Antias Hulandes

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Antias Hulandes
Antia Hulandes Antia Hulandes
Himno: Himno sin título
Informacion basico
Idioma oficial	Hulandes, Papiamentu, Ingles
Capital	Willemstad
Forma di gobernacion	Demokrasia parlamentario Monarkia konstitushonal
Soberania	País den Reino Hulandes
Establecimento di soberania Statuut 15 di desèmber 1954
Hefe di estado - Reina Reina Beatrix - Gobernador Frits Goedgedrag - Promé Minister Emily de Jongh-Elhage
Geografia
Area	800 (n/a% awa)
Coordinatonan	15°N 66°W
Poblacion
Populacion	197,041  (2009)
Densidad	246.3 hab/km²
Otro informacion
Moneda	Florin (Gulden) (ANG)
UTC	-4
Web | Tel.	.an |  599
Mapa detaya di Antias Hulandes
[Edita Wikidata] · [Manual]

Antia Hulandes òf Antia Neerlandes (na hulandes: De Nederlandse Antillen), tabata for di 15 di desèmber 1954 te 10 di òktober 2010 un país den Reino Hulandes. Inisialmente e tabata konsistí di seis isla i for di 1986 di 5 isla karibense despues ku Aruba a atkirí su status aparte. E islanan di Antia Hulandes tabata konsistí na nan lugá di dos grupo di isla den Laman Karibe ku ta forma parti di Antias Menor: e islanan di Sotavento i e islanan di Barlovento (Islariba). Na 2010 Kòrsou i Sint Maarten a bira paísnan autónomo den Reino Hulandes i Saba, Sint Eustatius i Boneiru a bira munisipio spesial hulandes. E ekonomía di e islanan ta dependé primordialmente di turismo i petroleo.

Historia

E spañónan tabata e promé Oropeonan pa establese nan mes riba e islanan (pa abou: Alonso de Ojeda, 1499; pa ariba: Cristóbal Colón, 1493). Den e siglo 17, e West-Indische Compagnie a konkistá e islanan e a uza nan komo base pa negoshi di katibu. Esaki tabata abolí na aña 1863.

Na aña 1954, e islanan tabata promoví di kolonia pa parti di e Reino di Hulanda komo un estado asosiá. Aruba tabata parti di Antia te ku 1986, ora el a haña "status aparte" i a bira un parti apart den e reino.

Polítika

Remplasando e areglo di estado interino a keda proklamá dia 29 di mart 1955 e Konstitushon di Antias Hulandes mediante un medida general di reino (algemeen maatregel van rijksbestuur). E hefe di estado tabata e rei di Reino Hulandes, ku den Antia ta representá pa un gobernador. E gobernador tambe ta na kabes di e gobièrnu lokal, i huntu ku e ministernan ta forma parti di e poder ehekutivo di gobièrnu.

E kurpa legislativo tin dos parti. Delegashonnan di e islanan ta representá den gobièrnu antiano, pero kada isla tin su mesun gobièrnu insular ku ta goberná riba un base diario.

Disolushon

Den 2004 un komishon di e gobièrnunan di Antia i di Hulanda a reportá riba e futuro di e Antia Hulandes. E komishon a avisá un revishon di e Statuut pa e Reino Hulandes pa desolbé e pais Antia Hulandes.

Kòrsou i Sint Maarten lo forma dos estadonan asosiá nobo. Boneiru, Saba i Sint Eustatius lo bira parti di Hulanda komo isla di reino. Riba 28 di novèmber, 2005, e gobièrnu hulandes a yega na un akuerdo ku e gobièrnunan di tur e islanan, ku lo hasi tur lokual e komishon a konkluí realidat pa yüli 2007.

Islanan

E dos grupo di islanan di Antia Hulandes ta:

• E islanan pa abou (Benedenwindse Eilanden):
  • Boneiru, huntu ku e isla chikitu Klein Bonaire
  • Kòrsou, huntu ku e isla chikitu Klein Kòrsou
• E islanan pa ariba (Bovenwindse Eilanden):
  • Saba
  • Sint Eustatius
  • Sint Maarten, e parti zùit di e isla di Sint Maarten (e parti nort, Saint-Martin, ta franses i ta parti di e departamento ultramar di Guadeloupe).

Geografia

Mapa di Antia Hulandes

E islanan pa ariba tur ta di orígen volkániko i tin hopi seru, ku no ta laga hopi lugá pa agrikultura. E islanan pa abou ta di orígen mesklá, di volkan i di koral. E punto mas haltu ta Mount Scenery, 862 meter, na Saba. Esaki ta e punto mas haltu den henter Reino Hulandes tambe.

Ekonomia

Turismo, transportashon di petroleo i refinamentu di zeta (na Kòrsou), i tambe negoshinan "offshore" ta forma gran parti di e ekonomia di e islanan. E islanan tin un bon ganashi per capita i un bon infrastruktura kompará ku otro país den e region. Kasi tur karga (kapital i pa konsumidó) ta importá, gran parti di esaki ta di Venezuela, Merka, Mexico i Hulanda, ku ta provee e islanan ku sen tambe. Tera inadekuado i insufisiente awa ta hasi e desaroyo di agrikultura difisil. E florin antiano tin un balor fihá na e dollar merikano (1,79:1).

Demografia

Mayoria antiano ta desendiente di kolonistanan europeo i di katibu afrikano ku tabata importá i bendí aki di siglonan 17 pa 19. E sobrá di e poblashon a bini di otro isla den Karibe, Amérika latino, ost Asia i di otro parti di mundu.

Papiamentu ta e idioma dominante na Kòrsou i Boneiru (i tambe Aruba). E idioma krioyo aki a forma di hulandes, spañó, ingles i português.

Ingles ta e idioma mas komun riba e islanan pa ariba (St. Maarten, Saba i St. Eustatius). Spañó ta birando e di dos idioma riba e islanan pa ariba, mas tantu na St. Maarten.

Maske e idioma ofisial ta hulandes, e gobièrnu antiano ofisialmente ta rekonosé e uzo di ingles i papiamentu. Tambe, maske e legislatura ta na hulandes, diskurso den parlamento ta na ingles òf papiamentu.

Gran parti di e poblashon ta kristian, mas tantu katóliko. Kòrsou tambe tin un minoridat hudiu ku ta desendiente di un grupo di hudiu Sefardí ku a bini di Amsterdam i Brazil na aña 1654.

Den e último dékadanan, hopi antiano hóben i eduká a emigrá pa Hulanda, ku ta laga e islanan ku un problema sosial-ekonómiko grandi. Sinembargo, den último añanan, hopi hende di Repúblika Dominikano, Haiti, Karibe anglofóniko i Colombia a imigrá pa Antia.

Kultura

E orígen di e poblashon i unda e islanan ta situá ta duna Antia un kultura mesklá. Turismo i un presensia dominante di e media merikano a yuda e influensia merikano krese. Mes kos ku otro país den Karibe i Amérika latino, riba tur e islanan, Karnaval ta un evento importante.

Linknan eksterno

• www.gov.an - Portal ofisial di e gobièrnu di Antia Hulandes
• Banko Sentral di Antia Hulandes
• Antillenhuis - Gabinete di Minister Plenipotensiario di Antia Hulandes na Hulanda

· ·

Teritorio karibense di Reino Hulandes