Lambdazismus
Lambdazismus heeßt ma de Laudwandel vumne Konsonand zumne /l/. En Wandel vumne /d/ zwische zwee Vokal zumne /l/ is en D-Lambdazismus. Der Nåme kummt vum grieschische Buschdawe Lambda, des is L. Im Rhåifränggische Schbroochraum findt ma de D-Lambazismus im begrenzde Regione. Frieher war-er weider verbreidt. Leit, wu e d als l schwetze, sescht ma, dede lolle[1].
In da Kurpalz waa da Lambdazismus frieher zwische Månnem un Ewwerbach weit verbreidt. Iwwarisch is des Lolle noch in Schriese, Dossene, Feilne, Hellese un em umiddelbaa bei Månnem gelejene vorderpälzische Aldrib[2]. Di drei Orde Aldebach, Lambehåå un Vorderheibach, esdlisch vun Schriese, ware e Zendrum mid bsunners viele Werder mid Lambdazismus[3]
Beischbiel:
| Mid Lambdazismus | Uhne Lambdazismus |
|---|---|
| Feilne | Feidene |
| Hellese | Heddese |
| Oulewald | Oudewald (Odewald) |
| Bollem | Boddem (Bode) |
| Fallem | Faddem (Fade) |
| Fellare | Feddare |
| Flellamaus | Fleddamaus |
| Kaller | Kadder (Kader) |
| Schliele | Schliede (Schlidde) |
| Ruler | Ruder |
| Bruler | Bruder |
| reile | reide |
| beele | beede |
| schneile | schneide |
| Schniller (Ensem) | Schnidder (Schneider) |
| lällisch | läddisch (ledisch) |
| rod, role (Faab) | rod, rode |
Aa im iwwarische pälzische Schbroochraum hot-s Gejende gewwe, wu ma vor Jazehnde noch de Lambdazismus gekennt hot wie nordesdlisch vun Kusel, in Dääle vum Bliesgau, z. B. Bekwella, in Birgefeld un Ensem (Sabrigge)[4].
En Beischbielsatz aus Birgefeld is folgender, wu der Kischder Fuchse Karl zum Kerscherot un Pfarrer Haag gsaat hot: „Jo, jo, Herr Kirjerot, pririje kann e jela, awa noch lang net loule!“ (pririje heeßt breddische, loule heeßt laide).
Im Rhåifränggische Schboochraum is da d-Lambdazismus außerdemm noch im hessische Dillkreis bekånnt. Dort sescht ma zum Beischbiel in Wißmar Wäeller fä Wedder.[5]
De Lambdazismus im Rhåifränggische kamma wisseschafdlisch als Sonderfall vum Rhodazismus bedrachde.[6] Beim Rhodazismus werd e /d/ dursch e /r/ ersetzt. Zum Beischbiel gibt-s bei folgende Werder drei Wariande: Odewald – Ourewald – Oulewald; Bruder – Brurer – Bruler.
Außerhalb vum Rhåifränggische kennt ma de d-Lambdazismus aa
- im Moselfränggische uffem Schdrimmischer Berg (hdt: Strimmiger Berg): Beij Gewilla sall ma net bolle olla met de Räla fahre, nur belle (= Bei Gewidder soll ma net bade odder mit de Rädder fahre, nur bede).[7]
- un in bladdeitsche Dialegde in Holschdein: weller fä wedder (widder), Leller fä Ledder (Leeder).[8]
- in da Tschuwaschische Schbrooch, ere Turkschbrooch in de Russische Rebubligge Tschuwaschie, Tataschdan un Baschkordoschdan un weidare kläne Gebiede
Lidaradur
[Schaffe | Om Gwelltegschd schaffe]- Alfred Lameli: Strukturen im Sprachraum: Analysen zur arealtypologischen Komplexität der Dialekte in Deutschland, Linguistik – Impulse & Tendenzen Band 54, Walter de Gruyter 2013, ISBN 9783110331394
- Johannes Venema: Zum Stand der zweiten Lautverschiebung im Rheinland: diatopische, diachrone und diastratische Untersuchungen am Beispiel der dentalen Tenuis (voralthochdeutsch /T/), Mainzer Studien zur Sprach- und Volksforschung Band 22, Franz Steiner Verlag 1997, ISBN 9783515070690
- Paul Glass: Ensemma Pladd fa allegäär, Folge 1: Der Lambdazismus
Änzlnochweis
[Schaffe | Om Gwelltegschd schaffe]- ↑ Pfälzisches Wörterbuch: Lemma lollen
- ↑ Rudolf Post: Der Dialekt von Altrip und seine Stellung innerhalb des Pfälzischen, 1999, uff: http://www.altriper-woerterbuch.de/dialektlandschaft.html
- ↑ Lameli, Strukturen im Sprachraum, S. 261
- ↑ Paul Glass: Ensemma Pladd
- ↑ Rüdiger Soßdorf: Sprache mit Charme: Das herbe »Platt« (Gießener Allgemeine, 02.05.2017)
- ↑ Lameli, Strukturen im Sprachraum, S. 258 u. 262; Venema, Zum Stand der zweiten Lautverschiebung, S. 382
- ↑ noch Strimmiger Berg uf da Hochdeitsche Wikipedia
- ↑ Lambdazismus uf da Bladdeitsche Wikipedia