francisi Orélie Antoine de Tounens. Stu regnu pritinìa a cuvirnari li tirritori dâ Patagonia situati ô sud dû ciumi Biobío, cumprinnennu li banni cileni dû Bío-Bío, di l'Araucanía e di Los Lagos. Comu capitali vinni addijuta Perquenco. Nun fu mai ricanusciutu di nuddu autru statu.
Orélie Antoine de Tounens arrivau ô portu di Coquimbo ntô 1858 e, doppu avennu passatu quarchi tempu nnî citati di Valparaíso e di Santiagu, si ndrizzau versu la pruvincia di Araucanía juncennusi ô portu di Valdivia. Ccà abbrazzau la causa dâ nazzioni Mapuche e si accordau cû cacique Quilapán, ô quali piacìu assai l'idia di organizzari nu statu ndipinnenti comu forma di risistenza a l'asèrcitu cilenu, mentri ca la Guerra di Arauco stava p'accabbarisi. Quilapán pirmittìu la trasuta di Tounens ntra li terri chi cuntrullava e ntra li quali era pruibbitu lu passaggiu ê huincas (li cileni).
Lu 17 di nuvèmmiru dû 1860 vinni pruchiamtu lu Regnu di Araucanía e li capi Mapuche addicchiararu Tounens re, cû nomu di Orélie Antoine I. Facirmenti fìciru daccussì câ spranza ca la sò causa avissi avutu megghiu furtuna siddu èranu rapprisintati d'un europeu.
Nnî jorna siquenti, Tounens prumulgau la custituzzioni dû regnu e, lu 20 di nuvèmmiru, addicchiarau l'annissioni dâ Patagonia, stabbilennu comu cunfini lu ciumi Biobío ô nord, l'Ocèanu Pacìficu ô punenti, l'Ocèanu Atlànticu ô livanti e lu Rio Negro ô sud, finu ô strittu di Magellanu. Orélie-Antoine numinau poi un cuvernu, criau na bannera nazziunali e stampau na nova muneta pâ nazzioni, lu peso.
Tounens si nni jiu a Valparaíso pi cummunicaricci la furmazzioni dû novu statu ô cuvernu dû Cili, chi tannu avìa Manuel Montt â prisidenza, e chi nun era dispostu a ricanùsciri lu novuo statu. Lu cuvernu cilenu ordinau l'arrestu di Tounens pâ sidizzioni di l'òrdini pùbbricu. Tounens vinni traspuortatu ntô jinnaru 1862, prima a Nacimiento e poi, sempri ntô Cili, a Los Angeles unni fu cunnannatu â richiusioni 'n manicomiu. Lu cùnzuli francisi riniscìu a ntirvèniri, facènnulu purtari 'n Europa, unni cci campau pi quarchi tempu 'n esiliu.