Michele Santoro

Europarlamendare
Michele Santoro, jndr'à 'u 2009
on. Michele Santoro
Luèche de nascite	Salerno
Date de nascite	2 luglie 1951
Partite politeche	Liste Uniti nell'Ulivo
Coalizione	PSE
Mandate	2004-2009 (dimissionarie jndr'à 'u 2005)
Titele de studie	Laurèe in filosofie
Professione	sciurnaliste, conduttore televisive

Michele Santoro (Salerno, 2 luglie 1951) ète 'n ex politeche, sciurnaliste e conduttore televisive tagliàne.

Biografije

Lauriate cu lode in filosofie a l'Università de Salerno, addò avìe pe relatore Biagge De Giovanni, docende de filosofie morale, ha accumenzate 'a militanza politeca soje jndr'à 'u gruppe maoiste Unione Comunisti Italiani e, condemboraneamende, 'a carriera sciurnalisteca soje sus a 'u quotidiane Servire il popolo, edite da 'a stesse organizzazione.

Cchiù nnande passò a 'u quindicinale d'u PCI campano La Voce della Campania, d'u quale avere divenute direttore da marze 1979 pe nove mise, quanne avenìe allundanate pe le posiziune sue eterodosse rispette a 'a linèe ufficiale d'u partito.

Collabborò allore cu L'Unità, Il Mattino e Epoca. Apprime de essere assunde in RAI jndr'à 'u 1982, ha fatiate pa radio cumme conduttore de rubbriche e autore de sceneggiate radiofonece (Via le odiate macchine, Radio Uno).

Jndr'à 'u 1998 vionge 'u Premio Cimitile cu l'opere "Michele chi?" (Edizioni Baldini & Castoldi);

'A carriera televisive

Jndr'à televisione, apprisse 'na esperienze piccenne a l'estere cu 'u TG3, ha realizzate speciale e settimanale:

• Tresette,
• Oggi dove,
• Specialmente sul Tre,
• Tg terza.

Ha state autore e conduttore de varie programme:

• Samarcanda,
• Il Rosso e il Nero,
• Temporeale.

Jndr'à 'u 1991 ha pubblecate 'u libbre Oltre Samarcanda (Ed. Sperling & Kupfer) e jndr'à 'u 1996 Michele chi? (Ed. Baldini e Castoldi).

Jndr'à 'u stesse anne ha lassate 'a RAI pe passà a Mediaset cumme direttore d'a testate Moby Dick e pò Moby's sus a Italia 1.

Jndr'à 'u 1999 ha turnate jndr'à RAI cu 'u programme Circus sus a Rai Uno. Jndr'à 'u 2000 face nascere Sciuscià. Da l'autunne d'u stesse anne jè autore e conduttore de Il Raggio Verde sus a Rai Due.

Apprisse l'11 settemmre 2001 propone, sembre sus a Rai Due, 'u speciale Siamo tutti americani? seguite da 'a serie Emergenza Guerra.

'U "case Satyricon" e le polemiche d'u cendredestre sus a Santoro

Jndr'à 'u 2001, l'inderviste a Marche Travaglio a Satyricon - addò 'u sciurnaliste parlò de fatte legate a 'a nascite de Fininvest, da le rapporte d'a famigghie Berlusconi cu 'u boss mafiuse Vittorie Mangano e de une de le urteme inderviste de Paolo Borsellino - facìe 'nzeppà 'nu sbuenne de reaziune da vanne de le politece d'a destre e Santoro dedicò a l'episodie 'na pundate d'a trasmissiona soje "Il raggio verde".

