Nils Liedholm

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Giugador e peui alenator ëd fótbal. Nils Liedholm a l'era nassù a Valdemarsvik, an Ësvessia, a j'8 d'otóber dël 1922.

A giugava ant ël Norrköping, anté ch'a l'ha vagnà ij campionà svedèis ant ël 1947 e 1948. Catà peui dal Milan, a l'ha giugà ansema a Gren e Nordahl, formand con lor ël trio d'atach Gre-No-Li. Con ël Milan a l'ha vagnà ij campionà italian dël 1951, 1955, 1957, 1959.
Dël 1958 a l'é stàit capitani dla Svessia ai campionà dël mond; rivà an final, a l'han ciapaje 5-2 dal Brasil. Ël prim gòl dla Svessia a l'avìa falo chiel.

A tranteneuv agn Liedholm a l'ha chità ëd gieughe. A l'é dventà alenator dël Milan, con ël qual a l'ha vagnà ël campionà italian dël 1979.
A l'ha alenà ëdcò la Roma, con la qual a l'é amponusse ant ël campionà dël 1983 e ant le Cope Italia 1980, 1981, 1984.

Niels Liedholm a l'avìa marià la turinèisa Nina Gabotto e a l'era restà vidov.
A l'é mòrt a Cucri, an Monfrà, ai 5 ëd novèmber dël 2007. A l'é sotrà al camposanto monumental ëd Turin.