Zhuangzi (libre)
Lo Zhuangzi (prononciacion chinesa: [ʈʂwɑ́ŋ tsɨ̀]; chinés: 莊子; Wade–Giles: Chuang-tzu) es una òbra religiosa e filosofica escricha a la fin del Periòde dels Reialmes Combatents. Lo libre relata d'istòrias destinadas a exemplificar l'idea de naturalesa (ziran) del savi taoïsta. Es nomenat del nom de son autor, "Mèstre Zhuang" (Zhuangzi). Lo Zhuangzi es un dels dos tèxtes fondadors del taoïsme, amb lo Laozi (Daodejing).
Genèsi del libre
[modificar | Modificar lo còdi]Lo Zhuangzi foguèt escrich per Zhuang Zhou, subrenomenat 'Mèstre Zhuang' (en chinés: "Zhuangzi" 莊子).
La vida de l'autor es en partida coneguda. Nasquèt en - 369 dins l'Estat de Song e moriguèt probablament entre - 295 e -286. Se pensa que passèt una partida de sa vida dins l'Estat de Chu e dins l'Estat de Qi, a Linzi. Sa vida es tanben coneguda gràcias a Sima Qian. Dins lo seu monumental Recòrds del Grand Istorian, Sima Qian porgís una biografia de Zhuang Zhou que balha un fum de detalhs.
Es reconoscut, dempuèi al mens la dinastia Song qu'una partida del tèxte es pas l'òbra de Zhuang Zhou. Los sèt primièrs capítols son considerats sensa cap de dobte coma son òbra. Per los autres capítols, se pensa que foguèron retrabalhats o escriches per divèrses autors. Totun, totòm reconeis que los capítols tots foguèron escriches entre los sègles IV e II ab. Jèsus Crist.
Contengut del libre
[modificar | Modificar lo còdi]Lo Zhuangzi es pas un tractat filosofic basat subre una argumentacion abstracta. Compren 33 capítols e conta una seria d'istòrias o d'anecdòctas de la vida de Mèstre Zhuang.
Demest las istòrias mai celèbras, i a ' Zhuang Zhou somia qu'es un parpalhòl' ("Zhuāng Zhōu mèng dié" 莊周夢蝶). Dins aquest relat Zhuang Zhou s'imagina qu'es vengut un parpalhòl e medita subre l'illlusion e la natura de la causas. I a tanben 'La Mòrt de la molhèr de Zhuangzi' ("Zhuāngzǐ qī sǐ" 莊子妻死) qu'es l'occasion de perpensar a la natura de la vida.
Es de notar que lo Zhuangzi conten tanben qualques capítols anticonfucianistas.
Referéncias
[modificar | Modificar lo còdi]Pregadio, Fabrizio. ed. (2008). The Encyclopedia of Taoism. Routledge.
Zhuang Zi (1996 (3ª edición 2007)). Zhuang Zi: maestro Chuang Tsé. Traducción directa del chino de los 33 capítulos, introducción y notas a cargo de Iñaki Preciado Idoeta. Barcelona: Editorial Kairós.
Ziporyn, Brook (2009), Zhuangzi: The Essential Writings, Indianapolis: Hackett Publishing Company.