L'Authority, comannate da 'u presidende Enzo Cheli nominate da 'u Presidende d'u Conziglie Giuliano Amato, recevìe 'n'esposte de Forza Italia (le quale esponende erane proprie 'ngazzate assaije da 'u mode cu 'u quale veicolave 'a vicende Mangano-Dell'Utri in trasmissiune RAI, cumme chidde de Santoro) condre 'a pundate de Il raggio verde dedicate a 'a mafie e a 'u case Satyricon, accusate de vioplà 'a par condicio e de favorì l'Ulivo. L'Authority però ribbadisce ca «Il raggio verde non è un programma di comunicazione politica o una tribuna elettorale, ma una trasmissione di informazione e approfondimento che deve seguire l'attualità, le notizie», ribadenne pure ca, essenne 'u reggime de par condicio non angore effettivamende accumenzate, non g'è possibbele procedere in nisciune mode. Pò, seconde 'u cendredestre, 'a pundate igriminate non g'a permesse a le esponende de cendredestre de indervenì, invece, de fatte, avere state 'u cendredestre stesse a no scè a 'u dibattite in RAI (pe proteste condre 'u caso Satyricon), imbedenne a le proprie esponende de parteciparve (a 'a pundate ingriminate le raggione d'a coalizione de cendredestre avenèrene sostenute da 'u sciurnaliste [Paolo Guzzanti]] de Il Giornale).

Cchiù vote jndr'à 'u 2001, 'a trasmissione Il ragio verde, sembre accusate da 'u cendredestre de "faziosità" a favore d'u cendresinistre, dedicave assaije spazie a 'u schieramende de cendredestre, soprattutte apprisse ca 'u case Satyricon vedìe scuppià furiuse 'ngazzaminde da vanne d'u cendredestre, pe 'nu preseunde "tendative de comblotte politeche". In particolare, Santoro avìe l'ordene da l'Authority de presendà 'na pundate "riparatorie" a favore de Marcello Dell'Utri (pe conzendirle 'u deritte de repliche), condre quedde sus a 'u case Satyricon, condestate pu spazie dedicate in gran parte a 'u case Mangano-Dell'Utri; jndr'à quedda pundate riparatorie, 'u cendredestre, pe vôsce de Dell'Utri, puteve esprimere 'u proprie dissenze pu libbre "L'odore dei soldi" (scritte da Marche Travaglio e Elio Veltri), ca duranne 'a presendazione a 'a trasmissione de Daniele Luttazzi Satyricon facìe scuppià 'na polemeche sus 'a presunde comblecetà in mafie d'a famigghie Berlusconi. Comungue, 'a pundate condestate da Forza Italia (cumme cundate da 'u stesse Marche Travaglio jndr'à 'u libbre "Regime") avère trasmesse 'a reggistrazione ufficiale d'a semiscanusciute inderviste jndr'à 'u 1992 d'u giudice Paolo Borsellino a le reporter frangise Jean Pierre Moscardo e Fabrizio Calvi, addò se parlave de le legame de Berlusconi e de Dell'Utri cu Cosa Nostra, tramite personalità de mafie cumme Vittorio Mangano o Stefano Bontate.

Pò, jndr'à stessa pundate, Silvio Berlusconi indervenìe telefonicamende (scavalcanne pure le indenziune de diserzione d'u programme manifestate da vanne d'u cendredestre), accusanne 'u programme de essere "'nu processe in dirette" e sostenenne pure 'a necessità de condinuà a disertà le programme RAI pe avè cchiù garanzie de indegrità; pe ste mutive, eppure pe l'atteggiamende sus a 'u teme d'u case Satyricon avenìe duramende criticate, sus a Telemontecarlo, da 'u sciurnaliste libberale Indro Montanelli (duranne 'n'inderviste), ca accusò Berlusconi e Fini (colpevole de avere annungiate future epuraziune jndr'à RAI da vanne d'a CdL) de "fascisme squadriste" e de "grave intolleranze e senzibbiletà verse 'a satire [riferennese a 'a condestate pundate de Satyricon de Daniele Luttazzi, NdA]".

