Атлантида
Атланти́да, дгр. Ἀτλαντὶς — мифичный остров-держава на запад од Геракловых стовпох (Гибралтарскый пролив), подробно описаный в диалогах Платона, который ся одказуе на Солона; упоминаный тыж у Геродота ай иншых давных авторох.[1][2][3][4]
Легенда о Атлантидѣ
[едітовати | едітовати жрідло]За Атлантиду писали, же то остров, векшый, як Мала Азия и Либия довъедна. Десь, ещи за 9500 рокы до уроджѣня Солона, Атлантида была необычайно богата держава, всемогучы князьове котрой завоевали многы землѣ Середоморя, покля они не были зоперты и поражены стародавныма атенянами и их споенцями. Обывателе Атлантиды з часом ся стали злыма и безбожныма, и их остров быв пролыгнутый морьом по даколькых трясѣнях землѣ и потопах.[1][4]
Легенда о Атлантидѣ не давать покой писателям, филмарям, малярям уже третье тысячроча, на тоту тему суть написаны уже понад 6 тысяч книг.[3]
Походжѣня легенды
[едітовати | едітовати жрідло]Сучасны учены о походжѣню легенды роздѣляють ся. Една часть поважуе, же то плод творивой фантазии Платона, але друга часть звязуе легенду з именом мифичного Атласа и баями, котры походять од давных обывательох Азорскых и Канарскых островох. Вшелияко, в центрѣ интереса е нарисованый Платоном образ чудесного живота обывательох щастливой Атлантиды.[2]
Тоту красну приповѣдку выхосновав (а може и выгадав) Платон на политичне мифотворѣня, обы указав на примѣрѣ преисторичных Атен и Атлантиды вывой двох протикладных типох держав: морално и социално здоровой (преисторичны Атены) и нездоровой, деморализованой богатством и роскошом (Атлантида). Але сытость и деталность опису якраз другого типа заручили повѣданю о Атлантидѣ довгый живот. Атлантида ся стала прообразом далекого и щастливого края, ку котрому ся пак вертали наступны писателе.[4]
В свѣтлѣ наукы
[едітовати | едітовати жрідло]З погляду наукы екзистованя на днѣ Атлантичного океану заниклого континента з добы вывоя людства абсолутно вылучене.[2]
Ещи и филозоф Аристотел, ученик Платона, категорично не принимав концепцию свого учителя и якраз при спорѣ о Атлантидѣ прорек свою знамениту фразу: «Платон ми приятель, но истина дорожа». При том вшитком и меджи ученыма суть такы, котры вѣрують, же Атлантида екзистовала, едным з них быв российскый геолог, академик Владимир Обручев, писатель фантастикы и популаризатор наукы.[3]
Жерела и одказы
[едітовати | едітовати жрідло]- Atlantis //Révai nagy lexikona. 2. köt. Révai Testvérek Irodalmi Intézet Részvénytársaság, Budapest. 1911. мад. C. 251.
- Фролов Э. Д.: Атлантида // Большая российская энциклопедия. Том 2. Москва, 2005, стр. 444 Верзия:2016. Одчитане: 01.10.2020 русс.
- Atlantis. Encyclopædia Britannica. March 15, 2020. https://www.britannica.com/topic/Atlantis-legendary-island. [перевірено 2020-10-01].англ.
- Александр Городницкий. Атлантида. Энциклопедия Кругосвет. https://www.krugosvet.ru/enc/istoriya/ATLANTIDA.html. [перевірено 2020-10-01].русс.
