Istadu
Artìculu in LSC
S'Istadu est una organizatzione polìtica e giurìdica chi si format de una populatzione, una sia de normas mentovadas che a "ordinamentu giurìdicu" e unu territòriu cun làcanas pretzisas in ue istat cussa populatzione e guvernat una autoridade cunforma a sas règulas de s'ordinamentu giurìdicu etotu.[1][2] S'Istadu chi sighit sas normas in piessìnniu cosa sua sene s'agiudu o peri s'infrichimentu angenu de àteros paisos est mutidu "soberanu".[3]
Sos istudiosos dant diferentes definiduras de "Istadu".[4] Sa de s'impare de territòriu, prus pòpulu, prus autoridade guvernativa, comente subra ditu, est sa teoria fundamentale, utilosa pro dessinire s'Istadu, propònnida dae Georg Jellinek.[2]
In sas sièntzias sotziales e in antropologia polìtica si podent atobiare simpres comunidades polìticas sene regulas iscritas e cun maneras informales de apoderamentu de sas resursas manchiles fentomados che a "Istados".[5][6] De custu ghetu, non manchet de cunsiderare fintzas tribù che a cussa amatzònica che a Istados.[6]
Sos istòricos tirant imbetzes a restrìnghere su cuntzetu de Istadu e a lu cunsiderare comente a su produtu de un'àndala de acudimentu de su podere polìticu in manu de una istitutzione impersonale (cunsideremus sos annos chi brincant dae su Duighentos a su Otighentos), chi esèrtzitat su podere polìticu supremu in subra sa gente chi istat in su territòriu in ue viget sa lege de su rennu chi istituit.[7][8] S'istadu, che a una istitutzione, est cussu modernu de pustis Otighentos, chi regulat sa bida, non prus de "sùdditos", ma de "tzitadinos", cando si bortat dae rennu a repùblica.
Sotziòlogu mannu est Max Weber, chi identificaiat s'Istadu cun s'istitutzione a tretu de esertzitare unu monopòliu a subra de s'impreu legìtimu de sa fortza fìsica in intro de unu territòriu dislindadu.[9] Cunforma a custa bisione esistint profintzas istados in fìeri, est a nàrrere in fràigu, istitutziones chi sunt acanta de devènnere istados cumpridos che a cussos ingiminados o abbisados dae s'istudiosu tedescu.
Riferimentos
[modìfica | modìfica su còdighe de orìgine]- ↑ In su faeddu si cunsìgia de impreare sa lìtera manna de sa "i" a inghitzu de "Istadu" pro transire ambiguidades cun su partitzìpiu passadu de su verbu èssere.
- ↑ 2.0 2.1 Enciclopedia italiana, VII Appendice, Treccani, 2007.
- ↑ Santi Romano, Corso di diritto costituzionale, 6ª ed., Padova, Cedam, 1941, p. 62.
- ↑ David Graeber, David Wengrow, L'alba di tutto. Una nuova storia dell'umanità, cap.10 Perché lo Stato non ha origini. Gli umili esordi della sovranità, della burocrazia e della politica, trad. Roberta Zupper, Rizzoli, 2022, ISBN 978 8817 15882 4
- ↑ Giuseppe Campesi, Luigi Pannarale e Ivan Pupolizio, Sociologia del diritto, Milano, Le Monnier, 2017, p. 4, ISBN 978-88-00-74711-0.
- ↑ 6.0 6.1 Luciano Gallino, Dizionario di sociologia, Torino, UTET, 1978, p. 669.
- ↑ Dizionario di politica, 2ª ed., Torino, UTET, 1983, p. 1150, ISBN 88-02-03702-7.
- ↑ (EN) Quentin Skinner, The Foundations of Modern Political Thought, vol. 2, Cambridge University Press, p. 358.
- ↑ Max Weber, Economia e società, vol. 1, Milano, Comunità, 2000, p. 53.
Artìculos ligados
[modìfica | modìfica su còdighe de orìgine]Ligàmenes esternos
[modìfica | modìfica su còdighe de orìgine]- Òperas subra de s'Istadu, in Open Library. URL consultadu s'11 cabudanni 2024.
| Controllu de autoridade | BNF (FR) cb11937050q (data) · GND (DE) 4056618-3 · LCCN (EN) sh85127474 · NDL (EN, JA) 00566274 · NKC (EN, CS) ge131523 |
|---|