Pò, jndr'à 'na successiva pundate de Il raggio verde, Santoro mannò in onde 'a suddette videoinderviste de Telemontecarlo a Montanelli, provocanne le reaziune de Vittorio Feltri, presende in studie, ca accusò Montanelli de incoerenze; Marche Travaglio, ca pure jidde stave in studie, respunnìe a Feltri, parlanne de "golpe" de Berlusconi a 'a redazione de Il Giornale, ca luò jndr'à 'nu mode brutte proprie 'a dirigenze d'u quotidiane sue a Montanelli; cchiù nnande, Indro Montanelli telefonò direttamende jndr'à 'u studie ringrazzianne Travaglio, spieganne le vicende sue cu Berlusconi sus a 'u teme d'u quotidiano Il Giornale, congludenne cu 'nu breve dialoghe cu Feltri sus a questione d'a preseunde "incoerenze" attribbuite da Feltri a 'u stesse Montanelli.

'U 25 abbrile 2001, Forza Italia presendò a l'Authority 'u seconde esposte condre a Il raggio verde, pa pundate cu Dell'Utri; l'esposte avenìe, sta vote, accolte da l'Authority ma avenìe pò assaije condestate da 'a RAI: 'u cape de l'uffice legale Rubens Esposito, condestò duramende l'esposte pa presunde "inapplicabbeletà", 'a manganze de dettaglie su cumme avera avvenute 'a violazione e 'a manganze de possibbeletà de difese e condraddittorie, da vanne de Santoro, a 'u qyale Esposito avere ribbadite «l'incomprimibile esercizio del suo diritto di opinione e di critica del tutto compatibile e coerente con il suo ruolo di conduttore di una trasmissione puramente informativa, e non a tematiche politiche». Cchiù nnande, Forza Italia presendò otre e doje esposte a l'Authority pe cercà 'a chiusure d'u programme, ma pure sta vote avenèrene respinde e avenìe dichiarate ca 'u verdette finale de l'Authority avera essere rinviate apprisse le eleziune politeche d'u 13 masce 2001, addò Silvio Berlusconi e 'a coaliziona soje vingerene ('na vittorie ca jndr'à le sondagge avenìe viste apprime cumme quase certe, pò non ge se sapeve ce vingeve apprisse 'u svolgimende d'u programme Satyricon).

'U 20 masce 2001, 'u neoelette Presidende d'u Consiglie Berlusconi presendò 'u quinde esposte a l'Authority, ca venìe 'n'otra vote accolte e ca (pa prima vote) condannò definitivamende 'a RAI a 'na multe de 40 miliune de lire pe no avè date sufficiende prevalenze a Dell'Utri jndr'à pundate reparatorie. Ma avveramende jè date pe certe ca jndr'à quedda pundate, ca vedìe condrapposte Marcello Dell'Utri e Andonie Di Pietro, 'u prime parlò cchiù d'u doppie d'u seconde (66 minute pe Dell'Utri e 30 minute pe Di Pietro). Pò, l'Authority, jndr'à sentenza soje, non ge citò nisciuna fonde o elemende d'a pundate ingriminate ca putesse essere a prove d'a sendenze. Pe chiste e otre mutive, 'u Presidende d'a RAI Roberto Zaccaria, rifiute 'a condanne, difennenne l'equilibrie d'u programme Il raggio verde e facene ricorse a 'u TAR d'u Lazie, ma l'Authority le respunnìe purtanne 'a multe da 40 miliune a 200 miliune de lire.

L'editte bulgaro, l'allontanamende da 'a RAI e 'a reintegrazione

Jndr'à 'u novemmre 2001 accumenze Sciuscià Edizione Straordinaria. 'U 18 abbrile 2002, duranne 'na conferenza stambe a Sofia, in Bulgarie, Santoro, 'u sciurnaliste Enzo Biagi e 'u comiche Daniele Luttazzi avènene duramende attaccate da 'u Presidende d'u Consiglie Berlusconi, 'u quale l'avère definite cumme individue ca onne fatte "'n'ause crimimose d'a telavisione pubbleche" (episodie note cumme Diktat Bulgaro). Santoro repliche a stu atte censorie de Berlusconi, definenne 'u premier cumme "'nu vigliacche, ca abbuse de le putere sue pe attaccà crestiàne cchiù debbole de jidde, a le quale non ge congede 'u deritte de difese". 'U 31 masce vèje in onde l'urtema pundate de Sciuscià: 'u CdA RAI, a maggioranze de cendredestre, scangelle 'u programme, pe "mutive de tutele aziendale"; avènene licenziate e allondanate da 'a RAI pure Biagi (rapporte cessate pe scadenze d'u condratte e none rinnovate) e Luttazzi.

