Sherpas

Lei Sherpas son un pòble de cultura tibetana que viu dins lei regions montanhosas dau nòrd-èst de Nepal, principalament dins lei vaus de Khumbu, de Solu e de Pharak. De comunautats existisson tanben dins lei vilas pus importantas dau país. Originaris de la region de Kham, situada dins l'èst de Tibet, lei Sherpas migrèron vèrs aquela region a la fin dau sègle XV e au començament dau sègle XVI en causa de trèbols sociaus e religiós e d'invasions mongòlas. Segon lo recensament nepalés de 2001, èra aperaquí 150 000. Son famós per seis alpinistas.

Lei Sherpas son bodistas e parlan lo sherpa, una lenga tibetobirmana. Lor societat es fòrça ierarquizada e fondada sus un sistèma de clans. Lo norrigatge de iacs e lo comèrci son lei doas activitats economicas tradicionalas dei regions sherpas e constituïsson encara una basa importanta de la poissança dei clans. Pasmens, dempuei la fin dau sègle XX, lo torisme es egalament vengut un sector important gràcias a l'arribada d'un nombre important d'alpinistas desirós de realizar l'ascension dau Mont Everest.

Liames intèrnes

• Everest.
• Imalaia.

Bibliografia

• (de) Michael Oppitz, « Geschichte und Sozialordnung der Sherpa » dins Friedrich W. Funke (dir.), Beiträge zur Sherpa-Forschung, Universitäts-Verlag Wagner, 1968.
• (fr) Ray Wilson, Sherpa : et autres ethnies mythiques de l'Himalaya, Favre, 2004.