Nicodemu
San Nicodemu (m. 1083) canusciutu puru comu San Nicodemu di Palermu pi distinguìrlu dû santu di èbbica bìbblica, fu vìscuvu ortodossu di Palermu dû 1065 ô 1083, quannu la citati passau dû duminiu àrabbu â chiddu nurmannu. Nicodemu cilibbrau la cirimonia di trasuta dî Nurmanni a Palermu lu 10 di jinnaru dû 1072, ma doppu picca tempu li Nurmanni, chi avèvunu funnatu nu regnu nurmannu alliatu dû papa di Roma, sutta Ruggeru, addumannaru a Nicodemu di alluntanàrisi dâ citati. A causa dû scisma dû 1054 li Nurmanni ristauraru la chesia cattòlica.
Di na granni gintilizza e umilitati, San Nicodemu murìu ntô 1083. Lu sò corpu s'attrova nta nu sarcòfacu ntâ cripta dâ cattiddrali di Palermu.