L'Authority, apprisse 'u seste esposte de Forza Italia, richiame a 'a RAI pure 'u programme Sciuscià Edizione Straordinaria. Cchiù nnande apprisse a ste fatte e a 'u conseguende allondanamende da l'aziende, Michele Santoro ha fatte cause a 'a RAI pu licenziamende senze giusta cause jndr'à 'na querele ca s'a congluse jndr'à 'u 2005 cu 'na sentenze d'u Giudice d'a Fatije d'u Tribbunale de Rome ca dè raggione a Santoro e allore condanne 'a RAI a 'nu risarcimende danne ca arrive a 1 milione e 400 mila € e ordene 'a reintegrazione d'u sciurnaliste jndr'à le funziune in RAI pe programme de prima serate. Cchiù nnande Santoro ha turnate cu 'nu programme RAI in prime serate, ma sulamende jndr'à 'u settemmre d'u 2006, apprisse l'insediamende d'u seconde guverne de Romano Prodi.

L'esperienza politeche

Da stu mumende trasforme quedde ca retène 'na personale "battagghie pa libbertà de 'mbormazione" jndr'à 'n'imbegne politeche: aderisce a 'u programme de Romano Prodi e se candidesce cumme parlamendare europèe jndr'à 'u 2004 pa liste de Uniti nell'Ulivo: avène elette eurodeputate. Candidate jndr'à le circoscriziune nord-ovest e sud e elette jndr'à tutte e doje, Santoro recevìe in totale cchiù o mene 730.000 preferenze ('u cchiù ierte numere de preferenze 'mbrà le none capeliste). Aderisce a 'u gruppe parlamendare d'u Partito del Socialismo Europeo inzieme a 'a colleghe Lilli Gruber, candidate jndr'à stessa liste.

A 'u Parlamende Europèe ha state membre d'a Commissione pe le libbertà civile, 'a giustizie e le affare inderne; d'a Commissione pa culture e l'istruzione; d'a delegazione a 'a commissione parlamendare miste UE-Croazia; d'a delegazione a 'a commissione de cooperazione parlamendare UE-Russia.

'U retorne in televisione

'U 19 ottommre 2005 presende le dimissiune sue da parlamendare europèe pe partecipà a 'a prima pundate d'u programme televisive Rockpolitik condotte da Adriano Celentano. Santoro rescinne 'u proprie mandate parlamendare pe nò sottostà a le limitaziune sus 'a presenze de politece in TV imboste da l'Autorità garande e, partecipe a 'a trasmissione.

A fine marze 2006 avène affidate a Michele Santoro 'nu programme televisive nuève de approfondimende incendrate sus a 'u teme politeche de "apprisse l'eleziune". 'U programme, trasmesse da Rai Due e inditolate AnnoZero, articolate jndr'à unnece pundate, avera essere trasmesse accumenzanne da 'u 27 abbrile 2006. L'avvie d'u programme, comungue, ha accumenzate 'u 14 settemmre 2006. Onne state scacchiate cumme ospite fisse 'u vignettiste Vauro, le sciurnaliste Marche Travaglio e Rula Jebreal e 'a fotomodelle Beatrice Borromeo, a parte a 'u collabboratore storeche sue Sandro Ruotolo. Jndr'à pundate inaugurale, a fine trasmissione ere presende Fausto Bertinotti. Une de le arguminde de attualità ca ha trattate 'a prima pundate d'u programme riguarde le frequende maltrattaminde de le immigrate jndr'à le accussìditte cendre de accoglienze, ditte pure Cendre de permanenze temboranèe; assai spazie ha state date pure a 'nu reportage sus 'a situazione lavorative de le operaie de l'edilizie in Lombardia, soprattutte immigrate 'nu sacche de vote irregolare.

Assaije onne state le polemeche nate jndr'à 'u cendredestre (da sembre ostile a le trasmissiune televisive de Santoro) e da le vertice d'a RAI, da certe prese de posizione de Santoro duranne 'a trasmissione, accusate de essere "faziose" e "strumendale". Jndr'à pundate d'u 16 novemmre 2006, dedicate a 'a Sicilia, sus 'a fatìe ca non ge stè e a le numerose sciurecaminde de turnise pubblece, Santoro jè accusate de demagoggije da 'u Presidende d'a Reggione Salvatore Cuffaro. Cuffaro, a le domande d'u conduttore ca 'u 'ngalzesce cu le prime pàggene de le quotidiane ca parlane de le stipendie d'ore de le dirigende reggionale, responne rivelanne 'u presunde stipendie all'anne de Santoro a 'a RAI ca jè cchiù o mene 800.000 €, doje vote superiore de quidde d'u cchiù pajate diriggende siciliane.

Otre purfidiaminde onne state scatenate pure da 'a pundate d'u 1° masce 2008, jndr'à quale Santoro avere 'nvitate jndr'à 'u studie, 'mbrà l'otre, l'Assessore a culture de Melane, Vittorio Sgarbi e, avere mannate in onde stuezze d'u comizie tenute da 'u comeche Beppe Grillo a 'u [[V2-Day], jndr'à quale avenevane criticate certe aziune de Giorgie Napolitano, presidende d'a Repubbleche Tagliàne e, de Umberte Veronesi, oncologhe. Attacche pesande a 'a trasmissione avenerene fatte condre a Santoro e condre Grillo jndr'à 'nu mode trasversale. De cchiù, 'a pundate avenìe caratterizzate da 'a tipeche irascibbiletà de Sgarbi, ca lucculanne, 'nzultò Beppe Grillo e 'u giornaliste Marche Travaglio (presende jndr'à 'u studie), accusò 'u stesse Grillo de "andiamericanisme" (in riferimende a 'u spezzone de video jndr'à 'u quale Grillo parlò, criticanne apertamende 'a presenze de cchiù de 70 base NATO in Itaglie), defennìe le crestiane de Napolitano e Veronesi suverchianne 'a vôsce de Grillo e de Travaglio, dicenne ca «Enzo Biagi non g'à state cacciate da 'a RAI», e ca, sembre riferennese a Biagi, «le onne proposte 'n'otre programme sus a Rai 3 e jidde non g'a accettate».

'U 15 scennare 2009 ha state accusate da Lucia Annunziata, da 'u presidende RAI Claudio Petruccioli, da 'u presidende d'a Camere Gianfranghe Fini, da l'ambasciatore israeliane in Itaglie Gideon Meir e da diverse otre esponende politece da 'u cendre-destre e 'u cendre-sinistre de avè 'mbostate 'na pundate de AnnoZero jndr'à 'nu mode estremamende faziose . A l'Annunziata, Santoro ave resposte invitannele a trasè jndr'à 'u merite de le condenute d'a pundate e de no fà criteche a uecchie a 'u programme, 'nvece a Fini ave resposte ausanne 'u site Indernette de AnnoZero, dicenne de nò zumbà le combite istituzionale sue chiedenne 'na censure pe 'nu programme televisive.

'A questione d'a faziosità

Cumme ditte apprime, cchiù vote l'Autorità e 'u schieramende politeche d'u cendre-destre ave denungiate 'a presunde faziosità d'u sciurnaliste, jndr'à 'n'inzieme de accuse ca pò onne arrevate jndr'à 'na serie de procedeminde e aziune condre a Santoro. Seconde Marche Travaglio, 'a motivazione ca stè a 'a base de ste grave accuse e de le procedeminde jè direttamende proveniende da 'u munne d'a politeche e dovute, in pringipie, a le condroversie politeche sus a 'u case Mangano-Dell'Utri e sus a 'u case Satyricon, e cchiù nnande sus a oltre case de condizionamende d'a gestione d'a Rai da vanne de le virtece de amministrazione, ca sone de nomene politeche, sus a certe pundate d'a trasmissione Anno Zero (cumme pu case De Magistris o pu case Grillo-Sgarbi).

'Nfatte, cumme cundate jndr'à 'u libbre Regime (scritte 'nzieme a Peter Gomez), 'u "meccanisme" ca 'u munne politeche avere acchiate cchiù vote pe mannà Santoro purcé "personagge scomode" avere funzionate cu tecniche ca parterene da le accuse de "faziosità" pu screditamende 'mbrà 'u pubbleche, 'u 'mbieghe de le esposte a l'Autorithy pe sckaffà sanziune, l'editte de Sofia, arrevanne all'urteme a 'u licenziamende ufficiale da 'a RAI pe mmienze de sciueche e sciucaridde e scuse de tutte le tipe. 'Nfatte, l'Authority (penzate da le Guverne de cendre sinistre) jè 'n'aggenzie lottizzate e, quinde amministrate totta totte da le istituziune politeche, jndr'à le quale 'nu sbuènne de politece (soprattutte chidde d'u schieramende d'u cendre destre, cumme cchiù vote ditte), demostrerebbere, seconde sciurnaliste e studiuse cumme 'u stesse Travaglio, "tutte l'inderesse jndr'à l'epurazione de Santoro, cumme "sciurnaliste scomode" ".

Seconde certe commendatore politece, Santoro ha state 'nu sciurnaliste e reporter ca ave fatte assè 'nu sbuènne de aspette sconvolgende d'u paese danne vôsce a le vôsce ca ste asseve tanne tanne e minoritarie, combrese le movimende politece peccinne (cumme 'u MSI o 'a Lega Lombarda) scunnute jndr'à otre trasmissiune RAI. Pe quest'urtema caratteristeche de Santoro, Achille Occhetto 'u definìe 'nu "leghiste de sinistre".

Jndr'à 'u 1994, Umberte Bossi dichiarò nnande 'a Commissione Culture d'a Camere sta cose: "Senze le trasmissiune de Santoro l'Itaglie non g'avesse pigghiate coscenze de le spreche de le turnise pubbleche e d'u disastre sociale d'u Sud".

Seconde l'Auditel, le trasmissiune de Santoro onne avute 'nu share televisive larije jndr'à RAI, da 'u 1996 'mbonde a 'u 2008. Partenne da 'u 1986, 'u programme televisive Samarcanda, purtò 'u share de Rai3, all'inizie d'u 2%, 'mbonde a 'u 15%, invece 'u programme stesse raggiungìe 'u 30% de share de medie. Le pundate de le trasmissiune Il raggio verde e Sciuscià, partenne da 'u case Satyricon 'mbonde a l'epurazione de Santoro, averene share televisive combrese 'mbrà 'u 18% e 'u 25%, pare a 'u programme de attualità cchiù viste jndr'à televisione tagliàne.

Santoro ave pure subbite 'nu sbuènne de criteche e accuse de faziosità sie da le politece de cendre destre ca chidde de cendre sinistre eppure da 'na vanne d'a stambe (Corriere della Sera, La Repubblica, La Stampa ecc.) apprisse 'a pundate de Anno Zero d'u 15 scennare 2009 (ca parlave d'u conflitte israele-palestinese e lassate in dirette da Lucia Annunziata).

Cundanne penale

Michele Santoro 'u 5 novemmre 2007 ha state cundannate da 'u Tribbunale de Varese pe diffamazione a mezze televisive pe avè accostate jndr'à 'u 2000 jndr'à 'na pundate d'a trasmissione dirette da jidde "Il raggio verde" l'associazione culturale "Terra Insubre" a otre moveminde razziste de estrema destre.

Le minacce de morte d'a Mafia

Jndr'à 'u mese de sciugne d'u 2009 'a Digos indaghe sus a 'na lettere ca condeneve 'nu proiettile de fucile winchester e 'a scritte "morirai" (tar. a murè) mannate a Michele Santoro a le ufficie d'a Rai. 'A Procure de Rome ave apirte 'nu fascichele condre a ignote

Jndr'à 'u masce 2010 a 'a redazione palermitane de Repubblica avene recapitate 'na buste cu 'nu proiettile e 'na lettere scritte cu 'a maghene, addò stavane scritte minacce de morte a Andonie Ingroia, procuratore aggiunde d'a Procure distrettuale andimafia de Palermo, Sergio Lari procuratore de Calatanissetta, Michele Santoro, Sandre Ruotolo, Massime Cancimino, a 'u collabboratore de giustizie Gaspare Spatuzza.

Premie e recanusceminde

'U 25 sciugne 2010, jndr'à l'occasione d'a Quinde edizione d'u "Premie Sciurnalisteche 'Ndernazionale S. Margherita Ligure pa Culture", l'ha state assegnate 'u premie "Necole Abbagnano" pu sciurnalisme. Le eleminde d'a giurie onne state Fiorella Minervino, Renzo Cianfanelli, Dino Cofrancesco, Emilio Fede, Vittorio Feltri, Gianluigge Gabetti, Paolo Mieli, Giuanne Riotta e Marcelle Sorgi.

Talk show e programme de 'mbormazione penzate e condotte

Ritratte de Michele Santoro fatte da Auguste De Luca pu programme televisive Samarcanda (Rai 3, 1987)

• Samarcanda - Rai 3, 1987/'92.
• Il rosso e il nero (tar. - 'U russe e 'u gnure)- Rai 3, 1993/'94.
• Tempo reale (tar. - Tiembe Reale) - Rai 3, 1994/'96.
• Moby Dick - Italia 1, 1996/'99.
• Circus - Rai 1, 1999/2000
• Il raggio verde (tar. - 'U Ragge verde) - Rai 2, 2000/'01.
• Sciuscià - Rai 2, 2000/'02.
• Sciuscià - Edizione straordinarie - Rai 2, 2001/'02.
• AnnoZero (tar. AnneZero) - Rai 2, 2006-in corso
• Raiperunanotte (tar. Rai pe 'na nuttate) - 2010

Puntade particolare

• 'U 2 febbrare 1995, duranne 'na pundate de Tempo Reale, Berlusconi telefone pe attaccà Eugenio Scalfari
• 'U 13 abbrile 1995 Berlusconi jè ospite (prime e urtema vote) de Santoro, presende le sciurnaliste Giuanne Riotta, Barbara Palombelli e Gad Lerner.

Bibbliografije

• Nina Rothenberg, Political cleansing and censorship in public television – a case study of Michele Santoro and Enzo Biagi, in: Albertazzi, Brook, Ross, Rothenberg, Resisting the Tide: Cultures of Opposition During the Berlusconi Years, Londra, Continuum, 2009

Opere

• Oltre Samarcanda, Melane, Sperling & Kupfer, 1991.
• Michele chi?, Melane, Baldini & Castoldi, 1996.

'Ndruche pure

• Editte bulgaro
• Marche Travaglio

Otre pruggette

Altri progetti

• Uicchiquote
• Uicchimedie Commons

• Uicchiquote tène citazioni de oppure sus Michele Santoro
• Uicchimedie Commons tène files multimediale sus Michele Santoro

Collegaminde fore a Uicchipèdie

• Site personale sus a le eleziune europee 2004, [3]
• Pàgena personale d'u Parlamende Europèe, [4]
• Site de Annozero, [5]